Lioar Yob 10 - Yn Vible Casherick 1775 1819

CAB. X

¹ Ta mee skee jeh my vioys: neem’s m’accan y cheau orrym pene; neem’s loayrt ayns angaish m’annym.

² Jir-ym rish Jee, Ny jean m’y gheyrey; insh dou cre’n-fa t’ou streeu rhym.

³ Vel eh vondeish dhyt’s dy my laadey lesh seaghyn, dy hoiaghey beg jeh obbyr dty laueyn hene, as soilshean er coyrle ny mee-chrauee?

⁴ Vel sooillyn foalley ayd? ny vel oo fakin myr ta dooinney fakin?

⁵ Vel dty laghyn myr laghyn dooinney? vel dty vleeantyn myr laghyn dooinney,

⁶ Dy vel oo briaght lurg my vee-chairys, as ronsaghey son my pheccah?

⁷ Ta fys ayd nagh vel mee ooilley-cooidjagh foiljagh; as nagh vel fer erbee oddys livrey ass dty laue.

⁸ Ta dty laueyn er my chroo, as dy slane er my chummey; ny-yeih t’ou dy my stroie.

⁹ Cooinee, ta mee guee ort, dy vel oo er n’yannoo mee jeh’n chray; as der oo lhiat mee reesht gys y joan?

¹⁰ Nagh vel oo er my heeley myr bainney, as er my vinjaghey myr groo?

¹¹ T’ou er my choamrey lesh crackan as feill, as er my niartaghey lesh craueyn as fehyn.

¹² T’ou er choyrt dou bea as foayr, as ta dty ard-chiaralys er choadey my spyrryd.

¹³ As ny reddyn shoh t’ou er cheiltyn ayns dty chree: ta fys aym dy row shoh ayns dt’aigney.

¹⁴ My ta mee jannoo peccah, t’ou goaill tastey jeh, as cha jean oo m’y heyrey veih my vee-chairys.

¹⁵ My ta mee cur-rish olk, smerg dou hene; as my ta mee ynrick, ny-yeih cha droggym seose my chione. Ta mee lane dy heaghyn; shen-y-fa jeeagh er my angaish;

¹⁶ Son te lhieeney orrym. T’ou dy my helg myr lion dewil; as reesht ta dty laue yindyssagh trome orrym.

¹⁷ T’ou troggal seose dt’eanishyn ass-y-noa m’oï, as bishaghey dty yymmoose orrym; ta caghlaaghyn as caggey m’oï.

¹⁸ Cre’n-fa eisht hug oo lhiat mee ass y vreïn? Oh dy beign er scarrey rish my vioys, as nagh beagh sooill er vakin mee!

¹⁹ Veign myr nagh beign; veign er my choyrt lhiam veih’n vreïn gys yn oaie.

²⁰ Nagh vel my laghyn giare? scuirr eisht voym, as lhig fea dou, dy voddym tammylt dy gherjagh y gheddyn,

²¹ Roish my jem roym as nagh jyndaa-ym reesht, eer gys cheer y dorraghys hene as scadoo yn vaaish;

²² Cheer dy ghorraghys, eer dorraghys hene, as scadoo yn vaaish, fegooish caghlaa, as raad ta’n soilshey myr y dorraghys hene.