Jeremiah 28 - Yn Vible Casherick 1775 1819

CAB. XXVIII

¹ As haink eh gy-kione ’sy vleïn cheddin, ayns toshiaght reill Zedekiah ree Yudah, ’sy chiarroo vleïn, as ayns y wheiggoo vee, dy ren Hananiah mac Azur yn phadeyr, va jeh Gibeon, loayrt rhym ayns thie yn Chiarn, fenish ny saggyrtyn as ooilley’n pobble, gra,

² Myr shoh ta Chiarn ny flaunyssee, Jee Israel, loayrt as gra, Ta mee er vrishey quing ree Vabylon.

³ Roish slane daa vleïn ver-ym lhiam gys yn ynnyd shoh ooilley siyn thie yn Chiarn ren Nebuchadnezzar ree Vabylon goaill ersooyl veih’n voayl shoh, as hug eh lesh ad gys Babylon:

⁴ As ver-ym lhiam reesht gys y voayl shoh Jeconiah mac Yehoiakim ree Yudah, marish ooilley cappeeyn Yudah, hie gys Babylon, ta’n Chiarn dy ghra: son brish-yms quing ree Vabylon.

⁵ Eisht dooyrt y phadeyr Jeremiah rish y phadeyr Hananiah, fenish ny saggyrtyn as ooilley’n pobble, va nyn shassoo ayns thie yn Chiarn,

⁶ Dooyrt eer y phadeyr Jeremiah, Amen: dy jean y Chiarn myr shen; dy gooilleen y Chiarn dty ghoan t’ou er loayrt, dy chur thie reesht veih Babylon gys yn ynnyd shoh siyn thie yn Chiarn, as ooilley ny hug ad lhieu ersooyl ayns cappeeys.

⁷ Ny-yeih, eaisht uss nish rish y goo shoh ta mish loayrt ayns dty chleayshyn, as ayns clashtyn ooilley’n pobble shoh;

⁸ Ren ny phadeyryn ta er ny ve roym’s as royd’s ’sy chenn earish phadeyrys chammah noi ymmodee cheeraghyn, as reeriaghtyn niartal, mychione caggey, as seaghyn, as cramp.

⁹ Yn phadeyr ta phadeyrys jeh shee, tra hig goo yn adeyr shen gy-kione, eisht bee’n phadeyr cronnit dy vel yn Chiarn dy firrinagh er choyrt eh.

¹⁰ Eisht ghow Hananiah yn phadeyr yn whing jeh mwannal y phadeyr Jeremiah, as ren eh brishey eh.

¹¹ As loayr Hananiah fenish ooilley’n pobble, gra, Myr shoh ta’n Chiarn dy ghra, Er yn aght cheddin brish-yms quing Nebuchadnezzar ree Vabylon veih mwannal dy chooilley ashoon, cheu-sthie jeh slane daa vleïn. As hie yn phadeyr Jeremiah roish.

¹² Eisht haink goo yn Chiarn gys Jeremiah yn phadeyr, (erreish da’n phadeyr Hananiah brishey yn whing veih mwannal yn adeyr Jeremiah,) gra,

¹³ Immee as abbyr rish Hananiah, gra, Myr shoh ta’n Chiarn dy ghra, T’ou er vrishey ny quingyn fuygh; agh nee oo jannoo ’syn ynnyd oc quingyn yiarn.

¹⁴ Son myr shoh ta Chiarn ny flaunyssee, Jee Israel, dy ghra, Ta mee er choyrt quing yiarn er mwannal ooilley ny ashoonyn shoh, dy vod ad shirveish Nebuchadnezzar ree Vabylon; as nee ad shirveish eh: as ta mee er choyrt dasyn beïyn y vagheragh myrgeddin.

¹⁵ Eisht dooyrt y phadeyr Jeremiah rish yn adeyr Hananiah, Eaisht rhym nish, Hananiah, Cha vel yn Chiarn er dty choyrt; agh t’ou cur er y pobble shoh dy hreishteil ayns breg.

¹⁶ Shen-y-fa myr shoh ta’n Chiarn dy ghra, Cur-my-ner, neem’s uss y scughey veih eaghtyr y thallooin: eer ’sy vleïn shoh hene yiow baase, son dy vel oo er n’ockley magh mee-viallys noi yn Chiarn.

¹⁷ Myr shen hooar y phadeyr Hananiah baase yn vleïn cheddin, ’sy chiaghtoo vee.