Jeremiah 12 - Yn Vible Casherick 1775 1819

CAB. XII

¹ Ynrick t’ou uss, O Hiarn, tra ta mee arganey rhyt; ny-yeih lhig dou loayrt rhyt mychione dty vriwnyssyn: Cre’n-fa ta stayd ny mee-chrauee bishaghey? cre’n-fa ta ooilley ny ard-volteyryn as ad maynrey?

² T’ou er hoiaghey ad, as t’ad eer er ghoaill fraue; t’ad gaase; dy jarroo, t’ad gymmyrkey mess: t’ou uss er-gerrey ’sy veeal oc, agh foddey veih nyn gree.

³ Agh shione dhyt mish, O Hiarn; t’ou er m’akin, as er phrowal my chree dhyt hene: eiyr magh ad myr kirree ta kiarit dy baase, as cur dy lhiattee ad cour y laa t’ad dy gholl er stroie.

⁴ Caïd nee’n cheer dobberan, as glassyraght dy chooilley vagher fioghey, kyndagh rish mee-chraueeaght ny cummaltee? ta’n maase shymley ersooyl, as ny eeanlee; son dy dooyrt ad, Cha vel sooill echey er nyn raaidyn.

⁵ My t’ou er roie rish coshee, as t’ad er n’yannoo skee jeed, kys eisht oddys oo cummal magh rish cabbil? as my t’ou tooillit oc ’sy thalloo sheaynt, raad va dty haitnys, eisht cre nee oo ayns thooillaghyn Yordan?

⁶ Son eer dty vraaraghyn, as thie dt’ayrey, t’adsyn neesht er ghellal dy foalsey rhyt; t’ad myrgeddin er lhiggey’n theay ort: ny treisht orroo, ga dy vel ad loayrt goan brynneragh rhyt.

⁷ Ta mee er hreigeil my hie, ta mee er chur voym my eiraght; ta mee er livrey ish va slane graih my chree gys laueyn e noidyn.

⁸ Ta my eiraght dooys myr lion ’sy cheyll; t’eh cur magh e choraa m’oï: shen-y-fa ta mee er chur dwoaie da.

⁹ Ta my eiraght dooys myr yn hullad spottagh; ta ny eeanlee ooilley mygeayrt ec noidys r’ee; tar-jee, chaggle-jee ooilley beïyn y vagher, tar-jee dy stroie.

¹⁰ Shimmey bochill t’er lhiggey naardey my gharey-feeyney, t’ad er stampey sheese my eiraght, t’ad er n’yannoo my hoghyr aalin ny aasagh fadane.

¹¹ T’ad er n’yannoo eh follym-faase, as nish te ny hraartys te gaccan hym; ta’n slane cheer er ny choyrt naardey, er-yn-oyr nagh vel dooinney erbee dy ghoaill shoh gys e chree.

¹² Ta ny roosteyryn er jeet er ooilley ny ard-ynnydyn fud yn aasagh: son nee cliwe yn Chiarn stroie veih’n derrey chione jeh’n cheer eer gys y chione elley: cha bee fea ec cretoor erbee.

¹³ T’ad er chuirr curnaght, agh nee ad drineyn y vuinn; t’ad er ghoaill niart tooilleil orroo hene, agh gys beggan ymmyd: s’moal vees nyn moggey jeh nyn droar, kyndagh rish jymmoose hrome y Chiarn.

¹⁴ Shoh myr ta’n Chiarn dy ghra noi ooilley my ghrogh naboonyn, ta jannoo assee er yn eiraght hug mee da my phobble Israel; Cur-my-ner, nee’m ad y astyrt ass y cheer, as livrey-ym thie Yudah veih ny mast’ oc.

¹⁵ As hig eh gy-kione, lurg dou ve er n’eiyrt ad magh chyndaa-ym reesht, as bee’m chymmoil orroo, as ver-ym lhiam reesht dy chooilley ghooinney gys e eiraght, as dy chooilley ghooinney gys e halloo.

¹⁶ As hig eh gy-kione, my nee ad gynsaghey dy kiaralagh raaidyn my phobble, dy crauee loo liorish my ennym’s, gra, Myr ta’n Chiarn bio; (myr dynsee ad my phobble dy loo liorish Baal;) eisht yiow ad cummal shickyr, eer ayns mean my phobble.

¹⁷ Agh mannagh der ad biallys, nee’m ad y astyrt dy bollagh, as stroie-ym yn ashoon shen, ta’n Chiarn dy ghra.