Jannoo 3 - Yn Vible Casherick 1775 1819

CAB. III

¹ Nish hie Peddyr as Ean seose cooidjagh gys y chiamble, ec oor y phadjer, ta shen, yn nuyoo oor.

² As va dooinney dy row va baccagh veih breïn e vayrey, er ny hroggal, as currit ny lhie gagh laa ec y ghiat shen jeh’n chiamble, ta enmyssit Aalin, dy hirrey jeirk orroosyn va goll stiagh ayns y chiamble.

³ Honnick eh shoh Peddyr as Ean mysh goll stiagh ’sy chiamble, as hir eh jeirk orroo.

⁴ As yeeagh Peddyr dy gyere er, myr ren Ean, as dooyrt eh, Jeeagh orrin.

⁵ As ghow eh tastey jeu, jerkal rish red ennagh y gheddyn voue.

⁶ Eisht dooyrt Peddyr, Argid as airh cha vel aym, agh lheid as t’aym ta mee dy chur dhyt: Ayns ennym Yeesey Creest dy Nazareth, irree seose as shooill.

⁷ As ghow eh er y laue yesh eh, as hrog eh seose eh; as chelleeragh ghow ny cassyn as craueyn ny habbaneyn echey niart.

⁸ As lheim eh seose, as hass eh, as huill eh, as hie eh stiagh ayns y chiamble mâroo, shooyl as lheimyragh, as cur moylley da Jee.

⁹ As honnick ooilley yn pobble eh shooyl as cur moylley da Jee.

¹⁰ As hug ad enney er dy nee shoh eshyn boallagh soie shirrey jeirk ec giat Aalin y chiamble: as v’ad lhieent lesh yindys as atchim ec shen ny v’er daghyrt da.

¹¹ Agh myr va’n baccagh v’er ny laanaghey cummal dy jeean gys Peddyr as Ean, roie ooilley yn pobble dy cheilley gys y phorch ta enmyssit porch Solomon, goaill lane yindys.

¹² As tra honnick Peddyr shoh, dansoor eh yn pobble, Gheiney Israel, cre’n-fa ta shiu gindys er shoh? ny jeeaghyn cha gyere orrinyn, myr dy beagh shin liorish y phooar ny’n chraueeaght ain hene er chur er y dooinney shoh shooyl?

¹³ She Jee Abraham, as Isaac, as Jacob, Jee ny ayraghyn ain t’er ghloyraghey e Vac Yeesey; ren shiuish y livrey seose as y obbal ayns fenish Pilate, tra v’eh kiarit y raad y lhiggey da.

¹⁴ Agh dob shiuish yn Fer-noo casherick, cairagh, as hir shiu dunver er nyn accan dy ve livreït diu,

¹⁵ As ta shiu er varroo prince y vea, ren Jee y hroggal veih ny merriu; myr ta shinyn nyn veanishyn.

¹⁶ As yn ennym echeysyn trooid credjue ayns yn ennym cheddin t’er chur niart da’n dooinney shoh, ta shiu dy akin, as er ta enney eu: dy jarroo, she credjue aynsyn t’er n’obbraghey yn couyr breeoil shoh ersyn ’syn enish eu ooilley.

¹⁷ As nish, vraaraghyn, strooys dy nee trooid mee-hushtey ren shiu eh, myr ren myrgeddin ny fir-reill eu.

¹⁸ Agh shen va Jee ro-laue er hoilshaghey liorish beeal ooilley e adeyryn, dy row Creest dy hurranse, t’eh myr shoh er chooilleeney.

¹⁹ Gow-jee arrys er-y-fa shen, as chyndaa-jee, dy vod shiu v’er nyn ghlenney veih nyn beccaghyn, dy vod earishyn yn ooraghey cheet erriu veih fenish y Chiarn,

²⁰ As nee eh Yeesey Creest y choyrt, va roïe er ny phreacheil diu:

²¹ Eshyn ta dy ve ayns niau, derrey earishyn lhiassaghey dy chooilley nhee, ta Jee er loayrt liorish beeal ooilley e adeyryn crauee, er-dy hoshiaght y theihll.

²² Son dooyrt Moses dy firrinagh rish ny ayraghyn, Phadeyr, myr ta mish, nee yn Chiarn y Jee eu y hroggal seose diu, jeh nyn mraaraghyn; rishyn nee shiu geaishtagh ayns dy chooilley nhee cre-erbee nee eh y ghra riu.

²³ As hig eh gy-kione, dy bee dy chooilley annym nagh der geill da’n phadeyr shen, er ny stroie veih mastey yn pobble.

²⁴ As ta myrgeddin ooilley ny phadeyryn veih Samuel, dy jarroo whilleen as haink ny yeï, as ren phadeyrys, er n’insh ro-laue jeh ny laghyn shoh.

²⁵ Shiuish cloan ny phadeyryn as y chonaant, ren Jee rish nyn ayraghyn, gra rish Abraham, As ayns dty luight’s vees ooilley kynneeyn y theihll er nyn mannaghey.

²⁶ Erreish da Jee v’er hroggal seose e vac Yeesey, hug eh hiuish eh hoshiaght dy nyn mannaghey liorish chyndaa dy chooilley unnane eu veih e vee-chraueeaght.