Jannoo 26 - Yn Vible Casherick 1775 1819

CAB. XXVI

¹ Eisht dooyrt Agrippa rish Paul, Ta kied ayd loayrt er dty hon hene. Eisht heeyn Paul magh e laue, as dansoor eh er e hon hene,

² S’maynrey lhiam eh, ree Agrippa, dy vel mee dy ansoor er my hon hene jiu kiongoyrt rhyt’s, mychione dy chooilley nhee ta ny Hewnyn dy chur my lieh:

³ Agh erskyn ooilley, son dy vel oo toiggalagh ayns dy chooilley chliaghtey as question ta mastey ny Hewnyn: shen-y-fa ta mee guee ort, oo dy eaishtagh rhym dy surransagh.

⁴ My ymmyrkey-bea veih my aegid, va hoshiaght mastey my ashoon hene ec Jerusalem, ta fys ec ooilley ny Hewnyn er,

⁵ Bione daue mee er-dyn toshiaght (my yinnagh ad feanish y ymmyrkey) lurg yn aght s’chenney jeh’n chredjue ain, dy ren mee baghey my Pharisee.

⁶ As nish ta mee my hassoo, as er my vriwnys son treishteil yn ghialdyn ren Jee da ny ayraghyn ain:

⁷ Gys y gialdyn cheddin ta’n daa heeloghe yeig ain, shirveish Jee oie as laa, treishteil dy heet, as er coontey yn treishteil shoh, ree Agrippa, ta mee er my chassid liorish ny Hewnyn.

⁸ Cre’n-fa veagh eh smooinit red an-chredjuagh lieriuish, Jee dy vioghey ny merriu?

⁹ Ghow mish dy jarroo aym pene dy lhisin ymmodee reddyn y yannoo noi ennym Yeesey dy Nazareth.

¹⁰ As shen ren mee neesht ayns Jerusalem: as ymmodee jeh ny nooghyn yeigh mee ayns pryssoon, liorish yn phooar v’aym veih ny ard-saggyrtyn; as tra v’ad er nyn goyrt gy-baase, hug mee my choraa nyn ’oï oc.

¹¹ As smaghtee mee ad dy mennick ayns dy chooilley synagogue, as dêginee mee ad dy oltooan [Creest]; as va mee ass towse elgyssagh nyn ’oï oc, as ren mee tranlaase orroo gys eer ard-valjyn joarree.

¹² Er shoh tra hie mee gys Damascus, lesh pooar as barrantys veih ny ard-saggyrtyn;

¹³ Ec mun-laa, O ree, honnick mee er y raad soilshey veih niau erskyn sollyssid y ghrian, soilshean mygeayrt-y-moom’s, as y vooinjer v’er nyn yurnah mârym.

¹⁴ As tra va shin ooilley er duittym gys y thalloo, cheayll mee coraa loayrt rhym, as gra ayns glare ny Hebrewyn, Saul, Saul, cre’n-fa t’ou jannoo tranlaase orrym? S’doillee te dhyt dy vrebbal noi ny jilg.

¹⁵ As dooyrt mish, Quoi oo, Hiarn? As dooyrt eh, Mish Yeesey, orrym t’ou jannoo tranlaase.

¹⁶ Agh irree, as shass er dty chassyn: son ta mish er hoilshaghey mee hene dhyt er-yn-oyr shoh, dy yannoo oo dty hirveishagh as dty eanish, chammah jeh ny reddyn t’ou er vakin, as jeh ny reddyn shen ayndoo nee’m mee-hene y hoilshaghey dhyt;

¹⁷ Fendeil oo veih yn pobble, as veih ny Ashoonee, huc ta mee nish dy dty choyrt,

¹⁸ Dy osley nyn sooillyn, as dy hyndaa ad veih dorraghys gys soilshey, as veih pooar Noid-ny-hanmey gys Jee, dy vod ad leih peccaghyn y gheddyn, as eiraght nyn mast’ ocsyn t’er nyn gasherickey liorish y credjue ta aynym’s.

¹⁹ Er shoh, ree Agrippa, cha row mee mee-viallagh gys yn ashlish flaunyssagh:

²⁰ Agh hoilshee mee hoshiaght dauesyn v’ayns Damascus, as ec Jerusalem, as trooid ooilley ardjyn Yudea, as eisht da ny Ashoonee, ad dy ghoaill arrys as dy hyndaa gys Jee, as dy chur rish obbraghyn cooie son arrys.

²¹ Son ny oyryn shoh haare ny Hewnyn mee ayns y chiamble, as ghow ad ayns laue dy my varroo.

²² Lesh y cooney er-y-fa shen hooar mee veih Jee, ta mee er-mayrn gys y laa t’ayn jiu, gymmyrkey feanish chammah gys beg as mooar, fegooish nhee erbee sodjey y ghra na dooyrt ny phadeyryn as Moses harragh gy-kione:

²³ Dy row Creest dy hurranse, as dy nee eh veagh y chied er yinnagh girree veih ny merriu, as soilshey y skeayley magh er y pobble, as er ny Ashoonee.

²⁴ As myr v’eh myr shoh loayrt ass e lieh hene, dooyrt Festus lesh ard-choraa, T’ou ass dty cheeayl, Phaul: ta’n ynsagh mooar dy chur oo er-shaghryn.

²⁵ Agh dooyrt eshyn, Cha vel mish ass my cheeayl, Festus smoo ooasle; agh ta mee loayrt magh goan dy irriney as dy heeltys.

²⁶ Son ta toiggal ec y ree jeh ny reddyn shoh, kiongoyrt rish er-y-fa shen ta mee loayrt dy arryltagh: son er-lhiam nagh vel veg jeh ny reddyn shoh keillit veihsyn; son cha row yn obbyr shoh jeant ayns corneil.

²⁷ Ree Agrippa, vel oo credjal ny phadeyryn? ta fys aym dy vel oo credjal.

²⁸ Eisht dooyrt Agrippa rish Paul, T’ou faggys er my choyrlaghey dy ve my Chreestee.

²⁹ As dooyrt Paul, Baillym gys Jee dy beagh, cha nee ynrycan oo hene, agh myrgeddin ooilley ny ta dy my chlashtyn er y laa t’ayn jiu, cha nee faggys agh ooilley-cooidjagh lheid as ta mish, cheu-mooie jeh ny geulaghyn shoh.

³⁰ As tra v’eh er ghra shoh, dirree yn ree, as y kiannoort, as Bernice, as adsyn va nyn soie mâroo,

³¹ As hie ad dy lhiattee, as loayr ad eddyr ad-hene, gra, Cha vel y dooinney shoh kyndagh jeh nhee erbee ta toilchin baase ny bondiaght.

³² Eisht dooyrt Agrippa rish Festus, Oddagh feaysley ve ec y dooinney shoh, er-be dy vel eh er scughey yn chooish gys Cesar.