Jannoo 21 - Yn Vible Casherick 1775 1819

CAB. XXI

¹ As haink eh gy-kione, tra va shin er gheddyn voue, as er n’ghoaill lhuingys, dy daink shin lesh coorse jeeragh gys Coos, as yn laa er-giyn gys Rhodes, as veih shen gys Patara.

² As feddyn lhong ayns shen ry-hoi shiaulley gys Phenicia, hie shin er-board, as hiauill shin roïn.

³ Nish tra chronnee shin Cyprus, daag shin eh er y laue chiare, as hiauill shin gys Syria, as haink shin er thalloo ec Tyre: son ayns shen va’n lhong dy chur magh e lught.

⁴ As son dy dooar shin Creesteenyn ayns shen, duirree shin mâroo shiaght laa: as choyrlee ad Paul trooid y Spyrryd, gyn eh dy gholl seose gys Jerusalem.

⁵ As tra va ny laghyn ec kione, jimmee shin roïn, as hie shin er nyn raad; as hie ad ooilley magh mârin dy chur shin er nyn doshiaght er nyn yurnah, mârish mraane as cloan, derrey va shin mooie ass y valley: as ghlioon shin sheese er y traie, as ghow shin padjer.

⁶ As tra va shin er ghoaill nyn gied jeh cheilley, ghow shin lhuingys; as hyndaa adsyn thie reesht.

⁷ As tra va shin er roie nyn goorse veih Tyre, haink shin gys Ptolemais, as vannee shin da ny braaraghyn, as duirree shin mâroo un laa.

⁸ As yn nah laa, jimmee shinyn va jeh sheshaght Phaul roïn, as haink shin gys Cesarea; as hie shin stiagh ayns thie Philip yn sushtallagh (va fer jeh’n chiaght) as duirree shin mârish.

⁹ As va kiare inneenyn ec y dooinney cheddin, moidynyn, va jannoo phadeyrys.

¹⁰ As duirree shin ayns shen ymmodee laghyn, as haink neose veih Judea, phadeyr dy row enmyssit Agabus.

¹¹ As tra v’eh er jeet hooin, ghow eh cryss Phaul, as chiangle eh e laueyn as e chassyn hene, as dooyrt eh, Shoh myr ta’n Spyrryd Noo gra, Er yn aght cheddin nee ny Hewnyn ec Jerusalem kiangley yn dooinney s’liesh yn cryss shoh, as eh y livrey gys laueyn ny Hashoonee.

¹² As tra cheayll shin shoh, ghuee chammah shinyn as adsyn jeh’n ynnyd shen er, gyn eh dy gholl seose gys Jerusalem.

¹³ Eisht dreggyr Paul, Cre shoh ta shiu jannoo, dy cheayney as brishey my chree? son ta mee aarloo, cha nee ynrycan dy ve er my choyrt ayns geulaghyn, agh eer dy hurranse baase ec Jerusalem er graih ennym y Chiarn Yeesey.

¹⁴ As tra nagh beagh eh coyrlit, scuirr shin, gra, Aigney yn Chiarn dy row jeant.

¹⁵ As lurg ny laghyn shen, kiartaghey shin hene son y jurnah, hie shin seose gys Jerusalem.

¹⁶ Hie mârin myrgeddin paart jeh Creesteenyn Cesarea, as hug ad lhieu shin gys dooinney enmyssit Mnason, veih Cyprus, shenn Chreestee, mârishyn va shin dy ghoaill aaght.

¹⁷ As tra va shin er jeet gys Jerusalem, hug ny braaraghyn oltaghey-bea gennal dooin.

¹⁸ As yn laa er-giyn hie Paul stiagh mârin gys Jamys; as va ooilley yn chanstyr kionfenish.

¹⁹ As tra v’eh er vannaghey daue, hoilshee eh daue ayns coorse ny reddyn va Jee er n’obbraghey mastey ny Ashoonee liorish y chirveish echeysyn.

²⁰ As tra cheayll ad shen, ren ad y Chiarn y ghloyraghey, as dooyrt ad rish, T’ou fakin, vraar, cre whilleen thousane jeh ny Hewnyn t’er ghoaill yn credjue orroo; as ta graih jeean oc ooilley son y leigh.

²¹ As t’ad er chlashtyn jeed’s, dy vel oo gynsaghey ooilley ny Hewnyn, ta mastey ny Ashoonee, dy hreigeil Moses, gra, Nagh lhisagh ad nyn gloan y ghiarey-chymmylt, ny gimmeeaght lurg ny oardaghyn.

²² Cre te eisht, agh dy jig y pobble cooidjagh? son cluinnee ad dy vel oo er jeet.

²³ Jean eisht shoh ta shin dy ghra rhyt: ta kiare deiney ain ta fo breearrey;

²⁴ Gow ad shoh, as bee er dty ghlenney as ec cost mâroo, dy vod ad nyn ghing y shaval: as dy vod fys y ve ec dy chooilley unnane, nagh vel nhee erbee ayns ny cheayll ad jeed’s, agh dy vel oo hene freayll ny oardaghyn, ayns biallys da’n leigh.

²⁵ As mychione ny Ashoonee t’er chredjal, ta shin er scrieu as er vriwnys, gyn ad dy eiyrt er ny cliaghtaghyn cheddin, agh ynrycan ad dy reayll ad-hene veih reddyn va chebbit gys jallooyn, as veih fuill, as veih reddyn toghtit, as veih maarderys.

²⁶ Eisht ghow Paul ny deiney, as yn nah laa ghlen eh eh-hene mâroo, as hie eh stiagh ayns y chiamble, dy hoilshaghey, dy row ad mysh cooilleeney laghyn y ghlenney, derrey veagh oural er ny hebbal son dagh unnane jeu.

²⁷ As tra va ny shiaght laa faggys ec kione, ghreinnee ny Hewnyn va veih Asia ooilley yn pobble, tra honnick ad eh ayns y chiamble, as ghreimm ad eh,

²⁸ Geamagh, Gheiney Israel, cooin-jee lhien: shoh’n dooinney ta gynsaghey dy chooilley ghooinney, ayns dy chooilley ynnyd noi yn pobble, as y leigh, as y boayl shoh; as ny sodjey na shen, t’eh er chur lesh Ashoonee stiagh ayns y chiamble, as er vee-ooashlaghey yn ynnyd casherick shoh.

²⁹ (Son v’ad roïe er vakin mârish ayns yn ard-valley, Trophimus, Ephesian, as heill ad dy row Paul er chur lesh eh stiagh ayns y chiamble).

³⁰ As va ooilley yn ard-valley ayns anvea, as roie yn pobble dy cheilley: as ghow ad Paul, as hayrn ad eh magh ass y chiamble; as chelleeragh va ny dorryssyn dooint.

³¹ As myr v’ad aarloo dy chur dy baase eh, haink skeeal gys ard-chaptan y cheshaght, dy row ooilley Jerusalem bun-ry-skyn.

³² As er-y-chooyl ghow eh sidooryn as captanyn-keead, as roie eh sheese huc: as tra honnick ad yn ard-chaptan as ny sidooryn, scuirr ad dy woalley Paul.

³³ Eisht haink yn ard-chaptan er-gerrey, as ghow eh eh, as doardee eh eh dy ve kianlt lesh daa gheuley; as dênee eh quoi v’eh hene, as cre v’eh er n’yannoo.

³⁴ As deïe paart un red, as paart red elley mastey yn pobble: as tra nagh dod eh shickyrys y gheddyn kyndagh rish y voirraneys, doardee eh eh dy ve er ny chur ’sy chashtal.

³⁵ As tra v’eh er ny greeshyn, shen myr ve, dy hrog ny sidooryn lhieu eh, kyndagh rish chennid y phobble.

³⁶ Son deiyr yn slane chaglym jeh’n pobble geiyrt er, gyllagh, Ersooyl lesh.

³⁷ As myr va Paul goll stiagh ayns y chashtal, dooyrt eh rish yn ard-chaptan, Voym kied loayrt rhyt? Dooyrt eshyn, Vod oo Greek y loayrt?

³⁸ Nagh nee uss yn Egyptian shen, ren roish ny laghyn shoh irree-magh y yannoo, as leeid magh gys yn aasagh kiare thousane dooinney, va nyn ghunveryn?

³⁹ Agh dooyrt Paul, Ta mish my ghooinney ta my Hew, veih Tarsus, ard-valley ayns Cilicia, my chummaltagh dy ard-valley ooasle; as ta mee guee ort kied y chur dou loayrt rish y pobble.

⁴⁰ As tra v’eh er chur kied da, hass Paul er ny greeshyn, as chrie eh e laue er y pobble: as tra v’ad ooilley-cooidjagh nyn dhost, loayr eh roo ayns glare ny Hebrewyn, gra,