Jannoo 2 - Yn Vible Casherick 1775 1819

CAB. II

¹ As tra va laa ny Kingeesh er jeet, v’ad ooilley lesh un aigney ’syn un voayl.

² As haink doaltattym veih niau feiyr myr dy gheay heidee lajer, as lhieen eh ooilley yn thie raad v’ad nyn soie.

³ As honnick ad chengaghyn skeilt, myr aile, as hoie eh er dagh unnane oc.

⁴ As v’ad ooilley lhieent lesh y Spyrryd Noo, as ren ad toshiaght dy loayrt lesh chengaghyn noa, myr va’n Spyrryd cur bree loayrtys ayndoo.

⁵ As va cummal ec Jerusalem, Hewnyn, deiney crauee, veih dagh ashoon er feaï-ny-cruinney.

⁶ Nish tra hie yn skeeal jeh shoh magh, haink y pobble cooidjagh, as v’ad fo atchim erskyn-towse, er-yn-oyr dy row dy chooilley ghooinney clashtyn ad loayrt ayns glare e ghooie hene.

⁷ As s’mooar yn aggle as yn yindys v’orroo ooilley, gra yn derrey yeh rish y jeh elley, Cur-my-ner, nagh vel ad shoh ooilley ta loayrt nyn Ghalileanee?

⁸ As kys dy vel shin clashtyn dy chooilley ghooinney loayrt ayns chengey ny mayrey ain hene?

⁹ Parthianee, as Medeyn, as Elamiteyn, as cummaltee Vesopotamia, as Judea, as Cappadocia, Pontus as Asia,

¹⁰ Phrygia as Pamphylia ayns Egypt, as ardjyn Lybia mygeayrt Cyrene, as joarreeyn veih yn Raue, Hewnyn as proselyteyn,

¹¹ Creteyn as Arabianee, ta shin clashtyn ad loayrt ayns ny chengaghyn ain hene, obbraghyn yindyssagh Yee.

¹² As v’ad ooilley fo atchim as imnea, gra yn derrey yeh rish y jeh elley, Cre s’erree da shoh?

¹³ Agh va feallagh elley gannidys, as gra, Ta ny deiney shoh lane dy feeyn noa.

¹⁴ Agh hass Peddyr seose marish yn un ostyl yeig, as troggal seose e choraa dooyrt eh roo, Gheiney Yudea, as ooilley shiuish chummaltee Yerusalem, gow-jee toiggal jeh shoh, as cur-jee tastey vie da my ghoan.

¹⁵ Son cha vel ad shoh er-meshtey, myr ta shiuish dy heiltyn, fakin nagh vel eh agh yn trass oor jeh’n laa.

¹⁶ Agh she shoh shen ny va loayrit jeh liorish y phadeyr Joel,

¹⁷ As hig eh gy-kione ayns ny laghyn jerrinagh (ta Jee gra) dy deayrt-yms magh jeh my Spyrryd er dy chooilley eill: as nee ny mec as ny inneenyn eu phadeyrys, as nee ny deiney aegey eu ashlishyn y akin, as ny shenn gheiney eu dreamallyn y ghreamal:

¹⁸ As er my ir-vooinjerey, as er my inneenyn deayrt-ym magh ayns ny laghyn shen jeh my Spyrryd, as nee ad phadeyrys:

¹⁹ As soilshee-ym yindyssyn ayns yn aer heose, as cowraghyn er y thalloo wass; fuill as aile, as torcan dy yaagh.

²⁰ Bee yn ghrian er ny hyndaa gys dorraghys, as yn eayst gys fuill, roish my jig laa mooar as cronnal y Chiarn.

²¹ As hig eh gy-kione, quoi-erbee eïe-ys er ennym y Chiarn, dy bee eh er ny hauail.

²² Gheiney Israel, eaisht-jee rish ny goan shoh; Yeesey dy Nazareth, dooinney ren Jee soiaghey jeh nyn mast’ eu, liorish mirrilyn, as yindyssyn as cowraghyn, dobbree Jee liorishyn ayns yn enish eu, myr s’mie fys myrgeddin eu hene:

²³ Eshyn va currit diu liorish oardagh ro-laue as fysseree Yee, ta shiuish er ghoaill, as lesh laueyn mee-chrauee er chrossey as er varroo.

²⁴ Eshyn ta Jee er hroggal seose reesht veih ny merriu, liorish feaysley geulaghyn e vaaish: son nagh row eh ayns pooar y vaaish dy chummal fo eh.

²⁵ Son ta David loayrt jeh, gra, Ta mee er hoiaghey Jee kinjagh kiongoyrt rhym; son t’eh er my laue yesh dy my reayll veih tuittym.

²⁶ Shen-y-fa va boggey er my chree, as gennallys er my hengey: as ny sodjey foast, nee my chorp fea y ghoaill ayns treishteil.

²⁷ Er-y-fa nagh vaag oo my annym ayns stayd ny merriu, as nagh lhig oo da dty Er-casherick loauys y ennaghtyn.

²⁸ T’ou er hoilshaghey dooys raaidyn y vea; ta dty eddin er my lhieeney lesh gerjagh.

²⁹ Gheiney as vraaraghyn, lhig dou lesh nyn gied loayrt riu mychione yn patriarch David ta chammah marroo as oanluckit, as dy vel yn oaie echey ry-akin gys y laa t’ayn jiu.

³⁰ Shen-y-fa myr v’eh ny adeyr as fys echey dy row Jee er ghialdyn lesh breearrey da, jeh sluight e veeghyn, lurg yn dooghys foalley, dy droggagh eh seose Creest dy hoie er y stoyl-reeoil echeysyn:

³¹ Fakin shoh ro-laue, loayr eh jeh irree-seose-reesht Chreest, nagh row e annym faagit ayns yn oaie, as nagh row e eill dy akin loauys.

³² Shoh yn Yeesey cheddin ta Jee er hroggal seose, myr ta shinyn ooilley nyn veanishyn.

³³ Shen-y-fa myr t’eh er ny ghoaill seose liorish laue yesh Yee, as er gheddyn veih yn Ayr gialdyn yn Spyrryd Noo, t’eh er gheayrtey magh shoh ta shiuish nish fakin as clashtyn.

³⁴ Son cha vel David er gholl seose er ny niaughyn: agh t’eh hene gra, Dooyrt y Chiarn rish my Hiarn’s, Soie uss er my laue yesh,

³⁵ Derrey ver-ym dty noidyn son stoyl dty choshey.

³⁶ Shen-y-fa lhig da ooilley lught-thie Israel as fys y ve oc ayns shickyrys, dy vel Jee er n’yannoo Yeesey shen ta shiuish er chrossey, chammah Chiarn as Creest.

³⁷ Nish tra cheayll ad shoh, v’ad guint ayns nyn gree, as dooyrt ad rish Peddyr, as rish ny ostyllyn elley, Gheiney as vraaraghyn, cre bailliu shin dy yannoo?

³⁸ Eisht dooyrt Peddyr roo, Gow-jee arrys, as bee-jee er nyn mashtey dy chooilley unnane eu ayns ennym Yeesey Creest, son leih peccaghyn, as yiow shiu gioot y Spyrryd Noo.

³⁹ Son ta’n gialdyn diuish as da nyn gloan, as dauesyn ooilley ta foddey jeh, dy jarroo da whilleen as vees er nyn eam liorish nyn Jiarn Jee.

⁴⁰ As lesh ymmodee goan elley dymmyrk eh feanish as choyrlee eh, gra, Saue-jee shiu hene veih’n cheeloghe roonagh shoh.

⁴¹ Eisht v’adsyn ren dy arryltagh goaill-rish e ghoo er nyn mashtey: as y laa cheddin haink three thousaneyn dy leih stiagh gys y chredjue Creestee.

⁴² As ren ad tannaghtyn ayns ynsagh as sheshaght ny hostyllyn, as ayns brishey arran, as ayns padjeryn.

⁴³ As haink aggle er dy chooilley annym: as va ymmodee yindyssyn as cowraghyn jeant liorish ny ostyllyn.

⁴⁴ As va ooilley ny v’er jyndaa gys y chredjue taaghey ry-cheilley, as co-pharteeas oc ayns dy chooilley nhee.

⁴⁵ As chreck ad nyn gummallyn as nyn gooid, as rheynn ad er dy chooilley ghooinney rere nyn ymmyrch.

⁴⁶ As taaghey yn chiamble gagh laa lesh un aigney, as brishey arran ’sy thie ghow ad nyn meaghey lesh gennallys as feoiltys cree,

⁴⁷ Cur moylley da Jee, as ayns ard-ghoo rish ooilley yn pobble. As va’n Chiarn cur stiagh gys yn agglish gagh laa lheid as va shirrey son saualtys.