Jannoo 11 - Yn Vible Casherick 1775 1819

CAB. XI

¹ As cheayll ny ostyllyn as ny braaraghyn va ayns Judea, dy row ny Ashoonee er ghoaill rish goo Yee.

² As tra va Peddyr er jeet seose gys Jerusalem, hooar ny Hewnyn va er chredjal foill da,

³ Gra, Ren oo sheshaght rish deiney chymmyltagh, as ghow oo beaghey mâroo.

⁴ Agh hie Peddyr harrish y chooish veih’n toshiaght, soilshaghey daue dy chooilley nhee myr ve, gra,

⁵ Va mish ec padjer ayns ard-valley Joppa; as myr va mee my-neealloo, honnick mee ayns ashlish, saagh dy row cheet neose myr dy beagh eh brelleein vooar, lhiggit neose veih niau er ny kiare binn; as haink eh er-gerrey dou.

⁶ As tra va mee er yeeaghyn dy gyere er, as er ghoaill tastey, honnick mee beïyn kiare-chassagh y thallooin, as beïyn feïe, as cretooryn snauee, as eeanlee yn aer.

⁷ As cheayll mee coraa gra rhym, Irree, Pheddyr; marr as ee.

⁸ Agh dooyrt mish, Shen dy row foddey voym, Hiarn: son cha vel nhee erbee cadjin ny neu-ghlen rieau er gholl stiagh ayns my veeal.

⁹ Agh dreggyr y coraa mee reesht veih niau, Shen ta Jee er ghlenney, ny enmys uss cadjin.

¹⁰ As va shoh jeant three keayrtyn: as va ooilley tayrnit seose reesht gys niau.

¹¹ As cur-my-ner, er-y-chooyl, va three deiney hannah er jeet gys y thie raad va mee, er chaghteraght veih Cesarea hym’s.

¹² As doardee yn Spyrryd dou goll mâroo, fegooish mee-ourys erbee. As haink ny shey braaraghyn shoh ry-heshaght mârym, as hie shin stiagh ayns thie yn dooinney:

¹³ As hoilshee eh dooin, kys v’eh er vakin ainle ayns e hie, hass as dooyrt rish, Cur deiney gys Joppa dy eamagh er Simon ta sliennooit Peddyr:

¹⁴ Eh nee goan y hoilshaghey dhyt, lioroo bee oo hene as ooilley dty hie er nyn sauail.

¹⁵ As myr ghow mee toshiaght dy loayrt, huitt y Spyrryd Noo orroosyn, myr huitt eh orrinyn ec y toshiaght.

¹⁶ Eisht chooinee mee er goo yn Chiarn kys dooyrt eh, Ren Ean dy jarroo bashtey lesh ushtey; agh bee shiuish er nyn mashtey lesh y Spyrryd Noo.

¹⁷ Son wheesh eisht as dy row Jee er choyrt dauesyn yn un ghioot hug eh dooinyn v’er chredjal ayns y Chiarn Yeesey Creest, quoi va mish, dy shassin magh noi Jee?

¹⁸ Tra cheayll ad shoh, v’ad nyn dhost, as hug ad gloyr da Jee, gra, Eisht ta Jee da ny Ashoonee myrgeddin er ghialdyn arrys gys bea.

¹⁹ Nish va’n vooinjer v’er nyn skeayley magh, kyndagh rish y tranlaase va jeant er coontey Steaon er droailt choud as Phenice, as Cyprus, as Antioch, as cha ren ad yn goo y phreacheil da unnane erbee agh ynrycan da ny Hewnyn.

²⁰ As va paart jeu deiney veih Cyprus as Cyrene, as tra v’ad er jeet gys Antioch loayr ad rish ny Grecianee, preacheil yn Chiarn Yeesey.

²¹ As va laue yn Chiarn mâroo: as ren earroo mooar dy leih credjal as chyndaa gys y Chiarn.

²² Eisht haink naightyn jeh ny reddyn shoh gys clashtyn yn agglish va ec Jerusalem: as hug ad magh Barnabas dy gholl gys Antioch.

²³ As tra v’eh er jeet as er vakin grayse Yee, ghow eh boggey, as choyrlee eh ad ooilley, lesh slane cree ad dy lhiantyn gys y Chiarn.

²⁴ Son v’eh ny ghooinney mie, as lane jeh’n Spyrryd Noo, as jeh credjue; as ren ymmodee sleih chyndaa gys y Chiarn.

²⁵ Eisht jimmee Barnabas gys Tarsus dy hirrey Saul. As tra v’eh er gheddyn eh, hug eh lesh eh gys Antioch.

²⁶ As haink eh gy-kione, dy duirree ad choud as bleïn ayns shen ayns sheshaght ny hagglish, as dy dynsee ad ymmodee dy leih; as va ny credjuee enmyssit Creesteenyn hoshiaght ayns Antioch.

²⁷ As ayns ny laghyn shen haink phadeyryn veih Jerusalem gys Antioch.

²⁸ As hass seose fer jeu enmyssit Agabus, as hoilshee eh liorish y Spyrryd dy beagh genney vooar er feaï-ny-cruinney; shen haink myrgeddin gy-kione rish lhing Claudius Cesar.

²⁹ Eisht ghow ny Creesteenyn ayns laue, dy chooilley ghooinney gys rere e phooar, dy chur cooney gys ny braaraghyn va baghey ayns Judea.

³⁰ As shen myr ren ad neesht, as hug ad eh gys y chanstyr liorish laueyn Barnabas as Saul.