Jamys 3 - Yn Vible Casherick 1775 1819

CAB. III

¹ My vraaraghyn, ny shir-jee dy ve ymmodee fir-ynsee, toiggal [liorish shoh] dy bee mayd ny s’gyere er nyn mriwnys.

² Son ayns ymmodee reddyn ta shin ooilley foiljagh. My ta dooinney erbee nagh vel foiljagh ayns e ghlare, ta’n fer cheddin ny ghooinney ynrick, as abyl myrgeddin dy reayll yn slane corp fo smaght.

³ Cur-my-ner ta shin coyrt streeanyn ayns beïll ny cabbil, dy bee ad beasagh dooin; as ta shin reill yn slane corp oc.

⁴ Cur-jee my-ner neesht ny lhongyn, ga dy vel ad wheesh, as er ny imman lesh geayghyn niartal, foast t’ad er ny hyndaa mygeayrt lesh stiurey beg fardalagh, raad saillish yn mainshter.

⁵ Myr shen ta’n chengey ny olt beg, as boggyssagh reddyn mooarey. Cur-my-ner, cre’n lossey mooar ta drillin dy aile foaddey!

⁶ As ta’n chengey ny aile, seihll dy vee-chairys: myr shen ta’n chengey mastey ny oltyn ain, dy vel ee mhilley yn slane corp, as cur yn seihll bun-ry-skyn; as t’ee soit er aile liorish niurin.

⁷ Son ta dy chooilley ghooghys dy veïyn, as dy eeanlee, as dy ard-nieughyn, as reddyn ayns yn aarkey, er ny veenaghey, as er ny ve jeant meen liorish deiney:

⁸ Agh y chengey cha vod dooinney erbee y smaghtaghey; t’ee olk mee-reiltagh, lane dy physhoon baasoil.

⁹ Lesh ta shin bannaghey Jee, dy jarroo yn Ayr; as lesh ta shin gweeaghyn da deiney, ta jeant lurg caslys Yee.

¹⁰ Ass yn un veeal ta cheet bannaght as mollaght. My vraaraghyn, cha lhisagh ny reddyn shoh ve myr shen.

¹¹ Vel farrane cur magh ass yn un gheill ushtey millish as sharroo?

¹² Vod y billey-figgagh, my vraaraghyn, gymmyrkey berrishyn-olive? ny billey-feeyney figgyn? myr shen cha vod farrane erbee cur magh ushtey sailjey as oor?

¹³ Quoi ta ny ghooinney creeney as tushtagh ny mast’ eu? lhig da soilshaghey, liorish ymmyrkey mie, e obbraghyn ayns y veenid dy chreenaght.

¹⁴ Agh my ta eu myskid sharroo as streeu ayns nyn greeaghyn, ny jean-jee boggyssagh, as ny jean-jee breg noi’n irriney.

¹⁵ Cha vel y chreenaght shoh cheet neose veih’n yrjey, agh te thallooinagh, beishtagh, niurinagh.

¹⁶ Son raad ta troo as streeu, ayns shen ta anvea, as dy chooilley ghrogh obbyr.

¹⁷ Agh y chreenaght ta veih’n yrjey t’ee hoshiaght glen, eisht sheeoil, meen, as aashagh dy ve coyrlit, lane dy erreeish as dy vessyn mie, fegooish neu-chorrymid, as fegooish craueeaght-oalsey.

¹⁸ As ta’n mess dy ynrickys er ny chuirr ayns shee dauesyn ta cur rish shee.