Jamys 2 - Yn Vible Casherick 1775 1819

CAB. II

¹ My vraaraghyn, ny lhig da credjue nyn Jiarn gloyroil Yeesey Creest ve eu, jannoo soiagh jeh persoonyn deiney.

² Son my ta cheet stiagh ’sy whaiyl eu dooinney lesh fainey airh, ayns coamrey seyr, as dy jig stiagh myrgeddin dooinney boght ayns drogh choamrey;

³ As dy vel shiu goaill tastey jehsyn ta ceau yn coamrey mie, as gra rish, Soie uss ayns shoh ayns ynnyd ooasle; as gra rish y voght, Shass uss ayns shid, ny, soie ayns shoh fo stoyl my choshey:

⁴ Cha vel shiu eisht jannoo briwnys kiart nyn mast’ eu hene, agh jannoo shiu hene briwnyn neu-chorrym.

⁵ Toig-jee, my vraaraghyn ghraihagh, Nagh vel Jee er reih boghtyn y theihll shoh, berchagh ayns credjue, as eiraghyn y reeriaght t’eh er ghialdyn dauesyn ta graihagh er?

⁶ Agh ta shiuish er hoiaghey beg jeh ny boghtyn. Nagh vel ny berchee jannoo tranlaase erriu, as tayrn shiu fenish stuill-vriwnys?

⁷ Nagh vel ad goltooan yn ennym ooasle shen ta enmyssit erriu?

⁸ My ta shiu cooilleeney yn leigh reeoil, cordail rish y scriptyr, Ver oo graih da dty naboo myr dhyt hene, ta shiu jannoo dy mie.

⁹ Agh my ta shiu jannoo soiagh jeh persoonyn, ta shiu jannoo peccah, as ta shiu deyrit liorish y leigh myr drogh-yantee.

¹⁰ Son quoi-erbee nee freayll yn slane leigh, as ny-yeih ta foiljagh ayns un phoint, t’eh kyndagh jeu ooilley.

¹¹ Son eshyn dooyrt, Ny jean poosey vrishey; dooyrt myrgeddin, Ny jean dunverys. Nish ga nagh vel oo brishey poosey, ny-yeih my t’ou dunverys, t’ou brishey’n leigh.

¹² Myr shen loayr-jee, as myr shen jean-jee, myr adsyn vees er nyn mriwnys liorish y leigh dy reamys [Creestee].

¹³ Son yiow eshyn briwnys dyn myghin, nagh vel er hoilshaghey myghin; as ta myghin boggyssagh harrish briwnys.

¹⁴ Cre sheeagh eh, my vraaraghyn, da dooinney dy ghra dy vel credjue echey, as nagh vel obbraghyn echey? vod credjue y hauail eh?

¹⁵ My ta braar ny shuyr rooisht, ny feme beaghey gagh-laa;

¹⁶ As unnane eu dy ghra roo, Immee-jee reue ayns shee, dy row fastee as beaghey eu: as nagh vel shiu coyrt daue ny reddyn shen ta ymmyrchagh da’n chorp; cre-woad share ad?

¹⁷ Eer myr shen credjue, mannagh vel obbraghyn goll mârish, te dyn vree ny-lomarcan.

¹⁸ Agh foddee fer gra, Ta credjue ayd’s, as ta obbraghyn aym’s: jeeagh dooys yn credjue ayd’s fegooish dty obbraghyn, as jeeagh-yms dhyt’s yn credjue aym’s liorish my obbraghyn.

¹⁹ T’ou credjal dy vel un Jee ayn; t’ou jannoo dy mie: ta ny drogh-spyrrydyn hene credjal, as er-creau.

²⁰ Agh nailt fys ’ve ayd, O ghooinney ardalagh, dy vel credjue fegooish obbraghyn marroo?

²¹ Nagh row Abraham nyn ayr er ny heyrey liorish obbraghyn, tra v’eh er n’ouralley e vac Isaac er yn altar?

²² Nagh vaik oo kys ren credjue niartaghey lesh e obbraghyn, as liorish obbraghyn va slane mullagh er credjue?

²³ As va’n scriptyr er ny chooilleeney ta gra, Chred Abraham Jee, as ve coontit da son cairys: as v’eh enmyssit carrey Yee.

²⁴ Hee shiu eisht kys dy nee liorish obbraghyn ta dooinney er ny heyrey, as cha nee liorish credjue ny-lomarcan.

²⁵ Myrgeddin neesht, nagh row Rahab yn ven-oast er ny heyrey liorish obbraghyn, tra v’ee er n’ghoaill stiagh ny chaghteryn, as er choyrt magh ad raad elley?

²⁶ Son myr ta’n corp fegooish y spyrryd marroo, myr shen ta credjue fegooish obbraghyn marroo myrgeddin.