Jamys 1 - Yn Vible Casherick 1775 1819

CAB. I

¹ Jamys sharvaant Yee as nyn Jiarn Yeesey Creest, gys y daa heeloghe jeig ta skeaylt fud y theihll, bea as slaynt.

² My vraaraghyn, jeeagh-jee er myr oyr dy ard-voggey tra huittys shiu ayns caghlaaghyn dy heaghyn;

³ Toiggal shoh, dy vel prowal nyn gredjue gobbraghey meenid.

⁴ Agh cur-jee slane raad da meenid dy yannoo e obbyr hene, dy vod shiu ve slane ynrick, gyn ve ergooyl ayns nhee erbee.

⁵ My ta veg euish feme creenaght, lhig da geearree er Jee, ta coyrt dy feoilt da dy chooilley ghooinney, as nagh vel mooaraghey, as bee eh er ny choyrt da.

⁶ Agh lhig da geearree ayns credjue, fegooish leaystey; son t’eshyn ta leaystey [’sy chredjue] goll-rish tonn ny marrey, immanit lesh y gheay noon as noal.

⁷ Son ny lhig da’n dooinney shen smooinaghtyn dy vow eh nhee erbee veih’n Chiarn.

⁸ Ta dooinney dy aigney ghooble neu-hickyr ayns ooilley e raaidyn.

⁹ Lhig da’n braar jeh stayd injil goaill boggey ayns dy vel eh er ny hroggal seose;

¹⁰ Agh y verchagh ayns dy vel eh er ny injillaghey; son myr blaa yn aiyr nee eh lheïe ersooyl.

¹¹ Son cha vel y ghrian ny sleaie er n’irree lesh chiass loshtee, agh t’ee fioghey yn faiyr, as ta’n blaa echey tuittym, as aalid yn chummey echey goll naardey: myr shen myrgeddin nee yn dooinney berchagh shymley ersooyl ayns e raaidyn.

¹² S’maynrey yn dooinney ta gymmyrkey fo seaghyn; son tra vees eh er ny phrowal, yiow eh yn attey dy vea, ta’n Chiarn er ghialdyn dauesyn ta graihagh er.

¹³ Ny lhig da dooinney erbee gra tra t’eh er ny violaghey, Ta mee miolit liorish Jee: son ta Jee erskyn miolagh gys olk, chamoo t’eh miolaghey dooinney erbee.

¹⁴ Agh ta dagh dooinney miolit, tra t’eh er ny hayrn ersooyl liorish e haynt hene, as cleaynit.

¹⁵ Eisht tra ta saynt er ghientyn, t’eh gymmyrkey magh peccah: as ta peccah, tra te cooilleenit, gymmyrkey magh baase.

¹⁶ Ny bee-jee mollit, my chaarjyn ghraihagh.

¹⁷ Ta dy chooilley ghioot mie, as dy chooilley ghioot firrinagh veih’n yrjey, as cheet neose veih Ayr y toilshey, mârish nagh vel caghlaa erbee, ny scadoo dy hyndaa.

¹⁸ Jeh e aigney hene ren eh shinyn y gheddyn, liorish goo ny firrinys, dy voddagh shin ve myr ny chied-vessyn jeh e chretooryn.

¹⁹ Shen-y-fa, my vraaraghyn ghraihagh, lhig da dy chooilley ghooinney ve arryltagh dy chlashtyn, liastey dy loayrt, moal gys corree:

²⁰ Son cha vel corree dooinney gobbraghey cairys Yee.

²¹ Shen-y-fa cur-jee dy lhiattee dy chooilley neu-ghlennid, as rouyr dy olkys, as gow-jee lesh meenid yn goo ta fraueit ayndiu, ta fondagh dy hauail nyn anmeenyn.

²² Agh bee-jee shiuish jeantee jeh’n goo, as cha nee ny-lomarcan clashtyn rish, molley shiu hene.

²³ Son my ta fer erbee ta clashtyn y goo, as gyn dy yannoo eh, t’eh casley rish dooinney cur-my-ner yn eddin dooghyssagh echey ayns gless.

²⁴ Son yeeagh eh er hene, as hie eh roish, as chelleeragh yarrood eh cre’n keint dy ghooinney v’eh.

²⁵ Agh quoi-erbee ta jeeaghyn dy dowin ayns leigh yn seyrsnys firrinagh, as tannaghtyn ayn; nagh vel jarrood ny t’eh dy chlashtyn, agh fer ta jannoo yn obbyr, bee’n dooinney shoh bannit ayns e yannoo.

²⁶ My ta dooinney erbee nyn mast’ eu ta ayns fakin dy ve crauee, as nagh vel smaghtaghey e hengey, agh molley yn cree echey hene, ta craueeaght yn dooinney shoh fardail.

²⁷ Craueeaght firrinagh as glen kiongoyrt rish Jee, dy jarroo yn Ayr, shoh eh, Dy ghoaill kiarail jeh cloan gyn ayr as mraane-treoghe ayns nyn seaghyn, as dy reayll eh hene glen veih broïd y theihll.