Isaiah 65 - Yn Vible Casherick 1775 1819

CAB. LXV

¹ Ta mee er my hoilshaghey dauesyn nagh row dy my hirrey; ta mee er my gheddyn magh lioroosyn nagh ren briaght my yeï: dooyrt mee, Cur-jee my-ner, cur-jee my-ner, rish ashoon nagh row enmyssit orrym.

² Ta mee er heeyney magh my laueyn fey-ny-laa gys pobble mee-viallagh, ta gimmeeaght ayns raad nagh row mie, lurg ny smooinaghtyn oc hene;

³ Pobble ta dy my vrasnaghey gys corree dy kinjagh gys my eddin; ta ouralley gys nyn yallooyn ayns ny garaghyn, as lostey incense er altaryn dy vreek;

⁴ Ta tannaghtyn fud ny oaiaghyn, as taaghey lhiaghtyn ny merriu; ta gee feill vee-lowit; as ta an-vroie cretooryn dwoaiagh ayns ny siyn oc;

⁵ Ta gra, Shass ort hene, ny tar my choair; son ta mee ny s’casherick na uss. T’ad shoh myr jaagh my eulys, aile ta lostey fey-ny-laa.

⁶ Cur-my-ner, te scruit kiongoyrt rhym; cha bee’m my host, agh goym cooilleeney, eer slane cooilleeney ayns nyn oghrish,

⁷ Yn vee-chairys eu hene, ta’n Chiarn dy ghra, as mee-chairys nyn ayraghyn ry-cheilley, t’er lostey incense er ny sleityn, as er loayrt goan mollaghtagh m’oï er ny croink: shen-y-fa ver-yms daue slane towse nyn shenn obbraghyn ayns nyn oghrish.

⁸ Shoh myr ta’n Chiarn dy ghra, Myr ta’n feeyn noa er ny gheddyn ’sy dhossan, as jir fer, Ny stroie eh; son ta bannaght ayn: myr shen neem’s er graih my harvaantyn, nagh stroie-ym ad ooilley.

⁹ As ver-ym lhiam sluight magh ass Jacob, as magh ass Judah eirey ny sleityn aym’s: shoh vees eiraght my vooinjer reiht, as nee my harvaantyn cummal ayns shen.

¹⁰ As bee Sharon bwoaillee dy hioltaneyn, as coan Achor ynnyd da ny shellooyn dy ghoaill nyn aash ayn, ec my phobble t’er vriaght my yeï.

¹¹ Agh shiuish adsyn ta treigeil y Chiarn, ta jarrood my lieau’s casherick, ta gaarlagh boayrd da’n cheshaght shen, as jannoo magh oural-feeyney da’n earroo shen.

¹² Shen-y-fa neem’s shiuish y earroo gys y chliwe, as nee shiu ooilley croymmey gys y toyrt-mow: son tra deïe mee, cha ren shiu freggyrt; tra loayr mee, cha ren shiu clashtyn; agh ren shiu olk roish my hooillyn, as ghow shiu myr reih shen nagh by-haittin lhiam.

¹³ Shen-y-fa shoh myr ta’n Chiarn dy ghra, Cur-my-ner, nee my harvaantyn gee, agh bee shiuish accryssagh: cur-my-ner, nee my harvaantyn giu, agh bee shiuish paagh: cur-my-ner, nee my harvaantyn goaill boggey, agh bee shiuish fo nearey:

¹⁴ Cur-my-ner, gowee my harvaantyn arrane son boggey nyn gree, agh nee shiuish coe son trimshey nyn gree, as dobberan son sproght nyn spyrryd.

¹⁵ As faagee shiu nyn ennym son mollaght da my vooinjer reiht: son nee yn Chiarn uss y stroie, as cowree eh e harvaantyn liorish ennym elley:

¹⁶ Dy jean eshyn ta bannaghey eh-hene er y thalloo, eh-hene y vannaghey ayns Jee yn ynrickys; as eshyn ta loo er y thalloo, nee eh loo liorish Jee yn ynrickys; er-yn-oyr dy vel yn chenn seaghyn jarroodit, as dy vel ad keillit veih my hooillyn.

¹⁷ Son cur-my-ner, ta mee croo niaughyn noa, as thalloo noa: cha bee cooinaghtyn er yn seihll va roïe, as cha jig eh ayns my aigney.

¹⁸ Agh bee shiuish gennal as gow-jee boggey son dy bragh ayns shen ta mee dy chroo: son cur-my-ner, ta mee croo Jerusalem ny voayl eunyssagh, as yn pobble eck boggey.

¹⁹ As goyms boggey ayns Jerusalem, as bee’m jeh gien mie ayns my phobble: as cha bee yn coraa dy hrimshey ny-sodjey er ny chlashtyn aynjee, ny’n coraa dy ghobberan.

²⁰ Cha bee maghey shen oikan dy laghyn, ny shenn ghooinney nagh vel er n’yannoo magh laghyn e vea: son yiow yn lhiannoo baase ec keead bleïn dy eash; agh bee yn drogh-yantagh jeh keead bleïn er ny gheyrey.

²¹ As troggee ad thieyn, as cummee ad ayndoo; as nee ad soiaghey garaghyn, as gee jeh’n vess oc.

²² Cha jean adsyn troggal, as fer elley cummal ayn; cha jean ad soiaghey, as fer elley gee jeh: son myr laghyn billey ta laghyn my phobble, as yiow my chloan reiht soylley beayn jeh obbyr nyn laueyn.

²³ Cha jean ad laboragh ayns fardail, ny cur son y theihll lesh arkys: son t’ad sluight pobble bannee yn Chiarn, as cloan nyn glienney mâroo.

²⁴ As hig eh gy-kione, roish my jean adsyn geamagh, dy jean-yms freggyrt; as choud as t’ad foast loayrt, neem’s clashtyn.

²⁵ Nee yn moddey-oaldey as yn eayn gyndyr cooidjagh, as nee yn lion gee coonlagh myr dow: as joan vees beaghey yn ard-nieu. Cha jean ad skielley ny aggair ayns ooilley my lieau’s casherick, ta’n Chiarn dy ghra.