Isaiah 64 - Yn Vible Casherick 1775 1819

CAB. LXIV

¹ O dy jinnagh oo brishey sheese trooid ny niaughyn, dy darragh oo neose, as ny sleityn dy lheïe sheese ec dty enish;

² Myr tra ta’n aile lheïe as lostey, ta’n aile coyrt er ny ushtaghyn dy chloie; dy hoilshaghey dty ennym da dty noidyn, dy vod ny ashoonyn craa ec dty enish!

³ Tra ren uss reddyn atchimagh erskyn nyn yerkal, haink uss neose, lheïe ny sleityn sheese ec dty enish.

⁴ Son er-dyn toshiaght y theihll cha vel deiney er chlashtyn, ny er hoiggal liorish y chleaysh, chamoo ta sooill er vakin, er-lhimmey jeed’s, O Yee, cre t’eh er chiarail ny chour-syn ta farkiaght er.

⁵ T’ou goll ny whail-syn ta goaill boggey as jannoo cairys; adsyn ta cooinaghtyn ort ayns dty raaidyn: cur-my-ner, t’ou uss jymmoosagh; son ta shin er n’yannoo peccah: ayndoosyn ta shin er hannaghtyn foddey, as bee mayd er nyn sauail.

⁶ Agh ta shin ooilley goll-rish red neu-ghlen, as ta ooilley yn ynrickys ain myr frytlagyn broghe; as ta shin ooilley fioghey myr duillag; as ta’n neu-chairys ain, myr y gheay, er heebey shin ersooyl.

⁷ As cha vel unnane ta geamagh er dty ennym, ta greinnaghey seose eh-hene dy ghoaill greme ort: son t’ou er n’ollaghey dty eddin voïn, as er choyrt naardey shin, kyndagh rish nyn mee-chairys.

⁸ Agh nish, O Hiarn, t’ou uss nyn Ayr: ta shinyn y chray, as uss yn Obbree, as ta shinyn ooilley obbyr dty laueyn.

⁹ Ny bee feer jymmoosagh, O Hiarn, chamoo cooinee er y vee-chairys ain son dy bragh: cur-my-ner, jeeagh, ta shin guee ort, ta shin ooilley dty phobble.

¹⁰ Ta dty ard-valjyn casherick nyn vaasagh, ta Zion ny chaitnys, as Jerusalem ny hraartys.

¹¹ Ta’n thie aalin as casherick ain, raad hug nyn ayraghyn moylley dhyt’s, losht lesh aile: as ta ooilley ny nheeghyn eunyssagh ain er nyn goyrt naardey.

¹² Jean uss oo hene y reayll voïn son ny reddyn shoh, O Hiarn? bee oo dty host, as shin y heaghney dy feer trome?