Isaiah 63 - Yn Vible Casherick 1775 1819

CAB. LXIII

¹ Quoi shoh ta cheet veih Edom, ayns garmadyn gorrym-jiarg veih Bozrah? eh shoh ta gloyroil ayns e choamrey, troailt ayns troshid e niart? Mish eh, ta loayrt ayns ynrickys, niartal dy hauail.

² Cre’n-fa ta dty choamrey’s jiarg, as dty gharmadyn casley rishyn ta stampey ’sy doagh-feeyney?

³ Ta mee er stampey yn press-feeyney ny-lomarcan; as jeh’n pobble cha row fer jeu mârym: son nee’m stampey ad sheese ayns my chorree, as ver-ym ad fo-chosh ayns my eulys; as bee’n uill oc spreiht er my gharmadyn, as nee’m ooilley my choamrey y ghaahghey.

⁴ Son ta laa yn lhiasaghey ayns my chree, as ta’n vleïn dy livrey my phobble er jeet.

⁵ As yeeagh mee, as cha row fer erbee dy chooney lhiam; as ghow mee yindys nagh row fer erbee dy niartaghey lhiam: shen-y-fa hug my roih hene lesh livrey-ys hym; as ren my eulys hene niartaghey lhiam.

⁶ As neem’s y pobble y stampey sheese ayns my chorree, as nee’m ad er-meshtey ayns my eulys, as ver-ym lhiam sheese yn niart oc gys y thalloo.

⁷ Neem’s kenjallys-ghraihagh yn Chiarn y hoilshaghey magh, as moylley yn Chiarn, cordail rish ooilley ny ta’n Chiarn er stowal orrin, as y vieys vooar gys thie Israel, t’eh er yiootal orroo cordail rish e vyghinyn, as cordail rish ymmodee e chenjallys ghraihagh.

⁸ Son dooyrt eh, Shickyr she my phobble ad, cloan nagh jean breg: myr shen v’eshyn nyn Saualtagh.

⁹ Ayns yn seaghyn oc va eshyn seaghnit, as ren ainle yn enish echeysyn adsyn y hauail: ayns e ghraih as ayns e erreeish ren eh ad y livrey: as hrog eh ad, as ren eh ad y ymmyrkey ooilley laghyn y chenn earish.

¹⁰ Agh dirree ad magh n’oï, as vrasnee ad yn Spyrryd casherick echey: shen-y-fa v’eh er ny hyndaa dy ve nyn noid, as hass eh nyn ’oï.

¹¹ Eisht chooinee eh er laghyn y chenn earish, er Moses as e phobble, gra, Cre vel eshyn hug lesh ad seose ass yn aarkey liorish bochilley e hioltane? cre vel eshyn hug e Spyrryd casherick er cheu-sthie jeh?

¹² Ren ad y leeideil liorish laue yesh Voses lesh e roih gloyroil, scarrey ny ushtaghyn rhymboo, dy chosney da hene ennym dy bragh farraghtyn?

¹³ Ren adsyn y leeideil trooid y diunid, myr cabbyl ayns yn aasagh, nagh jinnagh ad snapperal?

¹⁴ Myr ta baagh goll sheese gys y choan, hug Spyrryd y Chiarn fea da; myr shen ren uss dty phobble y leeideil, dy yannoo dhyt hene ennym gloyroil.

¹⁵ Jeeagh neose veih niau, as cur-my-ner veih ynnyd dty chasherickys as dty ghloyr: cre vel dty ghraih’s jeean as dty niart, slane erreeish dty chree as dty vyghinyn? vel ad er nyn lhiettal voym?

¹⁶ Shickyr uss yn ayr ain, ga nagh vel toiggal ec Abraham j’in, as nagh vel Israel goaill rooin: uss, O Hiarn, nyn Ayr, nyn Saualtagh, ta dty ennym er-dy-rieau.

¹⁷ Cre’n-fa t’ou uss, O Hiarn, er lhiggey dooin goll er-shaghryn veih dty raaidyn, as er chreoghey nyn greeaghyn noi dty aggle? Chyndaa reesht er graih dty harvaantyn, sheelogheyn dty eiraght.

¹⁸ Cha row eh agh son traa giare eiraght dty phobble’s casherick: ta nyn noidyn er stampey sheese dty ynnyd casherick.

¹⁹ Lhiat’s ta shin: cha row adsyn rieau fo dty reill; cha row yn ennym ayd’s cowrit orroosyn.