Isaiah 60 - Yn Vible Casherick 1775 1819

CAB. LX

¹ Trog ort, jean soilshean; son ta dty hoilshey er jeet, as ta gloyr y Chiarn er n’irree ort.

² Son cur-my-ner, nee dorraghys coodaghey yn thalloo, as dullyr dowin y pobble: agh nee yn Chiarn soilshean ort, as bee e ghloyr er ny akin ort.

³ As hig ny ashoonee gys dty hoilshey, as reeaghyn gys sollyssid dty voghrey.

⁴ Trog seose dty hooillyn, as jeeagh mygeayrt-y-mood: t’ad ooilley chaglym ad-hene dy cheilley, t’ad chionney stiagh hood’s: hig dty vec veih foddey, as bee dty inneenyn er nyn moandyrys ry dty lhiattee.

⁵ Eisht ver oo my-ner, as nee shiu lhieeney stiagh myr thooilley, as nee dty chree roie harrish lesh atchim as boggey; er-yn-oyr dy bee sleih, myr roayrt ny marrey, er ny hyndaa hood’s, nee niart ny ashoonee cheet stiagh hood.

⁶ Nee camelyn erskyn earroo taaghey hood, dromedareeyn Vidian as Ephah; adsyn ooilley veih Sheba hig ad: ver ad lhieu airh as incense; as soilshee ad magh ard-voylley yn Chiarn.

⁷ Bee ooilley shioltaneyn Chedar er nyn jaglym cooidjagh hood’s, nee reaghyn Nebaioth shirveish ort: hig ad seose lesh oural-ooasle gys my altar, as nee’m gloyraghey thie my ghloyr.

⁸ Quoi ad shen ta getlagh myr bodjal, as myr ny calmaneyn gys nyn dhuill?

⁹ Son shickyrys nee ny ellanyn farkiaght er my hon, as lhongyn Tarshish hoshiaght, dy choyrt lhieu my vec veih foddey, nyn argid as nyn airh mâroo, gys ennym y Chiarn dty Yee, as gys Jee casherick Israel; er-yn-oyr dy vel eh er dty ghloyraghey.

¹⁰ As nee mec joarreeyn troggal ny voallaghyn ayd’s, as nee ny reeaghyn oc shirveish ort: son ayns my chorree ren mee oo y woalley, agh ayns my chenjallys ta mee er hoilshaghey myghin ort.

¹¹ Shen-y-fa bee ny giattyn ayd’s foshlit dy kinjagh: cha bee ad jeight laa ny oie; dy vod deiney cur lhieu stiagh hood’s troshid ny ashoonee, as nyn reeaghyn dy heet mâroo.

¹² Son yn ashoon as y reeriaght shen nagh jean shirveish ort, nee ad cherraghtyn; dy jarroo, bee ny ashoonyn shen dy slane bollagh er nyn stroie.

¹³ Hig gloyr Lebanon hood’s, yn billey-juys, yn billey-pine, as yn billey-vox dy cheilley, dy hoiaghey magh my ynnyd casherick; as nee’m ynnyd my choshey y yannoo gloyroil.

¹⁴ Ny mec ocsyn myrgeddin ren uss y heaghney hig ad croymmey sheese hood’s; as adsyn ooilley ren soiaghey beg jeed’s nee ad croymmey sheese ec boyn dty choshey; as nee ad uss y enmys, Ard-valley yn Chiarn, Zion Yee casherick Israel.

¹⁵ Son wheesh as dy r’ou treigit as dwoaiagh, myr shen nagh ren dooinney erbee dty haaghey, neem’s oo y yannoo dty vaynrys dy bragh farraghtyn, boggey ymmodee sheelogheyn.

¹⁶ Nee oo myrgeddin jiole bainney ny ashoonee, as bee oo er dty voandyrys ayns oghrish reeaghyn: as bee fys ayd’s dy nee mish y Chiarn dty Haualtagh as dty Eaysleyder, Jee niartal Yacob.

¹⁷ Son prash ver-ym lhiam airh, as son yiarn ver-ym lhiam argid, as son fuygh prash, as son claghyn yiarn: ver-ym harryd myrgeddin fir-oik sheeoil, as resowryn ynrick.

¹⁸ Cha bee tranlaase ny smoo er ny chlashtyn trooid dty heer, traartys ny treihys ayns dty ardjyn: agh nee oo genmys dty voallaghyn Saualtys, as dty yiattyn Moylley.

¹⁹ Cha bee yn ghrian ny smoo dty hoilshey ’sy laa, chamoo son ray-sollys bee yn eayst ayd son soilshey dhyt: agh bee yn Chiarn dhyt soilshey dy bragh farraghtyn, as bee dty Yee dty ghloyr;

²⁰ Cha jean dty ghrian ny smoo goll sheese; ny dty eayst baarney: son bee’n Chiarn dty hoilshey dy bragh farraghtyn, as bee laghyn dty ghobberan ec kione.

²¹ Bee dty phobble myrgeddin ooilley ynrick: bee yn cheer oc son eiraght beayn, banglane my hoiaghey, my obbyr-lauee hene, dy voddym’s v’er my ghloyraghey.

²² Hig yn fer fardalagh dy ve thousane, as yn fer faase dy ve ny ashoon niartal: neem’s yn Chiarn, shoh y chooilleeney dy leah ’syn imbagh cooie.