Isaiah 56 - Yn Vible Casherick 1775 1819

CAB. LVI

¹ Myr shoh ta’n Chiarn gra, Freill-jee briwnys, as eiyr-jee da cairys: son ta my haualtys er-gerrey dy laue, as my ynrickys dy ve er ny hoilshaghey.

² S’bannit y dooinney ta jannoo shoh, as mac y dooinney ta goaill greme er; ta freayll yn doonaght veih brishey eh, as freayll e laue veih jannoo aggair.

³ Chamoo lhig da mac y joarree, t’er hyndaa gys y Chiarn, gra, Ta’n Chiarn dy bollagh er scarrey mee veih e phobble: chamoo lhig da’n dooinney gennish gra, Cur-my-ner, ta mee my villey creen.

⁴ Son shoh ta’n Chiarn gra rish ny deiney gennish ta freayll my ghooneeyn, as reih ny reddyn shen ta dy my wooiys, as ta goaill greme er my chonaant;

⁵ Dy jarroo dauesyn ver-yms ayns my hie, as er cheu-sthie jeh my voallaghyn, ynnyd as ennym share na jeh mec as inneenyn: ver-yms daue ennym dy bragh farraghtyn, nagh bee er ny yiarey jeh.

⁶ Myrgeddin mec y joarree ta lhiantyn ad-hene gys y Chiarn, dy hirveish eh, as dy choyrt graih da ennym y Chiarn, dy ve e hirveishee, dagh unnane ta freayll yn doonaght veih brishey eh, as ta goaill greme er my chonaant;

⁷ Eer ad shen ver-ym lhiam gys my lieau casherick, as nee’m ad gerjoil ayns my hie dy phadjer; bee soiaghey jeant jeh ny ourallyn-losht as ny chebballyn oc er my altar: son bee my hie’s enmyssit thie dy phadjer son dy chooilley phobble.

⁸ Ta’n Chiarn Jee, ta chaglym cooidjagh eebyrtee Israel, gra, Foast chagl-yms t’ooilley huggey, mâroosyn ta hannah er jeet stiagh huggey.

⁹ Ooilley shiuish vaase y vagheragh, tar-jee dy stroie, dy jarroo, ooilley shiuish veiyn ny keylley.

¹⁰ Ta ny arreyderyn echey doal; t’ad ooilley mee-hushtagh, t’ad ooilley nyn moddee valloo, cha vod ad gounstyrnee, agh cadley, lhie sheese ayns trome-saveenys.

¹¹ Dy jarroo t’ad nyn moddee yollyssagh nagh vel dy bragh dy liooar oc; as t’ad nyn mochillyn gyn tushtey: t’ad ooilley geiyrt er nyn raaidyn hene, dagh unnane lurg e chosney hene veih dy chooilley ard.

¹² Tar-jee, as adsyn, ver-ym lhiam feeyn as lhieen mayd shin hene lesh jough lajer, as bee mairagh myr y laa jiu, as foddey s’rouanee.