Isaiah 48 - Yn Vible Casherick 1775 1819

CAB. XLVIII

¹ Clasht-jee nish rish shoh, O hie Yacob, ta ennym Israel cowrit erriu, as t’er jeet magh ass moir-ushtaghyn Yudah; ta breearrey liorish ennym y Chiarn, as gimraa mychione Jee Israel, agh cha nee ayns firrinys ny ayns ynrickys.

² Son t’ad genmys ad-hene lurg yn ard-valley casherick, as coyrt nyn marrant er Jee Israel; Chiarn ny flaunyssee e ennym.

³ Dockle mee magh ro-laue ny reddyn va jeant veih’n toshiaght; as hie ad magh ass my veeal, as hoilshee mee ad; chooilleen mee ad dy leah, as haink ad gy-kione.

⁴ Er-y-fa dy row fys aym’s dy vel oo roonagh, as ta dty wannal feh-yiarn, as dty vaaish prash;

⁵ Ta mee er n’insh dhyt eh ro-laue veih’n toshiaght; roish my daink eh gy-kione hoilshee mee dhyt eh: nagh beagh oyr ayd gra, She my yalloo t’er n’yannoo ad, she my yalloo grainnit, as my yalloo lheït, t’er harey ad.

⁶ T’ou er chlashtyn, cur-my-ner shoh ooilley; as nagh jean-jee soilshaghey eh? ta mee er yeeaghyn dhyt reddyn noa veih’n traa shoh, eer reddyn follit, as cha row toiggal ayd jeu.

⁷ T’ad nish er nyn groo, as cha nee veih’n toshiaght; dy jarroo roish y laa nagh geayll oo jeu; er-aggle dy niarragh oo, Cur-my-ner, va toiggal aym jeu.

⁸ Dy jarroo, cha ren oo clashtyn, chamoo ren oo toiggal; eer veih’n traa shen cha row dty chleaysh foshlit: son va fys aym’s dy jinnagh oo dellal dy feer volteyragh, as dy r’ou enmyssit dty ghrogh-yantagh veih’n vreïn.

⁹ Er graih my ennym nee’m my yymmoose y lhiettal, as er graih my voylley lhig-ym shaghey, nagh stroie-ym oo.

¹⁰ Cur-my-ner, ta mee er lheïe oo ’syn aile, agh cha nee myr argid; ta mee er dty phrowal ayns y choirrey dy heaghyn.

¹¹ Er my ghraih hene, eer er my ghraih hene, nee’m y yannoo eh: son cre’n-fa veagh my ennym er ny oltooaney? as cha der-yms my ghloyr hene da fer elley.

¹² Clasht rhym, O Yacob as Israel, ta enmyssit orrym; she mish eh, mish yn chied er, as myrgeddin mish y fer s’jerree.

¹³ Ta my laue myrgeddin er hoiaghey undin y thallooin, as ta my laue yesh er skeayley magh ny niaughyn: tra ta mee geamagh orroo, t’ad shassoo seose dy cheilley.

¹⁴ Ooilley shiuish, chaggle-jee shiu hene cooidjagh, as clasht-jee: quoi eh ny mast’ oc t’er hoilshaghey ny reddyn shoh? Ta’n Chiarn er ve graihagh er: cooilleenee eh e aigney er Babylon, as bee e roih trome er ny Caldeanee.

¹⁵ Mish, dy jarroo mish, t’er loayrt; dy jarroo, ta mee er n’eamagh er; ta mee er chur lhiam eh, as ver eh aïgh vie lesh ’sy raad.

¹⁶ Tar-jee er-gerrey hym’s, clasht-jee rish shoh; cha vel mee er loayrt dy follit veih’n toshiaght; er-dyn traa ve, ayns shen ta mee: as nish ta’n Chiarn Jee as e Spyrryd er my choyrt magh.

¹⁷ Myr shoh ta’n Chiarn dty Er-kionnee gra, Jee casherick Israel; Mish y Chiarn dty Yee ta dty ynsaghey gys dty vondeish hene, ta dty leeideil er y raad ayn lhisagh oo gimmeeaght.

¹⁸ O dy beagh oo er n’eaishtagh rish my annaghyn! eisht veagh dty hee er ve myr awin, as dty ynrickys myr tonnyn ny marrey;

¹⁹ Veagh dty chloan myrgeddin er ny ve myr y gheinnagh, as sluight dty chorp myr genniagh-gharroo ny marrey; cha beagh e ennym er ny ve giarit jeh ny er ny stroie veih kiongoyrt rhym.

²⁰ Cosne-jee magh ass Babylon, roie-jee er-chea veih ny Caldeanee; lesh y choraa dy vingys jean-jee gimraa er shoh, insh-jee shoh, fockle-jee eh dy jarroo gys ny ard-valjyn sodjey magh jeh’n theihll; abbyr-jee, Ta’n Chiarn er choyrt livrey-ys da e harvaant Jacob.

²¹ Tra leeid eh ad trooid yn aasagh cha row ad paagh: hug eh er ny ushtaghyn dy gheill magh ass y chreg er nyn son; scelt eh yn chreg myrgeddin, as ren ny ushtaghyn brishey magh.

²² Cha vel shee erbee cour ny mee-chrauee, ta’n Chiarn dy ghra.