Isaiah 44 - Yn Vible Casherick 1775 1819

CAB. XLIV

¹ Agh eaisht nish, O Yacob my harvaant, as Israel ta mee er reih:

² Shoh myr ta’n Chiarn dy ghra, ta er dty chiaddey, as t’er dty chummey veih’n vreïn, eh nee cooney lhiat; Ny bee aggle ort, O Yacob my harvaant; as uss Yesurun, ta mee er reih.

³ Son ver-yms magh ushtey er e hon-syn ta paagh, as thooillaghyn er y thalloo chirrym; nee’m my Spyrryd y gheayrtey magh er dty luight, as my vannaght er cloan dty chlienney:

⁴ As aasee ad seose myr mastey’n faiyr, as myr shellee rish ny coorseyn-ushtey.

⁵ Jir fer, Lesh y Chiarn mish; as gowee fer elley ennym Yacob er hene; as ver fer elley fo e laue gys y Chiarn, as sliennooys eh-hene er cowrey Israel.

⁶ Myr shoh ta’n Chiarn Ree Israel, as e Haualtagh Chiarn ny flaunyssee, dy ghra, Mish yn chied er as y fer s’jerree; as er-lhimmey jeem’s cha vel Jee erbee elley.

⁷ Quoi, myr mish, oddys ginsh ro-laue, as soilshaghey shen, as cur roym yn chooish, neayr’s reih mee yn pobble veih’n toshiaght? as ny reddyn ta cheet, as ry-hoi cheet, lhig daue ad shen y hoilshaghey.

⁸ Ny bee aggle erriu, ny fo imnea erbee: nagh vel mee er n’insh dhyt eh er-dyn traa shen, as er n’ockley magh eh? dy jarroo ta shin hene my eanishyn. Vel Jee erbee cheu-mooie jeem’s? dy firrinagh-focklagh, cha vel Jee erbee elley dy nhione dooys.

⁹ T’adsyn ooilley fardail ta jannoo jalloo grainnit; as cha bee couyr ny cooney ayns ny reddyn eunyssagh oc; as t’adsyn ad-hene nyn veanishyn gys y nearey oc hene, nagh vel ad fakin ny toiggal.

¹⁰ Eshyn ta cummey Jee, ny roie jalloo grainnit, t’eh jannoo red dyn veg.

¹¹ Cur-my-ner, bee nearey orroosyn ooilley ta taaghey huggey; as y nearey smoo ooilley er ny obbreeyn ren eh: lhig daue ooilley cheet dy cheilley, as shassoo seose ass e lieh; ny-yeih bee aggle as nearey orroo lesh y cheilley.

¹² Ta’n gaaue lesh y chlou chammah gobbraghey ’syn aile eh, as cummey eh lesh oayrdyn, as goaill garrey er lesh niart e roihaghyn; dy jarroo t’eh accryssagh, as ta e niart failleil; t’eh paagh, as t’eh faiynt.

¹³ Ta’n seyir sheeyney magh e rule, t’eh markal magh eh lesh line, t’eh kiartaghey eh lesh planeyn, as goaill towshan lesh y chombaase, as jannoo eh ayns cummey dooinney, cordail rish stoamid dooinney; dy hoiaghey seose eh ayns e hie.

¹⁴ T’eh giarey sheese cedaryn, as goaill y cypress as y darragh, t’eh er ghoaill myr reih da hene fud biljyn ny keylley: t’eh soiaghey billey-unjin, as ta’n fliaghey dy ooraghey eh.

¹⁵ Eisht bee eh ec dooinney dy lostey: son gowee eh kuse jeh dy hiow eh-hene; dy jarroo t’eh jannoo aile jeh, as broie arran lesh; dy jarroo t’eh jannoo jee jeh, as cur ooashley da; t’eh jannoo jalloo grainnit jeh, as croymmey sheese huggey.

¹⁶ T’eh lostey paart jeh ’syn aile; lesh paart elley t’eh gaarlaghey feill: t’eh roastey bee, as gee e haie: dy jarroo t’eh dy hiow eh-hene, as gra, Aha, ta mee er my hiow, ta mee er vakin aile mie.

¹⁷ As t’eh jannoo jee jeh’n chooid elley jeh, eer e yalloo grainnit: t’eh tuittym sheese kiongoyrt rish, as cur ooashley da, as t’eh guee huggey, as gra, Livrey mee, son t’ou uss my Yee.

¹⁸ Cha vel tushtey ny toiggal oc: son t’eh er ghooney seose nyn sooillyn, nagh vod ad fakin; as nyn greeaghyn, nagh vod ad toiggal.

¹⁹ As cha vel unnane dy ghoaill eh gys e chree, chamoo ta toiggal ny tushtey oc dy ghra, Ta mee er lostey ayrn jeh ’syn aile; dy jarroo ta mee er vroie arran er ny smarageyn echey; ta mee er roastey feill lesh, as er n’ee eh; as jean-ym red dwoaiagh jeh’n chooid elley jeh? duittym sheese roish bun billey?

²⁰ Er leoie t’eh beaghey: t’eh cleaynit lesh cree molteyragh, nagh vod eh livrey e annym, ny gra, Nagh vel breg ayns my laue yesh?

²¹ Cooinee orroo shoh, O Yacob as Israel; son uss my harvaant: ta mee er dty chummey; t’ou uss my harvaant: O Israel, cha jean-ym dty yarrood.

²² Ta mee er gholley dty ghrogh-yannoo myr bodjal dorraghey, as dty pheccaghyn myr kay: chyndaa hym’s; son mish t’er dty livrey.

²³ Trog-jee kiaull, O shiuish niaughyn; son she yn Chiarn t’er n’yannoo eh: yllee-jee, shiuish ayrnyn s’inshley yn thallooin: brish-jee magh ayns kiaulleeaght, shiuish sleityn, O cheyll, as dy chooilley villey t’ayn: son ta’n Chiarn er livrey Jacob, as er ghloyraghey eh-hene ayns Israel.

²⁴ Myr shoh ta’n Chiarn, dty Haualtagh, dy ghra, as eshyn ren dty chummey ’sy vreïn, Mish y Chiarn ta jannoo dy chooilley nhee; mish my-lomarcan ta skeayley magh ny niaughyn; mish mee hene ta sheeyney magh yn thalloo;

²⁵ Ta cur dyn veg cowraghyn ny breageryn; ta cur shaghrynys er ny fir-obbee; ta coyrt deiney creeney ass y raad, as jannoo nyn greenaght dy ve ommijys;

²⁶ Ta cooilleeney goo e harvaant, as jannoo mie coyrle e haghteryn; ta gra rish Jerusalem, Bee cummaltee aynyd; as rish ard-valjyn Yudah, Bee shiu er ny hroggal; as neem’s aa-hroggal ny ynnydyn eck ta er n’gholl naardey;

²⁷ Ta gra rish y diunid, Bee er dty hyrmaghey, as chyrmee-yms seose dty awinyn;

²⁸ Ta gra mychione Cyrus, T’eshyn my vochilley, as cooilleenee eh ooilley my aigney; eer gra rish Jerusalem, Bee oo er dty hroggal; as rish y chiamble, Bee dty undin er ny layal.