Isaiah 39 - Yn Vible Casherick 1775 1819

CAB. XXXIX

¹ Ec y traa shen hug Merodach-baladan, mac Valadan ree Vabylon, screeunyn as cowrey gys Hezekiah: son cheayll eh dy row eh er ny ve ching, as er choural.

² As ren Hezekiah mooar jeu, as yeeagh eh daue ooilley cooid verchagh e hie, yn argid, as yn airh, as ny spiceyn, as yn ooil chostal, as ooilley thie e eilley-caggee, as ooilley ny va ry-gheddyn ayns ny tashtaghyn echey; cha row nhee erbee ayns e hie, ny ayns e slane reeriaght, nagh yeeagh eh daue.

³ Eisht haink Isaiah yn phadeyr gys ree Hezekiah, as dooyrt eh rish, Cre dooyrt ny deiney shoh? as cre veih haink ad hood’s? As dooyrt Hezekiah, T’ad er jeet hym veih cheer foddey, eer veih Babylon.

⁴ Eisht dooyrt eh, Cre t’ad er vakin ayns dty hie? As dreggyr Hezekiah, T’ad er vakin dy chooilley nhee t’ayns my hie: cha vel nhee erbee mastey my hashtaghyn nagh vel mee er yeeaghyn daue.

⁵ Eisht dooyrt Isaiah rish Hezekiah, Clasht rish goo Chiarn ny flaunyssee;

⁶ Cur-my-ner, hig ny laghyn, dy bee ooilley ny ta ayns dty hie, as ooilley tashtaghyn dty henn-ayryn gys y laa t’ayn jiu, er nyn goyrt lhieu ersooyl gys Babylon: cha bee nhee erbee faagit, ta’n Chiarn dy ghra.

⁷ As jeh dty vec hig jeed’s, nee oo y gheddyn, nee ad goaill ersooyl ad; bee ad nyn shirveishee ayns plaase ree Vabylon.

⁸ Eisht dooyrt Hezekiah rish Isaiah, S’mie ta goo yn Chiarn t’ou uss er loayrt: dooyrt eh ny-sodjey, Son bee shee as ynrickys rish my lhing’s.