Isaiah 38 - Yn Vible Casherick 1775 1819

CAB. XXXVIII

¹ Ayns ny laghyn shen va Hezekiah ching, as ayns raad y vaaish. As haink Isaiah yn phadeyr, mac Amoz, huggey, as dooyrt eh rish, Shoh myr ta’n Chiarn dy ghra, Jean dty hymney: son yiow baase, as cha jean oo coural.

² Eisht hyndaa Hezekiah e eddin gys y voalley, as ghow eh padjer gys y Chiarn,

³ As dooyrt eh, Cooinee nish, O Hiarn, ta mee guee ort, kys ta mee er n’immeeaght kiongoyrt rhyt ayns ynrickys, as lesh cree firrinagh, as er n’yannoo shen ny ta mie ayns dty hilley: as cheayn Hezekiah dy sharroo.

⁴ Eisht haink goo yn Chiarn gys Isaiah, gra,

⁵ Immee, as abbyr rish Hezekiah, Myr shoh ta’n Chiarn, Jee Ghavid dty ayr, gra, Ta mee er chlashtyn dty phadjer, ta mee er vakin dty yeïr: cur-my-ner, ver-ym gys dty eash queig bleeaney jeig.

⁶ As livrey-ym uss, as yn ard-valley shoh, ass laue ree Assyria, as nee’m fendeil yn ard-valley shoh.

⁷ As bee shoh cowrey dhyt veih’n Chiarn, dy jean y Chiarn shen ny t’eh er loayrt;

⁸ Cur-my-ner, ver-ym lhiam back scadoo ny hooryn, eer ny jeih ooryn, ta er n’gholl sheese er dial Ahaz. Myr shen hyndaa yn ghrian ny jeih ooryn back, lioroo v’eh er n’gholl sheese.

⁹ Yn screeu ren Hezekiah ree Yudah, erreish da ve ching, as v’er choural veih e hingys

¹⁰ Dooyrt mee, ayns giarey jeh my eash, Hem sheese gys giattyn yn oaie; ta mee giarit jeh slane coontey my vleeantyn.

¹¹ Dooyrt mee, Cha vaik-ym y Chiarn, dy jarroo yn Chiarn ayns cheer ny bioee; cha der-ym ny sodjey my-ner dooinney marish cummaltee yn theihll.

¹² Ta my eash er n’gholl shaghey, as te scughit voym myr bwaag bochilley: ta my vea giarit magh myr eggey fidderagh: lesh doghan baasoil ver eh mee naardey: veih’n voghrey eer gys yn astyr ver oo jerrey orrym.

¹³ Smooinee mee derrey’n voghrey, dy jinnagh eh myr lion ooilley my chraueyn y vrishey: veih’n voghrey eer gys yn astyr ver oo jerrey orrym.

¹⁴ Myr eean coar, ny gollan-geayee, shen myr ren mee gaccan; ren mee cooagey myr calmane: ta my hooillyn failleil lesh jeeaghyn seose: O Hiarn, ta mee seaghnit; gow seose my chooish.

¹⁵ Cre jir-ym? t’eh chammah er loayrt rhym, as t’eh hene er chooilleeney eh: bee yn chooid elley jeh my vea ayns kiunid, lurg yn sherriuid anmey shoh.

¹⁶ O Hiarn, lioroo shoh ta deiney beayn, as ayndoo ta bioys my annym: lioroo nee oo my lheihys, as freayll mee bio.

¹⁷ Cur-my-ner, ayns ynnyd shee, va mee ayns diunid sproght; agh t’ou uss, O Hiarn, jeh dty ghraih er hayrn my annym veih’n ooig dy loauid: son t’ou er hilgey ooilley my pheccaghyn er cheu dty chooylloo.

¹⁸ Son cha vod yn oaie cur moylley dhyt, ny yn baase oo y ghloyraghey; as cha vod adsyn ta goll sheese gys yn oaie soilshaghey magh dty ynrickys.

¹⁹ Yn vio, yn dooinney bio, eshyn ver moylley dhyt, myr ta mish jiu; nee yn ayr da e chloan soilshaghey dty ynrickys.

²⁰ Va’n Chiarn aarloo dy hauail mee: shen-y-fa gowee mayd arraneyn-moyllee er greïnyn-kiaullee strengit, ooilley laghyn nyn mea, ayns thie yn Chiarn.

²¹ Son va Isaiah er ghra, Gow-jee dhossan dy figgyn, as lhie-jee eh son plaister er yn askaid, as nee eh coural.

²² As va Hezekiah myrgeddin er ghra, Cre ta’n cowrey dy jem’s seose gys thie yn Chiarn?