Isaiah 33 - Yn Vible Casherick 1775 1819

CAB. XXXIII

¹ Smerg dhyt’s ta spooilley, as nagh r’ou hene spooillit; as ta dellal dy molteyragh, as nagh ghell adsyn dy molteyragh rhyt’s! tra nee oo scuirr veih spooilley, bee oo hene er dty spooilley; as tra scuirrys oo veih dellal dy molteyragh, dellee adsyn dy molteyragh rhyt’s.

² O Hiarn, bee graysoil dooin; ta shin er farkiaght er dty hon: bee uss nyn niart dagh laa, nyn saualtys myrgeddin ayns traa dy heaghyn.

³ Ec tharmane y voirey ren y pobble chea; tra hrog oo ort, va ny ashoonyn er nyn skeayley.

⁴ As bee yn spooilley eu er ny hymsagh dy ve stroit, myr braddagyn; myr ny locustyn ta roie noon as noal, nee eh roie orroo.

⁵ Ta’n Chiarn er ny yrjaghey; son t’eh cummal ayns yn yrjid: t’eh er lhieeney Zion lesh briwnys as ynrickys.

⁶ As bee creenaght as tushtey shickyrys dty laghyn, as niart dty haualtys: ta aggle y Chiarn yn verchys echey.

⁷ Cur-my-ner, nee ny treanee oc geamagh er cheu-mooie; nee ny chaghteryn dy hee keayney dy sharroo.

⁸ Ta ny raaidyn mooarey gyn taaghey, cha vel troailtagh ry-akin orroo: t’eh er vrishey yn conaant, t’eh er hoiaghey beg jeh ny ard-valjyn, cha by-vooar lesh dooinney erbee.

⁹ Ta’n cheer dobberan, as lheïe ersooyl; ta Lebanon er ny leodaghey as giarit sheese; ta Sharon myr yn aasagh; ta Bashan as Carmel craa nyn mess jeu.

¹⁰ Nish nee’m girree, ta’n Chiarn dy ghra; nish bee’m er my yrjaghey; nish neem’s mee hene y hroggal seose.

¹¹ Nee shiu gientyn coau; nee shiu gymmyrkey magh stubble: yn ennal eu hene myr aile nee stroie shiu.

¹² As bee yn pobble er ny lostey myr eayl; myr drineyn buinnit bee ad er nyn lostey ’syn aile.

¹³ Clasht-jee, shiuish ta foddey jeh, cre ta mee er n’yannoo; as shiuish ta er-gerrey, gow-jee rish my niart.

¹⁴ Ta aggle er ghreimmey ny peccee t’ayns Zion; ta creau doaltattym er ghoaill ny crauee-oalsey: quoi ny mast’ ain oddys cummal ayns yn aile lhome-loshtee! quoi nyn mastey oddys surranse ayns loshtaghyn dy bragh farraghtyn!

¹⁵ Eshyn ta gimmeeaght ayns ynrickys, as loayrt yn irriney; eshyn ta dwoaie echey er cosney tranlaasagh, ta craa e laueyn veih goaill leagh briwnys, ta dooney e chleayshyn veih clashtyn fuill, as jeigh e hooillyn veih fakin olk;

¹⁶ Nee eshyn cummal ’syn yrjid: bee troshid ny creggyn cashtal e endeilys, bee arran er ny choyrt da, bee e ushtaghyn shickyr.

¹⁷ Nee dty hooillyn fakin yn ree ayns aalid e ooashley; ver ad my-ner yn cheer ta feer foddey jeh.

¹⁸ Nee dty chree smooinaghtyn er yn atchim t’er n’gholl shaghey. Cre vel yn ard-scrudeyr? cre vel y resowr? cre vel eshyn va currym ny tooryn er?

¹⁹ Cha jean oo fakin pobble dewil; pobble jeh glare ro ghowin er dty hon; jeh chengey yoarree, ro ghoillee dhyt dy hoiggal.

²⁰ Jeeagh er Zion, ard-valley nyn ooashley crauee: hee dty hooillyn Jerusalem ynnyd-vaghee sheeoil, cabbane nagh bee goit sheese; cha bee veg jeh ny kibbinyn eck dy bragh er ny scughey, chamoo vees veg jeh ny coyrdyn eck er nyn veaysley.

²¹ Agh shen y raad bee’n Chiarn gloyroil dooinyn ammyr ny hawinyn lheaney as strooanyn; ayn nagh jed gallee erbee lesh maidjyn-raue, chamoo hed lhong ard-voyrnagh shaghey.

²² Son ta’n Chiarn y briw ainyn, yn Chiarn fer-toyrt nyn leigh, ta’n Chiarn nyn ree; nee eh shin y hauail.

²³ Ta dty choyrdyn er ny lhaggaghey; cha row fort ayndoo dy yannoo shickyr yn chroan; cha row dy niart ayndoo dy skeayley yn shiaull: eisht ta cragh yn spooilley mooar er ny rheynn; ta’n eer baccagh goaill y spooilley.

²⁴ As cha jir y cummaltagh, Ta mee ching: bee drogh-yannoo ny fir-vaghee er ny leih daue.