Isaiah 32 - Yn Vible Casherick 1775 1819

CAB. XXXII

¹ Cur-my-ner, nee ree reill ayns ynrickys, as nee princeyn gymmyrkey reill ayns briwnys.

² As bee yn dooinney shen myr scaa veih’n gheay, as fastee veih’n dorrin; myr awin ushtey ayns thalloo chirrym; myr scadoo creg vooar ayns cheer sponkit.

³ As cha bee ny sooillyn ocsyn moal ta fakin; as nee ny cleayshyn ocsyn ta clashtyn geaishtagh.

⁴ Nee yn cree ocsyn myrgeddin ta gyn tort toiggal tushtey, as nee yn chengey moandagh loayrt dy floaoil.

⁵ Cha bee yn moodjeen ny smoo enmyssit feoilt, ny’n goo ec yn er-sondagh dy ve toyrtyssagh.

⁶ Son nee’n drogh pheccagh loayrt drogh ghoan, as nee’n cree echey gobbraghey mee-chraueeaght, dy chur-rish kialgeyrys, as dy ockley magh oltooan noi yn Chiarn, dy olmaghey annym ny accryssee, as dy lhiettal ushtey vouesyn ta paagh.

⁷ Ta aghtyn yn er-sondagh myrgeddin an-chiart: t’eh smooinaghtyn er saaseyn cluicagh dy stroie yn boght lesh goan breagagh, eer ayns cooish chairal yn ymmyrchagh.

⁸ Agh ta’n cree ooasle smooinaghtyn er nheeghyn ooasle, as liorish cooishyn ooasle nee eh shassoo.

⁹ Irree-jee seose, shiuish vraane t’ec nyn aash; clasht-jee rish my ghoo, shiuish inneenyn neu-harroogh; cur-jee tastey da my ghlare.

¹⁰ Ymmodee laghyn as bleeantyn vees shiu seaghnit, shiuish vraane mee-rioosagh; son ta’n fouyr-feeyney failleil, cha bee mess er y thalloo dy haglym.

¹¹ Bee-jee er-creau, shiuish vraane ta ec nyn aash; bee-jee seaghnit, shiuish inneenyn mee-rioosagh: jean-jee rooisht, as cur-jee j’iu, as kiangle-jee aanrit-sack mysh nyn meeghyn.

¹² Nee ad dobberan son ny sheeintyn, son ny magheryn aalin, son y billey-feeyney messoil.

¹³ Er cheer my phobble hig seose drineyn as dressyn, dy jarroo er ooilley ny thieyn dy reaïd, ayns yn ard-valley rouanagh.

¹⁴ Son bee ny plaaseyn treigit; bee co-chruinnaght yn ard-valley er ny leodaghey; bee ny cashtallyn as ny tooryn son ooigyn rish earish foddey, boggey ny assylyn oaldey, aber shioltaneyn;

¹⁵ Derrey vees y Spyrryd er ny gheayrtey orrym veih’n yrjid, as dy bee yn aasagh magher messoil, as y magher messoil dy ve myr keyll.

¹⁶ Eisht nee briwnys cummal ayns yn aasagh, as nee ynrickys tannaghtyn ayns y vagher messoil.

¹⁷ As bee obbyr ynrickys, shee; as jerrey ynrickys, fea as shickyrys son dy bragh.

¹⁸ As nee my phobble cummal ayns ynnyd sheeoil, as ayns cummallyn sauchey, as ayns fasteeyn feagh,

¹⁹ Tra vees eh ceau claghyn-sniaghtee, cheet neose er y cheyll; as bee yn ard-valley er ny injillaghey kiart rish y thalloo.

²⁰ Bannit ta shiuish ta cuirr rish oirr ooilley ny ushtaghyn, ta coyrt magh gys shen cassyn y dow as yn assyl.