Isaiah 28 - Yn Vible Casherick 1775 1819

CAB. XXVIII

¹ Smerg da’n attey dy voyrn, da meshtyllee Ephraim, ta’n aalid gloyroil oc ny vlaa fioghey, t’er kione ny coanyn mea ocsyn ta’n feeyn er ghoaill mainshtyraght orroo!

² Cur-my-ner, t’ec y Chiarn fer trean as niartal, nee, myr dorrin dy chlaghyn sniaghtee, as sterrym stroialtagh, myr thooilley dy ushtaghyn niartal lhieeney harrish, ad y hilgey sheese gys y thalloo lesh yn laue.

³ Bee yn attey dy voyrn, meshtyllee Ephraim, er ny stampey fo-chosh.

⁴ As bee yn aalid gloyroil ta er kione yn choan mea ny vlaa fioghey, as myr yn chied-vess appee toshiaght yn tourey: ta eshyn ta dy haglym jeeaghyn er as gee, choud as te foast ayns e laue.

⁵ ’Sy laa shen bee yn Chiarn son attey dy ghloyr, as son crown dy aalid, da fooilliagh e phobble.

⁶ As son spyrryd dy vriwnys dasyn ta soie ayns briwnys, as son niart dauesyn ta chyndaa yn chaggey gys y yiat.

⁷ Agh t’adsyn myrgeddin er n’gholl er-shaghryn liorish feeyn, as liorish jough lajer t’ad ass y raad: ta’n saggyrt as y phadeyr fo shaghrynys liorish jough lajer, t’ad baiht ayns feeyn, t’ad ass y raad liorish jough lajer; t’ad mollit ayns ashlish, t’ad leaystey ayns briwnys.

⁸ Son ta ooilley ny buird sollit lesh skeay as broïd, myr shen nagh vel boayl erbee glen.

⁹ Quoi da nee eh gynsaghey tushtey? as quoi er ver eh dy hoiggal ynsagh? adsyn t’er ny harbaa veih’n bainney, as er ny hayrn veih ny keeaghyn.

¹⁰ Son shegin da sarey ve er sarey, sarey er sarey; line er line, line er line; nish ny veggan, as reesht ny veggan.

¹¹ Son lesh meillyn joarree, as glare quaagh nee eh loayrt rish y pobble shoh.

¹² Roosyn dooyrt eh, Shoh’n aash oddys shiu y choyrt da’n vooinjer gheinagh; as shoh’n ooraghey: foast cha jinnagh ad clashtyn.

¹³ Agh va goo yn Chiarn dauesyn sarey er sarey, sarey er sarey; line er line, line er line; nish ny veggan, as reesht ny veggan; dy voddagh ad gimmeeaght, as tuittym gour nyn drommey, as ve brisht, as sniemmit, as goit ’sy ribbey.

¹⁴ Shen-y-fa eaisht-jee rish goo yn Chiarn, shiuish chraidoilee, ta reill yn pobble shoh t’ayns Jerusalem:

¹⁵ Er-yn-oyr dy vel shiu er ghra, Ta shin ayns conaant rish y vaase, as rish niurin ta shin er n’yannoo coardail; tra ta’n slatt goll trooid y cheer myr thooilley, cha jig eh orrin; son ta shin er n’yannoo breagyn nyn gemmyrk, as fo molteyrys ta shin er ollaghey shin hene.

¹⁶ Shen-y-fa shoh myr ta’n Chiarn Jee dy ghra, Cur-my-ner, ta mee soiaghey ayns Zion son undin, clagh, clagh phrowit, clagh-chorneilagh costal, undin shickyr: ersyn ta credjal cha bee oyr nearey.

¹⁷ Briwnys myrgeddin neem’s layal gys y line, as cairys gys y level; as nee’n sniaghtey-garroo sheebey ersooyl kemmyrk ny breagyn, as nee ny ushtaghyn lhieeney harrish ny cooillyn folliaght.

¹⁸ As bee yn conaant eu rish y vaase er ny rassey, as cha jean yn coardail eu rish niurin shassoo; tra nee yn slatt goll trooid y cheer myr thooilley, eisht bee shiuish broojit dy myn liorish.

¹⁹ Cha leah as hed eh magh nee eh berraghtyn erriu: son moghrey lurg moghrey hed eh magh, fey-ny-laa as fud-ny-hoie; as bee eh seaghnagh ynrycan dy hoiggal yn goo.

²⁰ Son ta’n lhiabbee ro yiare son dooinney dy heeyney eh-hene er; as yn eaddagh lhiabbee ro choon da dy hoïlley eh-hene ayn.

²¹ Son nee yn Chiarn troggal er myr ayns cronk Pherazim, bee eh jymmoosagh myr ayns coan Ghibeon, dy yannoo e obbyr, e obbyr yindyssagh; as dy chooilleeney e yannoo, e yannoo yindyssagh.

²² Nish er-y-fa shen, ny bee-jee nyn ghannidee, er-aggle dy bee nyn gheulaghyn jeant ny s’chenney: son ta mee er chlashtyn veih’n Chiarn, Jee ny flaunyssee, yn kerraghey trome ta kiarit noi ooilley’n seihll.

²³ Cur-jee geill, as eaisht-jee rish my choraa; clasht-jee, as eaisht-jee rish my ghlare.

²⁴ Vel yn erroo traaue dy chooilley laa dy chuirr? vel eh fosley as brishey ceabyn e halloo?

²⁵ Erreish da v’er n’yannoo rea yn eaghtyr echey, nagh vel eh spreih yn phishyr, as skeayley yn cummin, as cuirr ayn yn reih curnaght, as yn ard-oarn, as yn shoggyl ayns nyn dhalloo cooie?

²⁶ Son ta e Yee cur roish, cre dy yannoo, as gynsaghey eh ayns tushtey.

²⁷ Son cha vel y pishyr er ny woalley lesh greïe-woaillee, chamoo ta queeyl chart er ny hyndaa er y cummin; agh ta’n pishyr er ny woalley lesh soost, as yn cummin lesh slatt.

²⁸ Ta arroo-arran er ny vlieh, nagh bee eh dy kinjagh bwoalley, ny brishey eh lesh queeyl e chart, ny broo eh lesh e chabbil.

²⁹ Ta shoh myrgeddin cheet magh veih Chiarn ny flaunyssee, ta yindyssagh ayns coyrle, as ooasle ayns e obbraghyn.