Isaiah 27 - Yn Vible Casherick 1775 1819

CAB. XXVII

¹ ’Sy laa shen nee yn Chiarn, lesh e chliwe gyere, as mooar, as lajer, kerraghey leviathan, yn ard-nieu guintagh shen, eer leviathan yn ard-nieu camlaagagh shen, as marree eh yn dragon ta ’syn aarkey.

² ’Sy laa shen gow-jee arrane mychione eck, Garey-feeyney dy feeyn jiarg.

³ Mish y Chiarn ta freayll eh; nee’m gushtaghey eh dy kinjagh; nagh jig assee erbee er, freill-ym arrey er oie as laa.

⁴ Cha vel eulys tannaghtyn mârym’s: quoi yinnagh soiaghey dressyn as drineyn m’oï ’sy chaggey? yinnin goll nyn drooid, yinnin lostey ad cooidjagh.

⁵ Er-nonney lhig da goaill greme jeh my niart, dy vod eh shee y yannoo rhym; as bee shee echey mârym.

⁶ Ver eh orroosyn ta cheet jeh Jacob dy ghoaill fraue: nee Israel blaaghey as cur magh, as lhieeney eaghtyr y thallooin lesh mess.

⁷ Vel eh er woalley eshyn, myr woaill eh adsyn ren eshyn y woalley? ny vel eh er varroo jehsyn corrym rish yn baase ocsyn t’er ny varroo liorish?

⁸ Ayns towse, tra t’ou dy chur magh eh, nee oo pleadeil rish: t’eh lhiettal e gheay rastagh rish traa yn gheay-niar.

⁹ Liorish shoh eisht vees mee-chairys Yacob er ny heyrey, as shoh yn slane cowrey, dy vel e pheccaghyn er ny leih da; tra t’eh jannoo ooilley claghyn yn altar myr claghyn kelk t’er ny vroo dy myn, cha bee ny keylljyn ny ny jallooyn faagit nyn shassoo.

¹⁰ Ny-yeih, bee yn ard-valley fencit ny hraartys, as yn ynnyd-vaghee treigit, as faagit myr faasagh: shen y raad nee yn gauin gyndyr, as ayns shen nee eh lhie sheese, as caigney ny banglaneyn echey.

¹¹ Tra ta ny banganyn echey fiojit, bee ad er nyn mrishey jeh: ta ny mraane cheet as cur aile orroo; son she pobble mee-cheeayllagh ad: shen-y-fa eshyn chroo ad, cha jean eh myghin orroo, as eshyn ren ad y chiaddey, cha jeeagh eh veg y foayr daue.

¹² As hig eh gy-kione ’sy laa shen, dy jean y Chiarn bwoalley mygeayrt veih ammyr ny hawin gys strooan Egypt, as bee shiuish er nyn jaglym, fer as fer, O shiuish chloan Israel.

¹³ As hig eh gy-kione ’sy laa shen, dy bee yn trumpet mooar er ny heidey, as hig adsyn va aarloo dy herraghtyn ayns cheer Assyria, as ny eebyrtee ayns cheer Egypt, as ver ad ooashley da’n Chiarn er y chronk chasherick ec Jerusalem.