Isaiah 26 - Yn Vible Casherick 1775 1819

CAB. XXVI

¹ ’Sy laa shen bee yn arrane shoh er ny ghoaill ayns cheer Yudah; Ta ard-valley lajer ain: saualtys nee Jee pointeil son voallaghyn as bulwarkyn.

² Foshil-jee ny giattyn, dy vod yn ashoon crauee ta freayll yn irriney goll stiagh orroo.

³ Nee oo freayll eshyn ayns shee kinjagh, ta e aigney soit ort; er-yn-oyr dy vel e varrant ort.

⁴ Treisht-jee ayns y Chiarn dy bragh: son ayns y Chiarn Jehovah ta niart dy bragh farraghtyn.

⁵ Son t’eh cur lesh sheese adsyn ta cummal dy ard; yn ard-valley moyrnagh t’eh lhieggal dy injil, t’eh lhieggal eh dy injil eer gys y thalloo; t’eh cur lesh sheese eh eer gys y joan.

⁶ Nee’n cass stampey sheese eh, dy jarroo cassyn ny boghtyn, as kesmadyn ny ymmyrchee.

⁷ Ta raad yn er-cairal ayns ynrickys: t’ou uss, smoo ynrick, kiartaghey cassan yn vooinjer chairal.

⁸ Dy jarroo, ayns raad dty vriwnyssyn, O Hiarn, ta shin er farkiaght er dty hon; ta yeearree nyn annym gys dty ennym, as gys cooinaghtyn jeed’s.

⁹ Lesh my annym ta mee er yeearree oo ’syn oie; dy jarroo, lesh my spyrryd cheu-sthie jee’m nee’m shirrey hood dy moghey: son tra ta dty vriwnyssyn er y thalloo, nee cummaltee yn theihll gynsaghey cairys.

¹⁰ Lhig da foayr ve soilshit da’n drogh-yantagh, ny-yeih cha n’ynsee eh cairys: ayns cheer yn ynrickys nee eh dellal dy neu-chairagh, as cha der eh my-ner ard-ooashley yn Chiarn.

¹¹ Hiarn, tra ta dty laue troggit seose, cha der ad geill da: agh shegin daue fakin eh, as gowee ad nearey son nyn roon noi yn pobble; dy jarroo, nee aile dty noidyn ad y stroie.

¹² Hiarn, nee oo shee y oardaghey dooinyn: son t’ou myrgeddin er n’obbraghey ooilley nyn obbraghyn orrin.

¹³ O Hiarn y Jee ain, ta chiarnyn elley cheu-mooie jeed’s er reill harrin; agh liort’s ny-lomarcan nee mayd gimraa er dty ennym.

¹⁴ T’ad marroo, cha bee ad bio; t’ad er gheddyn baase, cha jean ad girree; shen-y-fa t’ou er cherraghey as er stroie ad, as er choyrt er ooilley nyn imraa dy herraghtyn.

¹⁵ T’ou er vishaghey yn ashoon, O Hiarn, t’ou er vishaghey yn ashoon: t’ou er dty ghloyraghey; t’ou er scughey eh foddey jeh, eer gys ooilley ardjyn sodjey magh y thallooin.

¹⁶ Hiarn, ayns seaghyn t’ad er yeeaghyn er dty hon; gheayrt ad magh padjer tra va dty smaght orroo.

¹⁷ Myr ta ben torragh ayns pian, ta tayrn er-gerrey gys traa yn livrey eck, as geamagh magh ayns e angaish; myr shen ta shinyn er ve ayns dty hilley, O Hiarn.

¹⁸ Ta shin er ve myr dy beagh shin torragh, ta shin er ve ayns pian, ta shin er n’ymmyrkey myr dy beagh eh geay; cha vel shin er n’obbraghey livrey-ys erbee er y thalloo, chamoo ta cummaltee yn theihll er duittym.

¹⁹ Bee dty gheiney marroo bio, marish my chorp’s marroo nee ad girree: Dooisht-jee, as gow-jee arrane, shiuish ta cummal ’sy joan: son ta dty ghruight myr druight lossreeyn, as nee yn ooir gymmyrkey magh ny merriu.

²⁰ Tar, my phobble, immee stiagh ayns dty hiamyryn, as jeigh mood dty ghorryssyn: follee oo hene myr dy beagh eh son shallid yiare, derrey vees yn jymmoose er n’gholl shaghey.

²¹ Son cur-my-ner, ta’n Chiarn cheet magh ass e ynnyd dy cherraghey cummaltee yn theihll son nyn mee-chairys: nee’n ooir myrgeddin yn uill eck y vrah, as cha jean ee ny-sodjey ny merriu eck y cheiltyn.