Isaiah 25 - Yn Vible Casherick 1775 1819

CAB. XXV

¹ O Hiarn, she uss my Yee; ver-ym ard-ooashley dhyt, ver-ym moylley da dty ennym; son t’ou er n’yannoo reddyn yindyssagh; ta ny coyrleyn ayd’s er-dyn toshiaght cairys as firrinys.

² Son t’ou er n’yannoo ard-valley ny charnane; ard-valley lajer voallit ny holtanyn: cummal aalin pobble joarree nagh bee eh ny-sodjey ard-valley; cha bee eh dy bragh troggit arragh.

³ Er-y-fa shen nee yn pobble niartal oo y ghloyraghey, nee ard-valley ny ashoonee atchimagh aggle y ghoaill royd.

⁴ Son t’ou er ve niart da’n voght, fer-coadee da’n ymmyrchagh ayns e heaghyn, kemmyrk veih’n sterrym, scadoo veih’n chiass, tra ta dorrin yn vooinjer atchimagh myr sterrym noi yn voalley.

⁵ Ver oo sheese tharmane ny joarreeyn, myr y chiass ayns thalloo sponkit; eer yn chiass lesh scadoo dy vodjal: bee banglane yn vooinjer atchimagh currit sheese dy injil.

⁶ As er y clieau shoh nee Chiarn ny flaunyssee gaarlaghey son dy chooilley phobble cuirraghyn sonney, gien feeyn er y drundin, dy vee roauyr lane smuir, dy feeyn sheelit dy glen jeh’n drundin.

⁷ As nee eh stroie er y clieau shoh coodagh yn eddin ta tilgit harrish dy chooilley phobble, as y dorraghys ta skeayley harrish dy chooilley ashoon.

⁸ Nee eh sluggey seose baase ayns barriaght, as nee yn Chiarn Jee glenney ersooyl jeïr veih dy chooilley ghruaie, as oltooan e phobble nee eh goaill ersooyl veih ooilley yn seihll: son ta’n Chiarn er loayrt eh.

⁹ As bee eh graït er y laa shen, Cur-my-ner, she shoh yn Jee ain; ta shin er farkiaght er e hon, as nee eh sauail shin: shoh yn Chiarn; ta shin er farkiaght er e hon, bee mayd gennal, as nee mayd boggey y ghoaill ayns e haualtys.

¹⁰ Son ayns y clieau shoh nee laue yn Chiarn tannaghtyn, as bee Moab stampit sheese fo, dy jarroo myr ta coonlagh stampit sheese son y torran.

¹¹ As skeaylee eh magh e laueyn harrystoo, myr t’eshyn ta faarkey eh-hene skeayley magh e laueyn dy naue; as ver eh fo-chosh yn voyrn oc marish spooilley nyn laueyn.

¹² As troshid toor ard dty voallaghyn ver eh lesh sheese, lhieggee eh dy injil, as ver eh lesh eh kiart rish y thalloo, eer gys y joan.