Isaiah 24 - Yn Vible Casherick 1775 1819

CAB. XXIV

¹ Cur-my-ner, ta’n Chiarn jannoo yn thalloo follym-faase; as jannoo eh ny fadaneys, chyndaa eh bun-ry-skyn, as skeayley dy lhean ny cummaltee echey.

² As shen myr vees eh, dy jean y pobble as y saggyrt farrail co-laik; yn fer-mooinjerey as e vainshtyr; yn charvaant as e ben-ainshtyr; yn kionneyder as y creckeyder; yn eeaseyder as yn eeaseydagh; yn tackeyder as yn tackeydagh; dy jean ad ooilley farrail co-laik.

³ Bee yn cheer faagit follym-feayn, as dy bollagh er ny spooilley: son ta’n Chiarn er loayrt y fockle shoh.

⁴ Ta’n cheer dobberan as shymley ersooyl; ta’n seihll gannooinaghey, as lheïe ersooyl; ta mooaralee mooar y theihll ayns doogh-treihys.

⁵ Ta’n cheer myrgeddin fo loght folley liorish ny cummaltee echey, er-yn-oyr dy vel ad er chassey ny leighyn, er chaghlaa ny oardaghyn, as er vrishey yn conaant dy bragh farraghtyn.

⁶ Shen-y-fa ta’n mollaght er stroie yn cheer, as ta e chummaltee currit mow: shen-y-fa ta fir-vaghee ny hooirey losht, as beggan deiney faagit.

⁷ Ta’n feeyn noa goll eig, ta’n billey-feeyney fioghey, ta ooilley yn vooinjer ghennal-chreeagh gosnaghey.

⁸ Ta bingys tabretyn scuirr, ta’n reaïd ocsyn ta jannoo gien mie harrish, ta kiaull yn chlaasagh ny host.

⁹ Cha jean ad giu feeyn lesh arrane; bee jough lajer skeayagh dauesyn ta dy iu eh.

¹⁰ Ta’n ard-valley anveagh er ny vrishey sheese, ta dy chooilley hie dooint seose, nagh vod dooinney erbee goll stiagh orroo.

¹¹ Ta yllaghey son feeyn ayns ny straïdyn, ta dy chooilley voggey er ny vooghey, ta gennallys yn cheer er n’immeeaght.

¹² ’Syn ard-valley ta traartys taaghey, as ta’n giat er ny woalley lesh toyrt-mow.

¹³ Agh foast shoh myr vees eh ayns mean y cheer mastey’n pobble: dy bee eh myr craa yn villey-olive, as myr jeelym messyn-feeyney jerrey’n ouyr.

¹⁴ Troggee ad seose nyn goraa, gowee ad arrane gys ard-ooashley yn Chiarn, nee ad gyllaghey dy ard veih’n aarkey.

¹⁵ Shen-y-fa jean-jee yn Chiarn y ghloyraghey ayns ny coanyn, dy jarroo ennym y Chiarn, Jee Israel, ayns ellanyn yn aarkey.

¹⁶ Veih’n ard sodjey magh jeh’n theihll ta shin er chlashtyn arraneyn, eer gloyr gys yn er-cairal. Agh dooyrt mish, My voghtynid, my voghtynid, smerg dou! ta ny dellaryn cluicagh er ghellal dy molteyragh; dy jarroo ta ny dellaryn cluicagh er ghellal feer volteyragh.

¹⁷ Ta aggle, as yn ooig, as y ribbey ort’s, O chummaltagh y thallooin.

¹⁸ As hig eh gy-kione, dy jean eshyn ta chea veih feiyr yn aggle tuittym ’syn ooig; as dy bee eshyn chosnys seose ass yn ooig goit ayns y ribbey: son ta uinniagyn yn yrjey foshlit, as ta undinyn y thallooin er-creau.

¹⁹ Ta’n thalloo er ny vrishey ayns peeshyn, ta’n ooir dy glen er lheïe ersooyl, ta’n thalloo dy atchimagh er ny chraa.

²⁰ Nee’n thalloo leaystey noon as noal myr dooinney meshtal, as bee eh er ny astyrt myr bwaag; as bee e loght errey hrome er; as nee eh tuittym, as cha n’irree eh arragh.

²¹ As hig eh gy-kione er y laa shen, dy jean y Chiarn kerraghey sheshaght ny ard-vooaralee ’syn yrjey, as reeaghyn ny hooirey er yn ooir.

²² As bee ad er nyn jaglym cooidjagh myr ta pryssoonee chaglit ’sy dungeon, as bee ad jeight seose ’sy phryssoon; as lurg ymmodee laghyn nee’n Chiarn jeeaghyn orroo.

²³ Eisht bee yn eayst fo dorraghys, as bee yn ghrian fo dooid, tra nee Chiarn ny flaunyssee reill ayns cronk Zion, as ayns Jerusalem, as kiongoyrt rish e hanstyr, dy gloyroil.