Isaiah 22 - Yn Vible Casherick 1775 1819

CAB. XXII

¹ Errey coan yn ashlish. Cre ta jannoo ort nish, dy vel shiu ooilley er n’gholl seose gys mullagh ny thieyn?

² Uss ta lane dy anvea, ard-valley boiragh, ard-valley reagh: cha vel dty verriu er ny varroo lesh y chliwe, ny stroit ayns caggey.

³ Ta ooilley ny reiltee ayd er-chea cooidjagh, t’ad geulit liorish ny sideyryn; ta ooilley dty chummaltee ayns geulaghyn dy cheilley, t’ad er-chea foddey ’sy yioyn.

⁴ Er-y-fa shen dooyrt mee, Ny jeeagh-jee orrym; neem’s keayney dy sharroo, ny shir-jee dy my gherjaghey; er-yn-oyr dy vel ad er spooilley inneen my phobble.

⁵ Son te laa dy heaghyn as dy arkys, as dy hrimshey veih’n Chiarn, Jee ny flaunyssee, ayns coan yn ashlish, jeh brishey sheese ny voallaghyn, as eam gys ny sleityn.

⁶ As dymmyrk Elam yn bolg-side marish fainee dy gheiney as dy varkee, as ren Kir yn shleiy y roostey.

⁷ As hig eh gy-kione dy bee dty reih coanyn lane fainee, as nee ny markee tayrn magh ayns order-caggee ec y yiat.

⁸ As daag eh foshlit coodagh Yudah, as yeeagh oo er y laa shen son greinyn-caggee thie ny keylley.

⁹ Ta shiu myrgeddin er vakin brishaghyn ard-valley Ghavid, dy vel ad ymmodee; as ren shiu chaglym cooidjagh ushtaghyn yn loghan heese:

¹⁰ As ta shiu er ghoaill coontey thieyn Yerusalem, as ta shiu er vrishey sheese ny thieyn dy niartaghey yn voalley.

¹¹ Ren shiu myrgeddin jeeig eddyr yn daa voalley ry-hoi ushtey yn chenn loghan: agh cha vel shiu er yeeaghyn huggeysyn t’er hroggal eh, chamoo va geill eu dasyn ren eh y chummey foddey er-dy-henney.

¹² As er y laa shen ren y Chiarn, Jee ny flaunyssee, geamagh erriu gys keayney, as gys dobberan, as gys meaylid, as dy chur erriu aanrit-sack:

¹³ Agh cur-my-ner, boggey as gennallys, slaughtral dew, as marroo kirree, gee feill, as giu feeyn; gra, Lhig dooin gee as giu, son mairagh yiow mayd baase.

¹⁴ Agh ve er ny ockley ayns my chleayshyn liorish Chiarn ny flaunyssee, Son shickyrys cha bee shiu er ny heyrey veih’n vee-chairys shoh, derrey yiow shiu baase, ta’n Chiarn, Jee ny flaunyssee, dy ghra,

¹⁵ Myr shoh ta’n Chiarn, Jee ny flaunyssee, dy ghra, Royd, immee gys y resowr shoh, eer gys Shebna, ta harrish y lught-thie, as abbyr,

¹⁶ Cre t’ayd’s ayns shoh? as cre’n caardys t’ayd ayns shoh, dy vel oo ayns shoh er chleiy dhyt hene oaie, myr eshyn ta cleiy da hene lhiaght moyrnagh, as ta giarey ynnyd oanluckee da hene ayns y chreg?

¹⁷ Cur-my-ner, ver y Chiarn lesh uss ersooyl lesh cappeeys niartal, as nee eh dy firrinagh uss y choodaghey.

¹⁸ Nee eh son shickyrys dy dewil oo y hyndaa as y hilgey myr bluckan gys cheer lhean: ayns shen yiow baase, as shen y raad vees fainee dty ghloyr nearey thie dty hiarn.

¹⁹ As nee’m oo y imman veih dty stayd, as veih dty ard-ooashley nee eh uss y lhieggal.

²⁰ As hig eh gy-kione er y laa shen, dy der-yms fys er my harvaant Eliakim, mac Hilkiah;

²¹ As nee’m eh y choamrey lesh yn gharmad ayd’s, as nee’m eh y niartaghey lesh dty chryss, as ver-ym yn reiltys ayd’s fo yn laue echeysyn, as bee eshyn ny ayr da cummaltee Yerusalem, as da thie Yudah.

²² As ogher thie Ghavid ver-ym ny lhie er e gheaylin: myr shen nee eh fosley, as cha jean fer erbee jeigh; as nee eh jeigh, as cha jean fer erbee fosley.

²³ As ver-ym shickyrys da myr croan ayns boayl sauchey; as bee echeysyn stoyl gloyroil ayns thie e ayrey.

²⁴ As nee ad eshyn y choamrey lesh ooilley gloyr thie e ayrey, yn sheeloghe as yn sluight, ooilley ny siyn beggey, voish siyn-cappan eer gys siyn-podjal.

²⁵ Er y laa shen, ta Chiarn ny flaunyssee dy ghra, bee yn croan er ny scughey, v’er ny hoiaghey ayns boayl shickyr, as bee eh giarit sheese, as lhieggit; as bee yn stoo, va er, er ny yiarey jeh: son ta’n Chiarn er loayrt eh.