Isaiah 21 - Yn Vible Casherick 1775 1819

CAB. XXI

¹ Errey faasagh yn aarkey. Myr ta ny geayghyn-cassee ayns y jiass goll ny hrooid; shen myr te cheet veih’n aasagh, veih cheer atchimagh.

² Ta ashlish feiyjagh er ny hoilshaghey dou; Ta’n molteyr hene er ny volley, as ta’n spooilleyder er ny spooilley. Seose lhiat, O Elam: chion stiagh [Babylon], O Vedia: ooilley ny osnaghyn v’eck by-chyndagh roo ta mee er chur dy fea.

³ Er-y-fa shen ta my veeghyn guint lesh pian; ta pianyn er my ghreimmey, myr pianyn ben ta er-troailt: va mee crubbit sheese ec clashtyn eh; va mee agglit ec y chilley echey.

⁴ Ren my chree pandoogh, hug aggle atchim aynym: t’eh er hyndaa yn oie dy yennallys aym gys oie agglagh dou.

⁵ Soie-jee magh y boayrd, freill-jee arrey ayns toor y watch, ee-jee, iu-jee: irree-jee, shiuish reiltee, as bee-jee ullee ayns nyn eïlley-caggee.

⁶ Son myr shoh ta’n Chiarn er ghra rhym, Immee, cur seose arreyder, lhig da fockley-magh dooin cre t’eh dy akin.

⁷ As honnick eh fainagh lesh cubbyl dy varkee, fainagh dy assylyn as fainagh dy chamelyn; as deaisht eh dy imneagh lesh kiarail jeidjagh.

⁸ As dyllee eh myr lion, My hiarn, ta mee dy kinjagh shassoo er toor yn arrey fey-ny-laa, as ta mee currit er my arrey fud-ny-hoie;

⁹ As cur-my-ner, hee-ym cheet fainagh dy gheiney, marish cubbyl dy varkee. As dreggyr eh, as dooyrt eh, Ta Babylon er duittym, er duittym; as ooilley jallooyn grainnit ny jeeghyn eck, t’eh er vrishey gys y thalloo.

¹⁰ O my laare-vooie, as arroo my hoalt: shen ta mee er chlashtyn veih Chiarn ny flaunyssee, Jee Israel, ta mee er hoilshaghey diuish.

¹¹ Briwnys Dumah. T’eh geamagh hym veih Seir, Arreyder, cre ta skeeal yn oie? arreyder, cre ta skeeal yn oie?

¹² Dreggyr yn arreyder, Ta’n moghrey cheet, as myrgeddin yn oie: my nee shiu briaght, brie-jee: chyndaa-jee, tar-jee.

¹³ Yn errey er Arabia. Ayns keylljyn Arabia nee shiu aaght y ghoaill, O shiuish cho-hroailtee Dedanim.

¹⁴ Hug cummaltee cheer Teman lhieu ushtey huggeysyn va paagh, roie ad lesh nyn arran ny whail-syn ren chea.

¹⁵ Son chossyn ad roue veih ny cliwenyn, veih’n chliwe lommyrtagh, as veih’n bow v’er y vent, as veih dewilys y chaggey.

¹⁶ Son myr shoh ta’n Chiarn er ghra rhym, Cheu-sthie jeh bleïn, rere bleeantyn fer ny faillee, as hed ooilley gloyr Chedar naardey.

¹⁷ As bee yn chooid elley jeh earroo ny sideyryn, treanee cloan Chedar er nyn leodaghey: son ta’n Chiarn, Jee Israel, er loayrt eh.