Isaiah 19 - Yn Vible Casherick 1775 1819

CAB. XIX

¹ Errey Egypt. Cur-my-ner, ta’n Chiarn markiagh er bodjal bieau, as hig eh gys Egypt; as bee jallooyn Egypt tilgit bun-ry-skyn ec yn enish echey, as cree Egypt nee lheïe ersooyl cheu-sthie jeh.

² As soie-yms ny Egyptianee noi ny Egyptianee: as nee ad caggey dagh unnane noi e vraar, as dagh unnane noi e naboo; ard-valley noi ard-valley, as reeriaght noi reeriaght.

³ As nee dunnallys Egypt failleil ayns y vean echey; as ver-yms yn choyrle echey naardey: as nee ad shirrey gys ny jallooyn, as gys fir-obbee, as gys fir-faishnee, as gys buitchyn.

⁴ As neem’s ny Egyptianee y livrey gys laue reejerey dewil; as ree fargagh nee reill harrystoo, ta’n Chiarn dy ghra, eer Chiarn ny flaunyssee.

⁵ As nee ny ushtaghyn failleil veih’n aarkey, as bee’n awin naardey as chyrmit seose.

⁶ As chyndaa-ee ad ny awinyn foddey ersooyl; as bee ny strooanyn dy endeilys folmit as chyrmit; yn chuirtlagh neesht as y chlioagagh nee fioghey.

⁷ Yn chuirtlagh-phabyr liorish ny strooanyn, liorish beïll ny strooanyn, as dy chooilley nhee cuirt liorish ny strooanyn, nee fioghey, hed eh naardey, as cha bee arragh jeh.

⁸ Bee ny eeasteyryn myrgeddin ayns trimshey, as nee dy chooilley unnane ta tilgey dooan ayns ny strooanyn dobberan, adsyn ta skeayley lieenteenyn er ny ushtaghyn nee ad shymley ersooyl.

⁹ Adsyn myrgeddin ta gobbragh ayns lieen keyl, as lheid as ta fee obbyr jeebinagh, vees er ny choyrt mow.

¹⁰ As bee yn obbyr oc ayns fardail, ooilley ny ta jannoo arraghyn as loghanyn son eeast.

¹¹ Shickyr ta princeyn Zoan mee-cheeayllagh, ta coyrle fir-choyrlee creeney Pharaoh er jeet dy ve bolvaneagh: kys ta shiu gra rish Pharaoh, Mish mac yn er-creeney, mac dy henn reeaghyn?

¹² Cre vel adsyn? cre vel dty gheiney creeney? as lhig daue ginsh dhyt nish, as lhig da fys ’ve oc, cre ta Chiarn ny flaunyssee er chiarail er Egypt.

¹³ Ta princeyn Zoar er choayl nyn geeayl, ta princeyn Noph fo shaghrynys; t’ad er vrah Egypt, eer adsyn ta barrant ny rheamyn echey.

¹⁴ Ta’n Chiarn er heaymey ny mast’ oc spyrryd dy voirraneys: as t’ad er choyrt shaghrynys er Egypt ayns dy chooilley nhee t’ad goaill ayns laue, myr dooinney meshtal gymmylt ayns e skeay hene.

¹⁵ Chamoo vees obbyr erbee ayns Egypt dy yannoo, son kione ny farbyl, banglane ny shuin.

¹⁶ Ayns y laa shen vees Egypt goll-rish mraane: bee aggle as atchim er, kyndagh rish laue baggyrtagh Chiarn ny flaunyssee, t’eh dy chraa harrish.

¹⁷ As bee cheer Yudah ny atchim da Egypt: bee dy chooilley unnane ta gimraa er, agglagh er e hon hene, kyndagh rish coyrle Chiarn ny flaunyssee, t’eh er chiarail n’oï.

¹⁸ Ayns y laa shen nee queig ard-valjyn ayns cheer Egypt loayrt glare Chanaan, as breearrey gys Chiarn ny flaunyssee: unnane vees enmyssit, Ard-valley ny greiney.

¹⁹ Ayns y laa shen vees altar da’n Chiarn ayns mean cheer Egypt, as pillar ayns e ardjyn sodjey magh gys y Chiarn.

²⁰ As bee eh son cowrey, as son feanish da Chiarn ny flaunyssee ayns cheer Egypt; son nee ad geamagh gys y Chiarn, kyndagh rish ny tranlaasee, as ver eh huc saualtagh, eer fer niartal, as nee eh ad y livrey.

²¹ As bee yn Chiarn er ny hoilshaghey da Egypt, as ver ny Egyptianee enney er y Chiarn ayns y laa shen, as oural as chebbal y yannoo; dy jarroo nee ad breearrey gys y Chiarn as cooilleeney eh.

²² As nee’n Chiarn bwoalley Egypt; nee eh bwoalley, as eh y lheihys: as nee ad chyndaa eer gys y Chiarn, as bee eh myghinagh daue, as nee eh ad y lheihys.

²³ Ayns y laa shen vees raad-mooar ass Egypt gys Assyria; as hig yn Assyrian gys Egypt, as yn Egyptian gys Assyria; as nee ny Egyptianee shirveish [Jee] marish ny Assyrianee.

²⁴ Ayns y laa shen vees Israel yn trass ashoon marish Egypt, as marish Assyria, eer bannaght ayns mean y cheer.

²⁵ Adsyn nee Chiarn ny flaunyssee bannaghey, gra, Bannit dy row Egypt my phobble, as Assyria obbyr my laueyn, as Israel my eiraght.