Isaiah 13 - Yn Vible Casherick 1775 1819

CAB. XIII

¹ Errey Vabylon, honnick Isaiah mac Amoz.

² Soie-jee seose mergey er y clieau ard, trog-jee seose nyn goraa hucsyn, crie-jee yn laue, dy vod ad goll stiagh er giattyn y vooinjer ooasle.

³ Ta mee er n’oardaghey my vooinjer chasherick, ta mee myrgeddin er n’eamagh er my vooinjer niartal cour my yymmoose, dy feer, adsyn ta goaill boggey ayns my yrjid.

⁴ Feiyr ymmodee ayns ny sleityn, myr jeh pobble mooar; tharmane reeriaghtyn ny ashoonyn er nyn jaglym cooidjagh: ta Chiarn ny flaunyssee musteral e heshaght-chaggee:

⁵ T’ad cheet veih cheer foddey, veih ny ardjyn sodjey magh fo niau, eer yn Chiarn, as greïnyn e yymmoose, dy stroie yn slane cheer.

⁶ Jean-jee gullyrnee; son ta laa yn Chiarn ec laue; hig eh myr toyrt-mow veih’n Ooilley-niartal.

⁷ Shen-y-fa bee dy chooilley laue faiynt, as nee cree dy chooilley ghooinney lheïe ersooyl:

⁸ As bee ad agglagh: gowee angaish as trimshey greme orroo; bee ad ayns pian myr ben er-troailt; bee ad seaghnit yn derrey yeh ec y jeh elley; nee nyn eddin jiargaghey myr aile.

⁹ Cur-my-ner, ta laa yn Chiarn cheet, dewil chammah lesh jymmoose as corree trome, dy yannoo yn cheer ny hraartys; as nee eh stroie ny peccee ass.

¹⁰ Son cha der rollageyn niau, ny ny co-soilshaghyn, nyn sollyssid: nee’n ghrian girree ayns dorraghys, as cha jean yn ray-sollys soilshean.

¹¹ As neem’s kerraghey yn seihll son nyn ghrogh-yannoo, as ny mee-chrauee son nyn neu-chairys; as ver-ym er kione-ardys yn vooinjer voyrnagh dy scuirr, as ver-ym sheese dy injil mooaralys yn vooinjer atchimagh.

¹² Neem’s dooinney dy ve ny s’costal na airh ghlen, dy feer dooinney na wedge airh dy Ophir.

¹³ Shen-y-fa neem’s craa ny niaughyn, as nee’n ooir scughey ass e ynnyd ayns jymmoose Chiarn ny flaunyssee, as ayns laa e yymmoose hrome.

¹⁴ As bee eh myr feeaïh ta shelgit, as myr keyrrey chailjey: nee dagh dooinney chyndaa gys e phobble hene, as cosney dagh unnane gys e heer hene.

¹⁵ Bee dy chooilley unnane t’er ny gheddyn er ny roie trooid; as nee dy chooilley unnane t’er ny lhiantyn roo tuittym liorish y chliwe.

¹⁶ Bee nyn gloan myrgeddin er ny vransey ayns peeshyn roish nyn sooillyn; nyn dhieyn vees spooillit, as ny mraane oc goit er-êgin.

¹⁷ Cur-my-ner, greinnee-yms seose ny Medeyn nyn ’oï, nagh bee scansh oc jeh argid; as er son airh, cha vel ad goaill taitnys ayn.

¹⁸ Lesh nyn mhow’ghyn myrgeddin nee ad ny deiney aegey y varroo; as cha bee erreeish oc er mess y vreïn; chamoo vees nyn sooill chymmoil er cloan aegey.

¹⁹ As bee Babylon, gloyr ny reeriaghtyn, aalid ooashley ny Caldeanee, myr y traa ren Jee Sodom as Gomorrah y stroie.

²⁰ Cha bee eh dy bragh er ny chummal ayn, chamoo vees eh er ny vaghey ayn veih sheeloghe gys sheeloghe: cha jean yn Arabian soiaghey seose e chabbane ayn, chamoo nee ny bochillyn nyn mwoaillee ayns shen:

²¹ Agh beishtyn oaldey yn aasagh nee cummal ayn; as bee nyn dhieyn lane dy chretooryn agglagh; nee hulladyn baghey ayn, as phynnodderee daunsin ayns shen.

²² As maase feïe ny ellanyn nee geam ayns nyn dholtanyn, as dragonyn ayns nyn blaaseyn aalin; as ta’n traa eck er-gerrey, as cha bee ny laghyn eck foddey beayn.