Hebrewnee 13 - Yn Vible Casherick 1775 1819

CAB. XIII

¹ Lhig da graih braaragh tannaghtyn.

² Ny jarrood-jee dy choyrt oltagh-bea da joarreeyn: son liorish ta paart er choyrt oltagh-bea da ainleyn gyn-yss daue hene.

³ Cooinee-jee orroosyn t’ayns geulaghyn, myr ayns geulaghyn mâroo; as orroosyn t’ayns seaghyn, myr ta shin hene myrgeddin ’sy challin.

⁴ Ta poosey onnoroil ayns ooilley, as y lhiabbee gyn-loght: agh maarderee as adsyn ta brishey-poosey nee Jee briwnys.

⁵ Lhig da’n ymmyrkey-bea eu ve fegooish saynt; as bee-jee booiagh lesh lheid as t’eu: son t’eh er ghra, Cha vaag-ym, ny cha dreig-ym oo dy bragh.

⁶ Shen-y-fa fod mayd dy creeoil gra, Ta’n Chiarn my er-coonee, as cha bee aggle orrym jeh ny oddys dooinney y yannoo rhym.

⁷ Cooinee-jee orroosyn t’er n’ymmyrkey reill harrystiu, t’er loayrt riu goo Yee: geiyrt er y chredjue oc, smooinaghtyn er-jerrey nyn ymmyrkey-bea.

⁸ Yeesey Creest yn er cheddin jea, as jiu, as son dy bragh.

⁹ Ny bee-jee er nyn imman noon as noal lesh ymmodee ynsaghyn joarree: son te red mie dy bee’n cree er ny niartaghey lesh grayse, cha nee ayns y leigh mychione bee, nagh vel er ve vondeishagh dauesyn t’er chur tastey daue.

¹⁰ Ta altar ain nagh vel cairys ocsyn dy ee jeh, ta shirveish yn cabbane-agglish.

¹¹ Son ta kirp ny beïyn shen, ta’n uill oc er ny choyrt lesh stiagh ’syn ynnyd casherick liorish yn ard-saggyrt son peccah, losht cheu-mooie jeh’n champ.

¹² Shen-y-fa ren Yeesey myrgeddin, dy voddagh eh yn pobble y chasherickey lesh e uill hene, surranse cheu-mooie jeh’n ghiat.

¹³ Lhig dooin er-y-fa shen goll magh huggeysyn cheu-mooie jeh’n champ, gymmyrkey yn scammylt echey.

¹⁴ Son ayns shoh cha vel ain ard-valley shickyr, agh ta shin jerkal rish shen ta ry-heet.

¹⁵ Liorishyn er-y-fa shen lhig dooin dy kinjagh chebbal gys Jee oural dy voylley, ta shen, mess nyn meillyn, coyrt booise da e ennym.

¹⁶ Agh dy yannoo mie, as dy rheynn [er ny boghtyn], ny jarrood-jee: son lesh lheid ny ourallyn ta Jee er ny yannoo booiagh.

¹⁷ Cur-jee biallys dauesyn ta reill harrystiu, as bee-jee arrymagh daue: son t’ad er nyn arrey son ny anmeenyn eu, myr adsyn shegin coontey ’choyrt: dy vod ad shen y yannoo lesh boggey, as cha nee lesh trimshey: son ta shen neu-vondeishagh diu.

¹⁸ Guee-jee er nyn son: son ta shin treishteil dy vel cooinsheanse vie ain, ayns dy chooilley nhee shirrey dy vaghey dy onneragh.

¹⁹ Agh ta mee guee erriu ny s’jeean dy yannoo shoh, dy voddym shiu y akin ny sleaie.

²⁰ Nish dy jean Jee ny shee hug lesh reesht veih ny merriu nyn Jiarn Yeesey, ard-vochilley ny geyrragh, trooid fuill y chonaant dy bragh farraghtyn,

²¹ Shiuish y niartaghey ayns dy chooilley obbyr vie dy yannoo e aigney, gobbraghey ayndiu shen ta booisal ayns e hilley, trooid Yeesey Creest; huggey dy row gloyr son dy bragh as dy bragh. Amen.

²² As ta mee guee erriu, vraaraghyn, gow-jee rish y goo dy choyrle, son ta mee er scrieu hiu ayns focklyn giarey.

²³ Toig-jee dy vel nyn mraar Timothy ec reamys; mârishyn, my hig eh dy gerrit, hee-ym shiu.

²⁴ Bea as slaynt dauesyn ta reill harrishdiu, as da ooilley ny nooghyn. T’adsyn jeh Italy bannaghey diu.

²⁵ Grayse dy row mêriu ooilley. Amen.