Genesis 48 - Yn Vible Casherick 1775 1819

CAB. XLVIII

¹ As haink eh gy-kione lurg ny reddyn shoh, dy row eh er ny insh da Joseph, Cur-my-ner, ta dty ayr ching: as ghow eh marish e ghaa vac, Manasseh as Ephraim.

² As dinsh ad da Jacob, gra, Cur-my-ner ta dty vac Joseph, cheet dy dty yeeaghyn: as hrog shoh cree Israel, dy hoie eh seose ’sy lhiabbee.

³ As dooyrt Jacob, Hoilshee Jee ooilley-niartal eh hene dooys ec Luz, ayns cheer Chanaan, as vannee eh mee.

⁴ As dooyrt eh rhym, Cur-my-ner, neem’s uss messoil, as bishee-ym oo, as ver-ym er earroo dy leih dy heet jeed; as ver-yms y cheer shoh, da dty luight dty yeï, son eiraght dy bragh farraghtyn.

⁵ As nish er son dty ghaa vac, Ephraim as Manasseh, va ruggit dhyt ayns cheer Egypt, roish my daink mish hood gys Egypt, she lhiam’s ad: myr Reuben as Simeon, bee ad lhiam’s.

⁶ As dty luight, nee uss y gheddyn ny lurg oc, lhiat’s vees ad, as bee ad er n’enmys lurg ennym nyn mraaraghyn ayns yn eiraght oc.

⁷ As er my hon’s, tra haink mee veih Padan, hooar Rachel baase liorym, ayns cheer Chanaan, er y raad, tra nagh row foast agh tammylt beg dy raad dy gholl gys Ephrath: as doanluck mee ee ayns shen, ayns raad Ephrath, ta’n boayl cheddin Beth-lehem.

⁸ As yeeagh Israel er mec Yoseph, as dooyrt eh, Quoi ad shoh?

⁹ As dooyrt Joseph rish e ayr, Ny mec aym’s ad, ta Jee er choyrt dou ’syn ynnyd shoh: as dooyrt eh, Cur lhiat ad, ta mee guee ort, hym’s, as ver-ym my vannaght daue.

¹⁰ Nish va sooillyn Israel moal lesh eash, myr shen nagh b’leayr da dy mie; as hug eh lesh ad er-gerrey da; as phaag eh ad, as ghow eh ad ayns e roihaghyn.

¹¹ As dooyrt Israel rish Joseph, Cha smooinee mee d’akin dt’eddin: as cur-my-ner, ta Jee er yeeaghyn dou dty luight myrgeddin.

¹² As ghow Joseph ad veih eddyr e ghlioonyn, as chroym eh sheese lesh e eddin gys y thalloo.

¹³ As ghow Joseph ad nyn-neesht, Ephraim ’sy laue yesh, gys laue chiare Israel; as Manasseh ’sy laue chiare, gys laue yesh Israel, as hug eh lesh ad er-gerrey da.

¹⁴ As heeyn Israel magh e laue yesh, as lhie eh eh er kione Ephraim, va’n er saa, as e laue chiare er kione Manasseh; leeideil e laueyn dy tastagh; son Manasseh va’n er shinney.

¹⁵ As vannee eh Joseph, as dooyrt eh, Jee, kiongoyrt rishyn ren my ayraghyn Abraham as Isaac gimmeeaght, y Jee ta er m’y niartaghey ooilley earish my vea, derrey’n laa t’ayn jiu;

¹⁶ Yn ainle ren mish y livrey veih dy chooilley olk, dy bannee eh ny scollagyn; as lhig m’ennym’s ve orroo, as ennym m’ayraghyn Abraham as Isaac: as lhig daue bishaghey gys earrooyn dy leih, ayns mean y theihll.

¹⁷ As tra honnick Joseph, dy dug e ayr e laue yesh er kione Ephraim, cha by-laik lesh eh: as hrog eh seose laue e ayrey, dy scughey eh veih kione Ephraim gys kione Manasseh.

¹⁸ As dooyrt Joseph rish e ayr, Cha nee myr shen, m’ayr: son eh shoh yn fer shinney; cur dty laue yesh er y chione echeysyn.

¹⁹ As dob e ayr, as dooyrt eh, Ta fys aym er, my vac, ta fys aym er: hig eshyn myrgeddin dy ve pobble, as bee eh myrgeddin pooaral: agh dy firrinagh bee e vraar saa ny s’pooaral ny eshyn, as hig e luight dy ve earroo dy ashoonyn.

²⁰ As vannee eh ad yn laa shen, gra, Aynyd’s nee Israel bannaghey, gra, Dy giall Jee dhyt dy ve myr Ephraim as Manasseh, as ren eh soiagh jeh Ephraim roish Manasseh.

²¹ As dooyrt Israel rish Joseph, Cur-my-ner, ta my vaase er-gerrey: agh bee Jee mêriuish, as ver eh lesh shiu reesht gys cheer nyn ayraghyn.

²² Ta mee myrgeddin er choyrt dhyt chooid-ronney sodjey, erskyn dty vraaraghyn, ghow mee ass laue yn Amorite lesh my chliwe, as lesh my vhow.