Genesis 25 - Yn Vible Casherick 1775 1819

CAB. XXV

¹ Lurg shoh ghow Abraham ben elley, as va’n ennym eck Keturah.

² As ren ee gymmyrkey da Zimran, as Jokshan, as Medan, as Midian, as Ishbak, as Shuah.

³ As hooar Jokshan Sheba, as Dedan. As mec Dedan, v’ad Asshurim, as Letushim, as Leummim.

⁴ As mec Midian v’ad Ephah, as Epher, as Hanoch, as Abidah, as Eldaah: v’ad shoh ooilley cloan Keturah:

⁵ As daag Abraham ooilley ny v’echey da Isaac.

⁶ Agh da mec ny co-lhiabbee v’ec Abraham, hug eh giootyn, as hug eh ad ersooyl veih Isaac e vac (choud as v’eh foast bio) lesh y shiar, gys cheer y shiar.

⁷ As ad shoh bleeantyn yn eash ren Abraham y cheau, hoght-feed as queig bleeaney jeig.

⁸ Eisht phaart Abraham, as hooar eh baase ayns shenn eash lowal, ny henn ghooinney, as lane dy vleeantyn: as v’eh er ny haglym gys e ayraghyn.

⁹ As ren ny mec echey Isaac as Ishmael eh y oanluckey, ayns lhiaght Machpelah, ayns magher Ephron mac Zohar yn Hittite, ta liorish Mamre;

¹⁰ ’Sy vagher, ren Abraham y chionnaghey veih mec Heth: ayns shen va Abraham as Sarah e ven er nyn oanluckey.

¹¹ As haink eh gy-kione lurg baase Abraham, dy ren Jee bannaghey Isaac e vac, as ren Isaac cummal liorish chibbyr Lahai-roi.

¹² Nish ad shoh sheelogheyn Ishmael, mac Abraham, eh ren Hagar yn Egyptian, inney-veyl Sarah, y ymmyrkey da Abraham.

¹³ As ad shoh enmyn mec Ishmael liorish nyn enmyn, cordail rish ny sheelogheyn oc: mac by-hinney Ishmael, va Nebajoth: as Kedar as Abdeel, as Mibsam.

¹⁴ As Mishma, as Dumah, as Massa,

¹⁵ Hadar as Tema, Jetur, Naphish, as Kedemah.

¹⁶ Ad shoh mec Ishmael, as shoh nyn enmyn, lurg ny baljyn, as ny cashtallyn oc; daa phrince jeig, cordail rish ny ashoonyn oc.

¹⁷ As ad shoh bleeantyn eash Ishmael, shey-feed bleïn as shiaght-jeig: as livrey eh seose e annym, as hooar eh baase, as v’eh er ny haglym gys e ayraghyn.

¹⁸ As va’n cummal oc veih Havilah gys Shur, ta shen, er slyst Egypt, myr t’ou goll lesh Assyria: as hooar eh baase mastey ooilley e vraaraghyn.

¹⁹ As ad shoh sheelogheyn Isaac, mac Abraham: hooar Abraham Isaac.

²⁰ As va Isaac da-eed bleïn dy eash, tra phoose eh Rebekah, inneen Vethuel yn Syrian jeh Padan-aram, shuyr Laban y Syrian.

²¹ As ren Isaac aghin gys y Chiarn son e ven, er-yn-oyr dy row ee gennish: as hug y Chiarn clashtyn da, as ren Rebekah e ven giennaghtyn.

²² As ren ny oikanyn gleck cheu-sthie j’ee; as dooyrt ee, My te myr shen, kys ta mee er yn aght shoh? As hie ee rhymbee dy vriaght jeh’n Chiarn.

²³ As dreggyr y Chiarn ee, Ta daa ashoon ayns dty vreïn, as bee daa horch dy leih er nyn scarrey veih dty veeghyn: as bee yn derrey phobble ny s’troshey na yn pobble elley: as nee yn fer shinney shirveish yn fer saa.

²⁴ As myr va’n traa eck er jeet, dy ve er ny livrey, cur-my-ner, va daa lhiannoo er ny ymmyrkey.

²⁵ As haink y chied er magh ruy ooilley harrish, myr garmad geyshteenagh; as denmys ad eh Esau.

²⁶ As eisht ruggyr e vraar, as ghow e laue greme er boyn Esau; as v’eh enmyssit Jacob. As va Isaac three-feed bleïn dy eash, tra hug Rebekah ad son y theihll.

²⁷ As daase ny guillin as va Esau ny helgeyr gastey, dooinney magheragh: agh va Jacob ny ghooinney sockeragh cummal ayns cabbaneyn.

²⁸ As bynney lesh Isaac Esau, son dy d’ee eh jeh’n feïeys v’eh dy hayrtyn: agh bynney lesh Rebekah Jacob.

²⁹ As vroie Jacob poddash: as haink Esau veih’n vagher, as v’eh faiynt.

³⁰ As dooyrt Esau rish Jacob, Cur dou, ta mee guee ort, paart jeh’n bee jiarg shen; son ta mee faiynt: shen-y-fa v’eh enmyssit Edom.

³¹ As dooyrt Jacob, Creck rhym jiu dty eiraght.

³² As dreggyr Esau, Cur-my-ner, ta mee raad y vaaish; as cre sheeagh dou yn eiraght shoh?

³³ As dooyrt Jacob, Jean breearrey dou jiu: as ren eh breearrey da: as chreck eh e eiraght rish Jacob.

³⁴ Eisht hug Jacob da Esau arran as poddash dy lossreeyn; as ren eh gee, as giu, as hrog eh er, as jimmee eh roish: myr shoh, cha beg dy scansh ren Esau y hoiaghey jeh e eiraght.