Genesis 23 - Yn Vible Casherick 1775 1819

CAB. XXIII

¹ As va Sarah shey-feed bleïn as shiaght dy eash: shoh va bleeantyn seihll Sarah.

² As hooar Sarah baase ayns Kirjath-arba; ta shen Hebron, ayns cheer Chanaan: as haink Abraham dy ghobberan, as dy cheayney son Sarah.

³ As hass Abraham seose roish e varroo, as loayr eh rish mec Heth, gra,

⁴ Ta mee my yoarree, as my hroailtagh mêriu. Cur-jee dou cairys ayns grunt oanluckee mêriu, dy voddym yn marroo y oanluckey ass my hilley.

⁵ As dansoor mec Heth Abraham, gra rish.

⁶ Clasht rooin, my Hiarn; t’ou dty phrince niartal ny mast’ ain; ayns y reih jeh ny oaiaghyn ain, jean dty varroo y oanluckey; cha jean unnane ain e oaie y reayll voïd; agh dy vod oo goanluckey dty varroo.

⁷ As hass Abraham seose, as chroym eh eh-hene gys sleih ny cheerey, eer gys mec Heth.

⁸ As loayr eh roo, gra, My she nyn aigney eh, dy jinnin my varroo y oanluckey ass my hilley, eaisht-jee rhym, as loayr-jee ass my lieh, rish Ephron mac Zohar:

⁹ Dy der eh dou ooig Machpelah, ta leshyn, ayns kione e vagher; son wheesh dy argid as sheeagh eh ver eh dou eh, son cairys grunt oanluckee ny mast’ eu.

¹⁰ As ren Ephron cummal mastey cloan Heth, as dreggyr Ephron yn Hittite Abraham, ayns clashtyn cloan Heth, as ooilley cummaltee yn ard-valley echey, gra,

¹¹ Cha nee myr shen, my Hiarn; eaisht rhym: yn magher ta mee coyrt dhyt, as yn ooig t’ayn, ta mee coyrt dhyt; fenish mec my phobble, ta mee dy choyrt dhyt eh: jean dty varroo y oanluckey.

¹² As chroym Abraham eh-hene sheese, kiongoyrt rish sleih ny cheerey.

¹³ As loayr eh rish Ephron, ayns clashtyn sleih ny cheerey, gra, Agh my ver oo dou eh, ta mee guee ort, eaisht rhym; ver-ym argid dhyt son y vagher; gow voym eh, as nee’m my varroo y oanluckey ayns shen.

¹⁴ As dansoor Ephron Abraham, as dooyrt eh rish.

¹⁵ Eaisht rhym, my Hiarn; sheeagh y magher kiare cheead shekel dy argid; cre ta she eddyr mish as uss? Myr shen jean dty varroo y oanluckey.

¹⁶ As va Abraham booiagh lesh ny dooyrt Ephron: as ren Abraham towse da Ephron yn argid v’eh er n’enmys ayns clashtyn mec Heth; kiare cheead shekel dy argid, yn argid va goll fud ny marchanyn.

¹⁷ As magher Ephron va ayns Machpelah, va liorish Mamre, yn magher as yn ooig v’ayn, as ooilley ny biljyn ayns y vagher, va soit mygeayrt-y-mysh, v’ad jeant shickyr,

¹⁸ Da Abraham, son possession, ayns fenish cloan Heth, kiongoyrt rish ooilley ny hie stiagh er giat yn ard-valley.

¹⁹ As lurg shoh ren Abraham goanluckey Sarah e ven, ayns ooig magher Machpelah, liorish Mamre: ta shen Hebron, ayns cheer Chanaan.

²⁰ As va’n magher, as yn ooig ayn jeant shickyr da Abraham, myr cairys grunt oanluckee, liorish mec Heth.