Ezra 10 - Yn Vible Casherick 1775 1819

CAB. X

¹ Nish, lurg da Ezra v’er ghoaill padjer, as er ghoaill rish yn peccah shoh, dobberan, as lhie er y thalloo, kiongoyrt rish thie Yee, haggil huggey ass Israel sheshaght feer vooar dy gheiney, as mraane, as cloan: son ren y pobble keayney dy sharroo.

² As dreggyr Shechaniah mac Jehiel, fer jeh mec Elam, as dooyrt eh rish Ezra, Ta shin er n’yannoo peccah noi’n Jee ain, as er n’ghoaill mraane joarree jeh pobble y cheer: nish ta treishteil foast ayns Israel, mychione y chooish shoh.

³ Nish er-y-fa shen, lhig dooin conaant y yannoo rish y Jee ain, dy chur ersooyl ooilley ny mraane, as y chloan ta ruggit jeu, cordail rish coyrle my hiarn, as y choyrle ocsyn t’er-creau ec sarey’n Jee ain: as lhig da ve jeant cordail rish y leigh.

⁴ Trog ort, son ta’n chooish shoh bentyn dhyt: bee mayd myrgeddin mayrt; bee dunnal, as jean eh.

⁵ Eisht dirree Ezra, as hug eh er ny ard-saggyrtyn, ny Leviteyn, as ooilley Israel loo, dy jinnagh ad cordail rish y goo shoh. As ren ad breearrey.

⁶ Eisht dirree Ezra seose kiongoyrt rish thie Yee, as hie eh stiagh ayns shamyr Yohanan mac Eliashib; as tra haink eh gys shen, cha d’ee eh arran, chamoo diu eh ushtey: son ren eh dobberan kyndagh rish drogh-yannoo cloan y chappeeys.

⁷ As ren ad fockley magh order, trooid Judah as Jerusalem, da ooilley cloan y chappeeys, dy haglym ad-hene cooidjagh ec Jerusalem;

⁸ As quoi-erbee nagh darragh cheu-sthie jeh three laa, cordail rish coyrle ny princeyn as y chanstyr, dy beagh ooilley e chooid goit seose, as eh-hene giarit magh veih sheshaght cloan y chappeeys.

⁹ Eisht haggil ooilley deiney Yudah as Venjamin ad-hene cooidjagh ec Jerusalem, cheu-sthie jeh three laa: ve er y nuyoo vee, as y feedoo laa jeh’n vee, as hoie ooilley’n pobble ayns straid thie Yee, er-creau son y chooish shoh, as son y fliaghey trome.

¹⁰ As hass Ezra yn saggyrt seose, as dooyrt eh roo, Ta shiu er vrishey’n leigh, liorish goaill mraane joarree, dy vishaghey peccah Israel.

¹¹ Nish er-y-fa shen, gow-jee rish nyn beccaghyn gys y Chiarn, Jee nyn ayraghyn, as jean-jee e aigney, as scarr-jee shiu hene veih pobble y cheer, as veih mraane joarree.

¹² Eisht dreggyr ooilley’n cheshaght, as dooyrt ad lesh ard choraa, Myr t’ou er ghra, shen myr shegin dooin jannoo.

¹³ Agh ta’n pobble ymmodee, as ta’n emshyr feer fluigh, as cha vel shin abyl shassoo mooie, chamoo ta shoh obbyr laa ny jees, son ta shin ymmodee t’er ny ve kyndagh ’sy chooish shoh.

¹⁴ Lhig da nish fir-reill y slane sheshaght shassoo dy vriwnys, as lhig dauesyn ooilley t’er ghoaill mraane joarree ayns ny ard-valjyn ain cheet ec y traa pointit, as mâroosyn shanstyr dy chooilley ard-valley, as ny briwnyn, derrey vees jymmoose hrome y Jee ain son y chooish shoh chyndaït voïn.

¹⁵ Jonathan mac Asahel, as Jahaziah mac Tikvah, va ny ynrycan briwnyn ayns y chooish shoh; as ren Meshullam as Shabbethai y Levite cooney lhieu.

¹⁶ As ren cloan y chappeeys myr shen: as ren Ezra yn saggyrt marish paart jeh’n chanstyr son thie nyn ayraghyn, as dagh unnane oc liorish nyn ennym v’er nyn bointeil, soie sheese er y chied laa jeh’n jeihoo vee dy eysht y chooish.

¹⁷ As hug ad jerrey er, roosyn ooilley v’er ghoaill mraane joarree, er y chied laa jeh’n chied vee.

¹⁸ As mastey mec ny saggyrtyn, v’er ny gheddyn dy row paart er ghoaill mraane joarree; ta shen jeh mec Yeshua, mac Yozadak as e vraaraghyn; Maaseiah, as Eliezer, as Jarib, as Gedaliah.

¹⁹ As hug ad nyn laueyn, dy jinnagh ad ersooyl nyn mraane, as myr v’ad oolee, heb ad rea jeh’n chioltane son nyn loght.

²⁰ As jeh mec Immer; Hanani as Zebadiah.

²¹ As jeh mec Harim; Maaseiah, as Elijah, as Shemaiah, as Jehiel, as Uzziah.

²² As jeh mec Pashur; Elioenai, Maaseiah, Ishmael, Nethaneel, Jozabad, as Elasah.

²³ Myrgeddin, jeh ny Leviteyn; Jozabad, as Shimei, as Kelaiah, (yn er cheddin Kelita) Pethahiah, Judah, as Eliezer.

²⁴ Jeh ny fir-chiaullee; Eliashib: as jeh ny porteryn; Shallum, as Telem, as Uri.

²⁵ Ny-sodjey jeh Israel: jeh mec Parosh; Ramiah, as Jeziah, as Malchiah, as Miamin, as Eleazar, as Malchijah, as Benaiah.

²⁶ As jeh mec Elam; Mattaniah, Zechariah, as Jehiel, as Abdi, as Jeremoth, as Eliah.

²⁷ As jeh mec Zattu; Elioenai, Eliashib, Mattaniah, as Jeremoth, as Zabad, as Aziza.

²⁸ Jeh mec Bebai myrgeddin; Jehohanan, Hananiah, Zabbai, as Athlai.

²⁹ As jeh mec Bani; Meshullam, Malluch, as Adaiah, Jashub, as Sheal, as Ramoth.

³⁰ As jeh mec Pahath-moab; Adna, as Chelal, Benaiah, Maaseiah, Mattaniah, Bezaleel, as Binnui, as Manasseh.

³¹ As jeh mec Harim; Eliezer, Ishijah, Malchiah, Shemaiah, Shimeon,

³² Benjamin, Malluch, as Shemariah.

³³ Jeh mec Hashum; Mattenai, Mattathah, Zabad, Eliphelet, Jeremai, Manasseh, as Shimei.

³⁴ Jeh mec Bani; Maadai, Amram, as Uel,

³⁵ Benaiah, Bedeiah, Chelluh,

³⁶ Vaniah, Meremoth, Eliashib,

³⁷ Mattaniah, Mattenai, as Jaasau,

³⁸ As Bani, as Binnui, Shimei,

³⁹ Shelemiah, as Nathan, as Adaiah,

⁴⁰ Machnadebai, Sheshai, Sharai,

⁴¹ Azareel, as Shelemiah, Shemariah,

⁴² Shallum, Amariah, as Joseph.

⁴³ Jeh mec Nebo; Jehiel, Mattithiah, Zabad, Zebina, Jadau, as Joel, Benaiah,

⁴⁴ V’ad shoh ooilley er ghoaill mraane joarree, as rish paart jeu va cloan oc.