Exodus 39 - Yn Vible Casherick 1775 1819

CAB. XXXIX

¹ As jeh’n ghorrym, as purple, as scarleod, ren ad coamraghyn êrin son shirveish yn ynnyd casherick, as ny garmadyn casherick da Aaron: myr va’n Chiarn er choyrt sarey da Moses.

² As ren eh yn ephod dy airh, gorrym, as purple, as scarleod, as aanrit keyl.

³ As woaill ad magh yn airh ayns plaityn thanney, as yiare ad eh ayns wieryn, ry-hoi obbraghey eh ’sy ghorrym, as ’sy phurple, as ayns y scarleod, as ayns y sheeidey, lesh obbyr schleioil.

⁴ Ren ad peeshyn-geaylin er y hon, dy reayll eh cooidjagh: rish y daa oirr ve sniemmit dy cheilley.

⁵ As va cryss laatshagh yn ephod jeh’n un stoo as obbyr; dy airh, dy ghorrym, as purple, as scarleod, as dy heeidey, myr hug y Chiarn sarey da Moses.

⁶ As ren ad gobbragh claghyn-onyx soit ayns socketyn airhey, grainnit myr ta sealyn er nyn yiarey, lesh enmyn chloan Israel orroo.

⁷ As hug eh ad er geayltyn yn ephod, son claghyn dy chooinaghtyn da cloan Israel; myr va’n Chiarn er harey Moses.

⁸ As ren eh breast-plate dy obbyr schleioil, goll-rish obbyr yn ephod, dy airh, dy ghorrym, as purple, as scarleod, as dy heeidey.

⁹ Ve kiare corneilagh; ren ad yn breast-plate dooble: reaish er lhiurid, as reaish er lheead, tra ve dooblit.

¹⁰ As hoie ad ayn kiare coorseyn dy chlaghyn: ayns y chied choorse va sardius, as topaz, as carbuncle; shoh va’n chied choorse.

¹¹ As ayns y nah choorse, va emerald, sapphire, as diamond.

¹² As ’sy trass choorse, va ligure, agate, as amethyst.

¹³ As ayns y chiarroo choorse, beryl, onyx, as jasper; v’ad soit ayns socketyn airhey, ayns nyn order.

¹⁴ As va ny claghyn ghaa-yeig, rere enmyn chloan Israel; myr ta seal grainnit, dagh unnane jeu lesh e ennym, cordail rish y daa hribe jeig.

¹⁵ As ren ad linkyn feeit er corneilyn y vreast-plate dy glen airh.

¹⁶ As ren ad daa socket airhey, as daa loob airhey, as hug ad y daa loob ayns daa chorneil y vreast-plate.

¹⁷ As hug ad yn daa link feeit d’airh ayns y daa loob er corneilyn y vreast-plate.

¹⁸ As daa chione y daa link feeit ren ad sniemmey ’sy daa socket, as hug ad ad er peeshyn-geaylin yn ephod, cheu-veealloo.

¹⁹ As ren ad daa loob airhey, dy hoiaghey ad er daa chorneil y vreast-plate, rish yn oirr echey, va er lhiattee sthie yn ephod.

²⁰ As ren ad daa loob airh elley, er daa oirr heese yn ephod, lesh y cheu-veealloo, raad te cheet cooidjagh, erskyn cryss aalin yn ephod.

²¹ As ren ad kiangley yn breast-plate, lesh e loobyn gys loobyn yn ephod, lesh laatshey gorrym, dy ve erskyn cryss aalin yn ephod, nagh beagh yn breast-plate er ny eaysley veih’n ephod; myr hug y Chiarn sarey da Moses.

²² As ren eh coamrey yn ephod dy obbyr feeit, ooilley dy ghorrym.

²³ As va towl ayns mean y choamrey, myr towl habergeon, lesh boandey mysh y towl, dy niartaghey eh.

²⁴ As hug ad er chemmallyn y choamrey pomegranateyn dy ghorrym, dy phurple, as scarleod, as sheeidey.

²⁵ As ren ad cluig veggey dy glen airh, as hug ad ny cluig eddyr ny pomegranateyn er chemmal y choamrey, ooilley mygeayrt, eddyr ny pomegranateyn.

²⁶ Clag as pomegranate, clag as pomegranate ooilley mygeayrt chemmal y choamrey, dy yannoo shirveish ayn; myr hug y Chiarn sarey da Moses.

²⁷ As ren ad cooatyn dy heeidey, d’obbyr feeit, son Aaron, as son e vec:

²⁸ As ren ad mitre dy heeidey, as bayrnyn aalin d’aanrit keyl, as breechyn d’aanrit keyl.

²⁹ As cryss d’aanrit keyl, as dy ghorrym, dy phurple, as scarleod, d’obbyr-snaidey; myr hug y Chiarn sarey da Moses.

³⁰ As ren ad plate y crown casherick dy glen airh, as scrieu ad er, myr ta seal grainnit, CASHERICKYS gys y CHIARN.

³¹ As hug ad ayn laatshey gorrym, dy chiangley eh heose er y vitre, myr hug y Chiarn sarey da Moses.

³² Myr shoh va mullagh er slane obbyr y chabbane-agglish: as ren cloan Israel cordail rish ooilley ny va’n Chiarn er harey da Moses, myr shen ren ad.

³³ As hug ad lhieu’n cabbane-agglish gys Moses, yn coodagh as ooilley ny va bentyn rish, ny clespyn, ny buird, ny tesmadyn, ny pillaryn, as ny socketyn echey,

³⁴ As y coodagh dy chraitnyn rea daahit jiarg, as y coodagh dy chraitnyn badjer, as y coodagh casherick,

³⁵ Arg yn eanish, as e looghyn, as y stoyl-myghin,

³⁶ Yn boayrd, as ooilley ny siyn echey, as yn arran casherick,

³⁷ Yn kainlere glen [airhey] lesh e lampyn, ad dy ve soit ayns order, as ooilley ny siyn echey, as yn ooil son soilshey,

³⁸ As yn altar airhey, as yn ooil casherick, as yn incense millish, as y curtan son dorrys y chabbane-agglish.

³⁹ Yn altar prashey, as e ghrate prash, e looghyn, as ooilley e hiyn, yn tobbyr-oonlee, as e stoyl fo,

⁴⁰ Coodagh ny cooyrtey, e phillaryn, as e socketyn, as curtanyn giat ny cooyrtey, e choyrdyn, as e chibbinyn, as ooilley ny siyn, gour shirveish y chabbane-agglish,

⁴¹ Yn eaddagh êrin dy yannoo shirveish ’syn ynnyd casherick, as ny garmadyn casherick son Aaron y saggyrt, as garmadyn e vec, dy hirveish ayns oik y taggyrtys.

⁴² Cordail rish ooilley ny doardee yn Chiarn da Moses, myr shen ren cloan Israel cooilleeney’n slane obbyr.

⁴³ As yeeagh Moses er ooilley’n obbyr, as cur-my-ner, v’ad er n’yannoo eh myr va’n Chiarn er harey; eer myr shen ren ad eh: as hug Moses e vannaght daue.