Exodus 33 - Yn Vible Casherick 1775 1819

CAB. XXXIII

¹ As dooyrt y Chiarn rish Moses, Immee royd, as fow seose, uss as y pobble hug oo lhiat magh ass cheer Egypt, gys y cheer vreear mee da Abraham, da Isaac, as da Jacob, gra, Da’n sluight ayd’s ver-ym eh.

² As ver-ym ainle royd; as eiyr-ym magh yn Canaanite, yn Amorite, as yn Hittite, as y Perizzite, yn Hivite, as y Jebusite;

³ Gys cheer raad ta palchey dy vainney as mill; son cha jem’s seose ny mast’ eu; son dy nee pobble creoi-wannallagh shiu; nagh stroie-ym shiu er y raad.

⁴ As tra cheayll y pobble yn skeeal trimshagh shoh, ren ad dobberan; as cha dug dooinney erbee er e choamrey-feailley.

⁵ Son va’n Chiarn er ghra rish Moses, Abbyr rish cloan Israel, Pobble creoi-wannallagh shiu; hig-yms nyn mastey ’sy tullogh, dy choyrt mow shiu: cur nish er-y-fa shen jeed dty choamraghyn moyrnagh, dy voddym fakin cre dy yannoo rhyt.

⁶ As hug cloan Israel nyn stoamid jeu rish slieau Horeb.

⁷ As ghow Moses y cabbane, as hoie eh seose eh cheu-mooie jeh’n champ, tammylt veih’n champ, as denmys eh shen Cabbane-agglish y co-chruinnaght. As haink eh gy-kione, dy jagh dagh unnane, va shirrey gys y Chiarn, magh gys cabbane-agglish y co-chruinnaght, va cheu-mooie jeh’n champ.

⁸ As haink eh gy-kione, tra hie Moses magh gys y cabbane-agglish dy dirree ooilley’n pobble seose, as hass ad dy chooilley ghooinney ec dorrys e chabbane, as yeeagh ad lurg Moses, derrey v’eh er n’gholl stiagh ’sy chabbane.

⁹ As haink eh gy-kione, myr hie Moses stiagh ’sy chabbane, dy daink y pillar bodjallagh neose, as hass eh rish dorrys y cabbane-agglish, as ren y Chiarn loayrt rish Moses.

¹⁰ As honnick ooilley’n pobble y pillar bodjallagh shassoo ec dorrys y chabbane: as dirree ooilley’n pobble seose as hug ad ooashley, dy chooilley ghooinney ec dorrys e chabbane hene.

¹¹ As loayr y Chiarn rish Moses eddin ry eddin, myr loayragh dooinney rish e heshey. As hyndaa eh gys y champ: agh cha jagh Joshua e hirveishagh, mac Nun, ny ghooinney aeg, magh ass y chabbane.

¹² As dooyrt Moses rish y Chiarn, Cur-my-ner, t’ou gra rhym, Cur lhiat seose y pobble shoh: as cha vel oo er hoilshaghey dou quoi ver oo mârym. Ga dy vel oo er ghra, Shynney lhiam dty ennym, as t’ou er gheddyn foayr ayns my hilley’s.

¹³ Shen-y-fa nish, ta mee guee ort, my ta mee er gheddyn foayr ayns dty hilley, soilshee dou nish dty raad, dy vod toiggal ’ve aym jeed, dy voddym foayr y gheddyn ayns dty hilley; as cooinee dy vel yn ashoon shoh dty phobble hene.

¹⁴ As dooyrt eshyn, Bee my enish mayrt, as ver-ym dhyt fea.

¹⁵ As dooyrt eh rish, Mannagh jed dty enish mârym, ny cur lhiat shin ny sodjey.

¹⁶ Son cre liorish vees eh er ny hoilshaghey ayns shoh dy vel mish as dty phobble er gheddyn foayr ayns dty hilley’s? Nagh nee liorish dy vel oo goll mârin? Myr shoh bee mayd orrin hene, mish as dty phobble, er nyn scarrey voish dy chooilley phobble t’er eaghtyr y thallooin.

¹⁷ As dooyrt y Chiarn rish Moses, Neem’s myrgeddin yn red shoh t’ou er ghra; son t’ou er gheddyn foayr ayns my hilley’s, as shynney lhiam dt’ennym.

¹⁸ As dooyrt eshyn, Ta mee guee ort, soilshee dou dty ghloyr.

¹⁹ As dooyrt eh, Soilshee-yms dhyt ooilley my vieys ayns goll royd, as nee’m fockley magh royd ennym y Chiarn; as beem’s graysoil dauesyn s’gooidsave lhiam ve graysoil, as nee’m myghin y hoilshaghey dauesyn s’gooidsave lhiam myghin y hoilshaghey.

²⁰ As dooyrt eh, Cha vod uss m’eddin’s y akin, son cha vod dooinney erbee mish y akin as ve bio.

²¹ As dooyrt y Chiarn, Cur-my-ner, ta ynnyd liorym, as nee oo shassoo er creg:

²² As hig eh gy-kione, choud’s ta my ghloyr goll shaghey, dy der-ym oo ayns scoltey jeh’n chreg, as coodee-ym oo lesh my laue choud’s ta mee goll shaghey.

²³ As goym my laue ersooyl, as hee oo my chooyl; agh my eddin cha vod ve er ny akin.