Exodus 32 - Yn Vible Casherick 1775 1819

CAB. XXXII

¹ Tra honnick y pobble dy row Moses er uirriaght foddey er y clieau, dy haggil y pobble cooidjagh gys Aaron, as dooyrt ad rish, Seose, jean jeeghyn dooin, dy gholl roïn; son mychione yn Moses shoh, yn fer ren leeideil shin magh ass cheer Egypt, cha s’ain cre’n erree t’er jeet er.

² As dooyrt Aaron roo, Gow-jee ny fainaghyn airh t’ayns cleayshyn nyn mraane, nyn mec, as nyn inneenyn, as cur-jee lhieu ad hym’s.

³ As ghow ooilley’n pobble ny fainaghyn airhey v’ayns nyn gleayshyn, as hug ad lhieu ad gys Aaron.

⁴ As ghow eh ad veih nyn laueyn, as ren eh ad y lheïe ayns cummey lheiy grainnit: as dooyrt ad, Ad shoh dty yeeghyn, O Israel, hug lhieu magh oo ass cheer Egypt.

⁵ As tra honnick Aaron shoh, hrog eh altar kiongoyrt rish, as hug Aaron order magh, as dooyrt eh, Ta mairagh feailley gys y Chiarn.

⁶ As dirree ad dy moghey er laa-ny-vairagh, as heb ad ourallyn-losht, as hug ad lhieu ourallyn-shee: as hoie yn pobble sheese dy ee as dy iu, as dirree ad seose dy ve rouanagh.

⁷ As dooyrt y Chiarn rish Moses, Immee, gow royd sheese; son ta dty phobble hug oo lhiat magh ass cheer Egypt, er n’yannoo peccah trome.

⁸ T’ad er hyndaa dy leah jeh’n raad doardee mish daue; t’ad er n’yannoo daue hene lheiy grainnit, as er chur ooashley da, as er hebbal oural huggey, as er ghra, Ad shoh ny jeeghyn ayd’s, O Israel, hug lhieu uss seose ass cheer Egypt.

⁹ As dooyrt y Chiarn rish Moses, Ta mee er vakin yn pobble shoh, as cur-my-ner pobble creoi-wannallagh ad.

¹⁰ Shen-y-fa nish, faag mee, dy vod my yymmoose brishey magh nyn ’oï, as dy voddym ad y stroie; as neem’s jeed’s ashoon mooar.

¹¹ As ghow Moses padjer jeean gys y Chiarn e Yee, as dooyrt eh, Hiarn, cre’n-fa ta dty yymmoose brishey magh cha trome noi dty phobble, hug oo lhiat magh ass cheer Egypt, lesh ard phooar, as lesh laue niartal?

¹² Cre’n-fa veagh oyr ec ny Egyptianee dy ghra, Son olk hug eh lesh ad magh, dy stroie ad ayns ny sleityn, as dy chur mow ad veih eaghtyr y thallooin? Chyndaa veih eulys dty yymmoose, as shaghyn yn kerraghey shoh veih dty phobble.

¹³ Cooinee er Abraham, Isaac, as Israel dty harvaantyn, daue ren oo breearrey liort hene, as dooyrt oo roo, Neem’s bishaghey yn sluight euish myr rollageyn yn aer, as ooilley’n cheer shoh, ta mee er loayrt jeh, ver-yms da’n sluight eu, as bee eh nyn eiraght foddey beayn.

¹⁴ As va’n Chiarn er ny veiyghey veih’n olk, v’eh kiarit dy yannoo rish e phobble.

¹⁵ As hyndaa Moses, as hie eh sheese jeh’n chronk, as va daa voayrd yn eanish ayns e laue; va ny buird scruit er dagh cheu; er y derrey heu as er y cheu elley v’ad er nyn scrieu.

¹⁶ As va ny buird obbyr Yee, as va’n screeu, jeant liorish Jee, giarit ayns ny buird.

¹⁷ As tra cheayll Joshua sheean y pobble myr v’ad gyllagh, dooyrt eh rish Moses, Ta feiyr-caggee ayns y champ.

¹⁸ As dooyrt eshyn, Cha nee’n coraa ocsyn eh ta gyllagh son y vainshtyraght, ny’n eam ocsyn ta er choayl y varriaght: agh y sheean ocsyn ta jannoo kiaulleeaght ta mee clashtyn.

¹⁹ As haink eh gy-kione, myr v’eh tayrn er-gerrey gys y champ, dy chronnee eh yn lheiy, as y daunsin: as ghreesee corree Voses, as hilg eh ny buird ass e laueyn, as vrish eh ad ec bun y clieau.

²⁰ As ghow eh yn lheiy v’ad er n’yannoo, as lheïe eh ’syn aile eh, as veihll eh gys joan eh, as spreih eh eh er yn ushtey, as hug eh er cloan Israel giu jeh.

²¹ As dooyrt Moses rish Aaron, Cre’n olk ren y pobble shoh rhyt’s, dy vel oo er hayrn lheid y peccah orroo?

²² As dooyrt Aaron, Ny lhig da corree my hiarn ve er ny vrasnaghey; shione dhyt y pobble, dy vel ad soit er olk.

²³ Son dooyrt ad rhym, Jean jeeghyn dooin dy leeideil shin; son mychione yn Moses shoh, yn fer hug lesh shin magh ass cheer Egypt, cha s’ain cre’n erree t’er jeet er.

²⁴ As dooyrt mee roo, Quoi-erbee ta fainaghyn airh echey, lhig daue goaill jeu ad: er shoh hug ad dou ad: eisht hilg mee ad ’syn aile, as haink y lheiy shoh magh.

²⁵ As tra honnick Moses dy row’n pobble rooisht, (son va Aaron er roostey ad gys nyn nearey, mastey nyn noidyn)

²⁶ Dy ren Moses eisht shassoo ayns giat y champ, as dooyrt eh, Quoi t’er cheu yn Chiarn? lhig da cheet hym’s. As ren ooilley mec Levi chaglym ad hene dy cheilley huggeysyn.

²⁷ As dooyrt eh roo, Shoh myr ta’n Chiarn Jee Israel gra, Cur-jee dy chooilley ghooinney e chliwe rish e lhiattee, as gow-jee stiagh as magh veih giat dy giat trooid y champ, as marr-jee dy chooilley ghooinney e vraar, as dy chooilley ghooinney e heshey, as dy chooilley ghooinney e naboo.

²⁸ As ren mec Levi lurg oardagh Voses; as huitt jeh’n pobble yn laa shen mysh three thousane dooinney.

²⁹ As dooyrt Moses, Ta shiu er chasherickey shiu hene jiu gys y Chiarn, eer dy chooilley ghooinney ayns goaill cooilleeney er e vac, as er e vraar, dy vod eh stowal e vannaght erriu yn laa jiu.

³⁰ As haink eh gy-kione er laa-ny-vairagh, dy dooyrt Moses rish y pobble, Ta shiu er n’yannoo peccah mooar: as nish hem’s seose gys y Chiarn; foddee dy voddym lhiasaghey ’yannoo son nyn beccah.

³¹ As hyndaa Moses reesht gys y Chiarn, as dooyrt eh, Oh, ta’n pobble shoh er n’yannoo peccah trome, as er n’yannoo daue hene jeeghyn dy airh.

³² Ny-yeih nish, my she dty aigney eh, leih daue nyn beccah; as mannagh jean oo, lhig dooys, ta mee guee ort, ve er my gholley ass dty lioar t’ou er scrieu.

³³ As dooyrt y Chiarn rish Moses, Quoi-erbee ta er n’yannoo peccah m’oï, eshyn nee’m y gholley ass my lioar.

³⁴ Immee nish, er-y-fa shen, jean y pobble y leeideil gys yn cheer mychione ta mee er loayrt rhyt: Cur-my-ner, hed my ainle royd: Ny-yeih, ayns laa yn cherraghey, neem’s cooinaghtyn er shoh nyn beccah.

³⁵ As ghow’n Chiarn kerraghey er y pobble, er coontey’n jalloo hug ad er Aaron dy yannoo.