Exodus 28 - Yn Vible Casherick 1775 1819

CAB. XXVIII

¹ As gow mayrt Aaron dty vraar, as e vec, veih mastey cloan Israel, dy ve my hirveishee ayns oik y taggyrt, eer Aaron, Nadab, as Abihu, Eleazar, as Ithamar, mec Aaron.

² As nee oo garmadyn casherick son Aaron dty vraar, gloyroil as aalin.

³ As nee oo loayrt roosyn ooilley ta obbreeyn schleioil, roosyn ta mee er lhieeney lesh y spyrryd dy hushtey, dy jean ad garmadyn da Aaron, dy chasherickey eh, dy vod eh jannoo shirveish dooys ’sy taggyrtys.

⁴ As shoh ny garmadyn nee ad jannoo, breast-plate as ephod, as garmad liauyr, as cooat laatshit, as mitre, as cryss: as nee ad garmadyn casherick da Aaron dty vraar, as e vec, dy vod eh jannoo shirveish dooys ayns oik y taggyrt.

⁵ As nee ad goaill airh, as gorrym, as purple, as scarleod, as sheeidey.

⁶ As bee’n ephod jeant dy airh, dy ghorrym, as purple, as scarleod, as sheeidey, lesh obbyr schleioil.

⁷ Bee’n daa pheesh gheaylin kianlt dy cheilley er y daa oirr; as myr shoh vees eh sniemmit cooidjagh.

⁸ As bee cryss laatshagh yn ephod ta er, jeh’n un stoo as obbyr, dy airh, dy ghorrym, as purple, as scarleod, as sheeidey cast.

⁹ As nee oo goaill daa chlagh onyx, as grainney orroo enmyn chloan Israel:

¹⁰ Shey jeh nyn enmyn er y derrey chlagh, as ny shey enmyn elley er y chlagh elley, cordail rish nyn eash.

¹¹ Lesh obbyr y ghrainneyder chloaie, myr ta seal er ny yiarey, shoh myr nee oo giarey er y daa chlagh enmyn chloan Israel: nee oo ad y hoiaghey ayns socketyn dy airh.

¹² As ver oo’n daa chlagh er geayltyn yn ephod son cowrey dy chooinaghtyn da cloan Israel. As ver Aaron lesh nyn enmyn kionfenish y Chiarn er e gheayltyn, son imraa.

¹³ As nee oo socketyn dy airh;

¹⁴ As daa link dy glen airh ec ny corneilyn: jeh obbyr feeaghnagh nee oo ad: as nee oo kiangley ny linkyn feeit gys ny socketyn.

¹⁵ As nee oo yn breast-plate dy vriwnys, lesh obbyr schleioil, jeh’n un obbyr rish yn ephod nee oo eh; jeh airh, jeh purple, as scarleod, as dy heeidey nee oo eh.

¹⁶ Kiare square as dooble vees eh, bee eh reaish er lhiurid, as reaish er lheead.

¹⁷ As nee oo claghyn y hoiaghey ayn, eer kiare coorseyn cloaie; bee’n chied choorse jeh sardius, jeh topaz, as carbuncle; shoh vees y chied choorse.

¹⁸ As ayns y nah choorse vees emerald, sapphire, as diamond.

¹⁹ As bee’n trass choorse ny ligure, as agate, as amethyst.

²⁰ As bee’n chiarroo choorse, beryl as onyx, as jasper; bee ad soit ayns socketyn dy airh.

²¹ As bee ny claghyn ghaa-yeig, cordail rish enmyn chloan Israel; myr ta seal granit, dagh unnane jeu lesh e ennym, cordail rish y daa hribe jeig.

²² As ver oo er corneilyn y vreast-plate linkyn feeit dy glen airh.

²³ As nee oo er y vreast-plate daa loob airhey, as ver oo yn daa loob er daa chorneil y vreast-plate.

²⁴ As ver oo’n daa link d’airh ayns y daa loob, ta er corneilyn y vreast-plate.

²⁵ As y daa chione elley jeh’n daa link nee oo shickyr ayns y daa hocket, as ver oo ad er shlinganyn yn ephod cheu-veealloo.

²⁶ As nee oo daa loob airhey, as ver oo ad er daa chorneil y vreast-plate, rish y chemmal, ayns lhiattee yn ephod er y derrey heu.

²⁷ As nee oo daa loob elley d’airh, as ver oo ad ayns lhiattee yn ephod fo, er y cheu elley, lesh y cheu-veealloo, raad te cheet cooidjagh, erskyn cryss aalin yn ephod.

²⁸ As nee ad kiangley yn breast-plate rish e loobyn, gys loobyn yn ephod, lesh rybban gorrym, dy ve erskyn cryss aalin yn ephod, nagh bee’n breast-plate er ny eaysley veih’n ephod.

²⁹ As nee Aaron ceau yn breast-plate dy vriwnys erskyn e chree, lesh enmyn chloan Israel er, tra t’eh goll stiagh ’syn ynnyd casherick, dy ve son cooinaghtyn kinjagh kiongoyrt rish y Chiarn.

³⁰ As ver oo ayns y vreast-plate dy vriwnys, yn Urim as Thummim; as bee ad er cree Aaron tra hed eh stiagh kionfenish y Chiarn: as nee Aaron gymmyrkey briwnys chloan Israel er e chree, kiongoyrt rish y Chiarn dy kinjagh.

³¹ As nee oo garmad yn ephod ooilley dy ghorrym.

³² As bee towl ayns mean e vullagh: bee eh er ny niartaghey mygeayrt lesh obbyr feeit, myr towl habergeon, nagh bee eh raipit.

³³ As cheu-heese, er y chemmal, ver oo pomegranateyn, gorrym, as purple, as scarleod, mygeayrt y chemmal echey: as cluig veggey dy airh eddyr ad ooilley mygeayrt.

³⁴ Clag airhey as pomegranate, clag airhey as pomegranate, rish chemmal y choamrey ooilley mygeayrt.

³⁵ As bee eh er Aaron, tra t’eh jannoo shirveish: as bee’n feiyr echey er ny chlashtyn, tra t’eh goll stiagh ’syn ynnyd casherick kiongoyrt rish y Chiarn, as tra t’eh cheet magh; nagh vow eh baase.

³⁶ As nee oo plate dy glen airh, as nee oo grainney er, myr y cowrey t’er seal fainey, CASHERICKYS GYS Y CHIARN.

³⁷ As nee oo kiangley eh lesh rybban gorrym er y vitre; er cheu wass y vitre vees eh.

³⁸ As bee eh erskyn eddin Aaron, dy vod Aaron gymmyrkey loghtyn ny reddyn casherick nee cloan Israel y hebbal ayns nyn giootyn casherick. As bee eh kinjagh er glaare e eddin, dy vod soiagh ’ve jeant jeu kiongoyrt rish y Chiarn.

³⁹ As nee oo broaidrail yn cooat dy aanrit keyl, as nee oo yn mitre d’aanrit keyl, as nee oo’n cryss d’obbyr-snaidey.

⁴⁰ As nee oo cooatyn da mec Aaron, as cryssyn daue, as nee oo bayrnyn daue, son gloyr as aalid.

⁴¹ As ver oo ad er Aaron dty vraar, as er ny mec echey; as nee oo ad y ooilaghey, as nyn goyrt er-lheh, as ad y chasherickey, dy vod ad jannoo shirveish dooys ayns oik y taggyrt.

⁴² As nee oo breechyn aanrit daue dy choodaghey nyn nearey, veih ny meeghyn gys ny glioonyn nee ad roshtyn.

⁴³ As bee ad er Aaron, as er e vec, tra hig ad stiagh ayns y chabbane-agglish, ny tra hig ad er-gerrey da’n altar dy yannoo shirveish ’syn ynnyd casherick; nagh dayrn ad peccah orroo hene, as baase y gheddyn. Bee shoh ny slattys dasyn son dy bragh, as da e luight ny yeï.