Exodus 25 - Yn Vible Casherick 1775 1819

CAB. XXV

¹ As loayr y Chiarn rish Moses, gra,

² Loayr rish cloan Israel, dy der ad lhieu oural hym: veih dy chooilley ghooinney ta coyrt eh dy arryltagh lesh ooilley e chree, nee shiu my oural y ghoaill.

³ As shoh’n oural nee shiu goaill voue; airh, argid, as prash,

⁴ As gorrym, as purple, as scarleod, as aanrit keyl, as geaysh ghoair,

⁵ As craitnyn reaghyn daahit jiarg, as craitnyn badjer, as fuygh-shittim,

⁶ Ooil son soilshey, spiceyn ooiley, as son oural-millish.

⁷ Claghyn-onyx, as claghyn dy ve soit ’syn ephod, as ’sy vreast-plate.

⁸ As lhig daue ynnyd casherick y yannoo er my hon; dy vod my enish ve ny mast’ oc.

⁹ Cordail rish ooilley ta mee dy yeeaghyn dhyt, cordail rish sampleyr y chabbane-agglish, as sampleyr ooilley ny jeshaghtyn echey, eer myr shen nee shiu eh.

¹⁰ As nee ad arg dy fuygh-shittim: daa chubit dy lieh vees y lhiurid echey, as cubit dy lieh yn lheead echey, as cubit dy lieh yn yrjid echey.

¹¹ As nee oo eh y choodaghey lesh airh ghlen, cheu-sthie as cheu-mooie, coodee oo eh, as rimmey dy airh ver oo mygeayrt-y-mysh.

¹² As nee oo lheïe kiare loobyn airh er y hon, as ver oo ad ayns ny kiare corneilyn echey, as bee daa loob ayns y derrey heu, as daa loob ayns y cheu elley.

¹³ As nee oo looghyn dy fuygh-shittim, as ad y choodaghey lesh airh.

¹⁴ As ver oo ny looghyn ayns ny loobyn, rish lhiatteeyn yn arg, dy vod yn arg v’er ny ymmyrkey lhieu.

¹⁵ Bee ny looghyn ayns loobyn yn arg: cha bee ad goit assdoo.

¹⁶ As ver oo ayns yn arg recortys Yee ver-yms dhyt.

¹⁷ As nee oo yn stoyl-myghin dy glen airh: daa chubit dy lieh vees y lhiurid echey, as cubit dy lieh yn lheead echey.

¹⁸ As nee oo daa cherubim dy airh: lesh obbyr hammarit nee oo ad, dy ve er dagh kione jeh stoyl y vyghin.

¹⁹ As jean un cherub er y derrey chione, as cherub er y chione elley; jeh’n un stoo rish stoyl y vyghin nee shiu ny cherubim er dagh kione jeh.

²⁰ As nee ny cherubim skeayley magh nyn skianyn dy ard, coodaghey stoyl y vyghin lesh nyn skianyn, as bee nyn eddin noi-ry-hoi: lesh stoyl y vyghin bee eddinyn ny cherubim.

²¹ As ver oo seose stoyl y vyghin ayns yn arg; as ayns yn arg ver oo buird y leigh ver-yms dhyt.

²² Shen y raad neem’s dty veeiteil, as loayr-ym rhyt veih erskyn stoyl y vyghin, as veih eddyr y daa cherubim ta er arg yn eanish, mychione dy chooilley nhee ver-yms er dty churrym da cloan Israel.

²³ Nee oo myrgeddin boayrd jeh fuygh-shittim; daa chubit vees y lhiurid echey, as cubit yn lheead, as cubit dy lieh yn yrjid echey.

²⁴ As nee oo coodaghey eh lesh glen airh, as nee oo rimmey dy airh er ooilley mygeayrt.

²⁵ As ver oo lheead-bass dy voarder mygeayrt-y-mysh, as nee oo rimmey airh er y voarder ooilley mygeayrt.

²⁶ As nee oo da kiare loobyn airh, as ver oo ny loobyn er ny kiare corneilyn ta er ny kiare cassyn echey.

²⁷ Kiart rish y voarder vees ny loobyn son ynnydyn ny looghyn dy hroggal y boayrd.

²⁸ As nee oo ny looghyn jeh fuygh-shittim, as nee oo ad y choodaghey lesh airh, cour troggal y boayrd lhieu.

²⁹ As ny claareeyn echey, as ny spainyn, as ny siyn ourallagh, as ny scaillaghyn echey, dy hoiaghey magh y boayrd lhieu: jeh glen airh nee oo ad.

³⁰ As nee oo dy kinjagh arran casherick y hoiaghey er y voayrd roym.

³¹ As nee oo kainlere jeh glen airh: lesh obbyr hammarit vees y kainlere er ny yannoo; e chass, as e vanglaneyn, e lampyn, e chruint, as e vlaaghyn, bee ad jeh’n stoo cheddin.

³² As hig shey banglaneyn magh veih ny lhiatteeyn echey; three banglaneyn jeh’n chainlere er y derrey lhiattee, as three banglaneyn jeh’n chainlere er y lhiattee elley.

³³ Three lampyn goll-rish almondyn, lesh cront as blaa er un vanglane; as three goll-rish almondyn lesh cront as blaa er y vanglane elley. Shoh myr vees eh ayns ny shey banglaneyn hig magh er y chainlere.

³⁴ As ayns y chainlere bee kiare lampyn jeant ayns cummey almondyn, lesh nyn gruint as nyn blaaghyn.

³⁵ As bee cront fo daa vanglane jeh, as cront fo daa vanglane jeh, as cront fo daa vanglane jeh, cordail rish ny shey banglaneyn ta cheet magh er y chainlere.

³⁶ Bee ny cruint as ny banglaneyn jeh’n un stoo: bee eh ooilley un obbyr hammarit dy airh ghlen.

³⁷ As nee oo ny shiaght lampyn echey: as nee ad foaddey ny lampyn, dy vod ad soilshey ’cheau kiongoyrt rish.

³⁸ As bee ny smalyderyn, as ny plaityn smalee jeh glen airh.

³⁹ Jeh talent dy glen airh nee eh shoh y yannoo, marish ooilley ny siyn shoh.

⁴⁰ As jeeagh dy jean oo ad, lurg y sampleyr va er ny yeeaghyn dhyt er y clieau.