Exodus 24 - Yn Vible Casherick 1775 1819

CAB. XXIV

¹ As dooyrt y Chiarn rish Moses, Tar seose gys y Chiarn, uss, as Aaron, Nadab, as Abihu, as three-feed as jeih jeh shanstyr Israel: as jean-jee ooashlaghey foddey jeh.

² As hig Moses eh hene er-gerrey da’n Chiarn: agh cha jig adsyn er-gerrey, chamoo hig y pobble seose mâroo.

³ As haink Moses, as dinsh eh da’n pobble ooilley goan y Chiarn, as ooilley ny briwnyssyn: as dreggyr ooilley’n pobble lesh un choraa, as dooyrt ad, Da ooilley ny goan, ta’n Chiarn er loayrt, ver mayd biallys.

⁴ As scrieu Moses ooilley goan y Chiarn, as dirree eh leah ’sy voghrey, as hrog eh altar fo’n chronk as daa phillar jeig, cordail rish daa hribe jeig Israel.

⁵ As hug eh magh deiney aegey jeh cloan Israel, ren chebbal ourallyn-losht, as dew son ourallyn-shee gys y Chiarn.

⁶ As ghow Moses yn derrey lieh jeh’n uill, as hug eh eh ayns siyn; as spreih eh lieh jeh’n uill er yn altar.

⁷ As ghow eh lioar y chonaant, as lhaih eh ayns clashtyn y pobble, as dooyrt ad, Nee mayd ooilley ny ta’n Chiarn er ghra, as bee mayd ammyssagh.

⁸ As ghow Moses yn uill as spreih eh eh er y pobble, as dooyrt eh, Cur-jee my-ner, shoh fuill y chonaant, ta’n Chiarn er n’yannoo riuish, mychione ooilley ny goan shoh.

⁹ Eisht hie Moses, as Aaron, as Nadab, as Abihu, as three-feed as jeih jeh shanstyr Israel seose.

¹⁰ As honnick ad gloyr Yee Israel: as va fo e chassyn myr dy beagh eh obbyr-laare dy chlagh-sapphire, as sollys myr corp yn aer ayns e aalid.

¹¹ As er ard-gheiney chloan Israel cha lhie eh e laue: honnick ad gloyr Yee myrgeddin, as ren ad gee as giu.

¹² As dooyrt y Chiarn rish Moses, Tar seose hym’s er y chronk, as fuirree ayns shen; as ver-yms dhyt buird chloaie, as leigh, as annaghyn ta mee er scrieu; dhyt’s dy ynsaghey daue.

¹³ As hrog Moses er, as e hirveishagh Joshua: as hie Moses seose er slieau Yee.

¹⁴ As dooyrt eh rish y chanstyr, Fuirree-jee ayns shoh er nyn son, derrey hig mayd hiu reesht; as cur-my-ner, ta Aaron as Hur mêriu: my vees cooishyn ec dooinney erbee dy reaghey, lhig da goll hucsyn.

¹⁵ As hie Moses seose er y clieau, as ren bodjal y slieau y choodaghey.

¹⁶ As ren gloyr y Chiarn tannaghtyn er slieau Sinai, as choodee yn bodjal eh shey laa, as er y chiaghtoo laa deïe eh er Moses ass mean y vodjal.

¹⁷ As va shilley gloyr y Chiarn myr aile mooar lossey er mullagh y clieau, ayns sooillyn chloan Israel.

¹⁸ As hie Moses stiagh ayns mean y vodjal, as hie eh seose er y clieau: as va Moses er y clieau da-eed laa, as da-eed oie.