Exodus 23 - Yn Vible Casherick 1775 1819

CAB. XXIII

¹ Cha jean oo troggal, ny cur mygeayrt, goo breagagh: ny cur dty laue marish ny mee-chrauee, dy ve feanish foalsey.

² Cha n’eiyr oo er yn ymmodee dy yannoo olk: chamoo nee oo loayrt ayns cooish, dy gholl marish yn ymmodee, dy chassey briwnys.

³ Chamoo nee oo shassoo lesh y dooinney boght ayns cooish [aggairagh.]

⁴ My hagh’rys oo er dow, ny assyl dty noid goll er-shaghryn: ver oo, son shickyrys, lhiat eh huggey reesht.

⁵ My hee oo yn assyl echeysyn ta ayns noidys dhyt; ny lhie fo e laad, cha jed oo shaghey: nee oo, son shickyrys, cooney lesh.

⁶ Cha jean oo cassey briwnys dty voght ayns e chooish.

⁷ Freill oo hene foddey veih cooish aggairagh: as ny bee laue ayd ayns baase y dooinney ôney as cairagh: son cha jean-yms seyrey yn drogh-yantagh.

⁸ Cha jean oo gioot y ghoaill, son ta’n gioot dolley sooillyn y tushtey, as cur gyn bree goan yn vooinjer ynrick.

⁹ Myrgeddin cha jean oo tranlaase er y joarree, son ta ennaghtyn eu hene jeh cree yn joarree, fakin dy row shiu hene nyn yoarreeyn ayns cheer Egypt.

¹⁰ As rish shey bleeaney nee oo cuirr dty halloo, as goaill stiagh ny messyn echey:

¹¹ Agh y chiaghtoo vleïn ver oo fea da, as lhiggee oo eh ve bane; dy vod boghtyn dty phobble beaghey: as y fooilliaght oc, nee maase y vagheragh gee. Er yn aght cheddin nee oo rish dty gharey-feeyney, as rish dty gharey-olive.

¹² Shey laa nee oo dty obbyr, as er y chiaghtoo laa gowee oo fea: dy vod dty ghow as dty assyl aash y ghoaill, as dy vod mac dty inney-veyl, as y joarree v’er nyn ooraghey.

¹³ As cur-jee tastey mie da dy chooilley nhee ta mee er ghra riu: as ny jean-jee imraa jeh ennym jeeghyn joarree, chamoo lhig da ve er ny chlashtyn ass dty veeal.

¹⁴ Three keayrtyn ’sy vleïn nee oo feailley y reayll dooys.

¹⁵ Nee oo freayll feailley’n arran gyn soorit: nee oo gee arran gyn soorit shiaght laa, myr ren mee dty harey, er y traa pointit, ’sy vee Abib: son er haink oo magh ass Egypt; cha jig unnane my enish lesh laue follym.

¹⁶ As feailley ny fouyr, yn chied-vess jeh dty laboraght, t’ou er chuirr ’sy vagher: as feailley yn chur-stiagh, ta jerrey ny bleeaney, tra t’ou er choyrt stiagh dty hroar ass y vagher.

¹⁷ Three keayrtyn ’sy vleïn hig ooilley dty gheiney kiongoyrt rish y Chiarn Jee.

¹⁸ Cha jeb oo fuill my oural-caisht lesh arran soorit; chamoo bee meeaylys my oural er-mayrn derrey’n voghrey.

¹⁹ Toshiaght yn chied-vess jeh dty halloo ver oo lhiat stiagh gys thie’n Chiarn dty Yee. Cha jean oo mannan y vroie ayns bainney e vayrey.

²⁰ Cur-my-ner, ta mee cur ainle royd, dy dty choadey er y raad, as dy leeideil oo gys yn ynnyd ta mee er chiarail er dty hon.

²¹ Cur geill da, as cur biallys da e choraa, ny jean eh y vrasnaghey; son cha leih eh nyn loghtyn: son ta m’ennym’s er.

²² Agh my ver oo dy jarroo biallys da e ghoo, as jannoo er my raa, bee’m eisht my noid da dty noidyn’s, as bee’m noi adsyn ta dt’oï’s.

²³ Son hed m’ainle’s royd, as ver eh lesh oo stiagh gys cheer ny Amoriteyn, as ny Hittiteyn, as ny Perizziteyn, as ny Chanaaniteyn, as ny Hiviteyn, as ny Jebusiteyn; as nee’m ad y yiarey jeh.

²⁴ Cha jean oo croymmey sheese gys ny jeeghyn oc, ny shirveish ad, ny jannoo lurg nyn obbraghyn, agh nee oo stroie ad dy bollagh, as slane brishey ny jallooyn oc.

²⁵ As nee shiu shirveish y Chiarn y Jee eu, as ver eh bannaght er dty arran, as er dty ushtey, as neem’s aslayntyn y ghoaill veih nyn mast’ eu.

²⁶ Cha jean nhee erbee tilgey nyn ingan, ny ve gennish ayns dty heer: earroo dty laghyn neem’s y yannoo magh.

²⁷ As hed my aggle royd, as nee’m ooilley’n pobble y stroie nyn ’oï t’ou goll, as ver-yms er ooilley dty noidyn dy choyrt cooyl rhyt.

²⁸ As ver-yms ny peishteigyn-nieunagh royd, nee yn Hivite, yn Canaanite, as yn Hittite y eebyrt royd.

²⁹ Cha jean-ym ad y imman royd ’syn un vleïn; nagh bee’n cheer ny faasagh, as dy jean beishtyn y vagheragh bishaghey ort.

³⁰ Ny veggan as ny veggan neem’s ad y eebyrt magh royd, derrey vees oo er vishaghey, as er gheddyn cummal ’sy cheer.

³¹ As neem’s soiaghey dty chagleeyn veih’n Faarkey Jiarg eer gys faarkey ny Philistinee, as veih faasagh [Arabia] gys awin [Euphrates;] son neem’s cummaltee yn cheer y livrey gys nyn laue, as nee’m ad y imman magh royd.

³² Cha jean oo conaant erbee roosyn, ny rish ny jeeghyn oc.

³³ Cha lhig oo daue cummal ayns dty heer, er-aggle dy dayrn ad oo gys peccah m’oï: son my nee oo shirveish ny jeeghyn ocsyn, bee eh, son shickyrys, ribbeh dhyt.