Exodus 22 - Yn Vible Casherick 1775 1819

CAB. XXII

¹ My gheiddys dooinney dow, ny keyrrey, as marroo, ny creck eh; nee eh lhiasaghey lesh queig dew son dow, as lesh kiare kirree son keyrrey.

² My vees maarliagh goit brishey stiagh ayns thie, as eh dy gheddyn builley baaish, cha bee fuill deayrtit er e hon.

³ My vees y ghrian er n’irree er, bee fuill deayrtit er e hon, son v’eh kianlt dy yannoo slane lhiasaghey; mannagh bee cooid echey, bee eh eisht er ny chreck son e vaarleeys.

⁴ My ta’n ghriu dy jarroo er ny gheddyn bio ’sy laue, my she dow, assyl, ny keyrrey t’ayn; eeckee eh dooble er y hon.

⁵ My ver dooinney e vaagh ayns magher ny gharey-feeyney ghooinney elley, dy phastyral ayn: jeh’n chooid share jeh e vagher hene, as jeh’n chooid share jeh e gharey-feeyney hene, nee eh lhiasaghey.

⁶ My nee aile brishey magh, as goaill ny drineyn, myr shen dy vel ny creaghyn, ny ny magheryn arroo er nyn stroie liorish; nee eshyn ren yn aile y oaddey, son shickyrys, jannoo lhiasaghey.

⁷ My ver dooinney argid ny cooid da e naboo dy hashtey, as my vees eh er ny gheid ass thie’n dooinney; my vees y maarliagh goit, lhig da geeck dooble.

⁸ Mannagh jig briaght er y vaarliagh, eisht bee dooinney’n thie er ny choyrt lesh fenish ny briwnyn, dy vriaght vel eh er choyrt e laue ayns cooid e naboo.

⁹ Son dy chooilley vonney dy hrespass, lhig da ve son dow, son assyl, son keyrrey, son coamrey, ny son cooid chailjey erbee, ta fer elley dy hassoo huggey son e chooid hene; hig y chooish oc nyn-neesht fenish ny briwnyn; as nee eshyn, ver ny briwnyn yn chooish n’oï, lhiasaghey dooble da e naboo.

¹⁰ My ver dooinney da e naboo assyl, ny dow, ny keyrrey, ny baagh erbee, er farvaalys; my yiow eh baase, ny my hig assee erbee er, ny my vees eh eiyrit ersooyl, gyn-yss;

¹¹ Eisht bee loo fenish y Chiarn eddyr ad ny-neesht, nagh dug eh laue er cooid e naboo: shegin da’n oaner ve booiagh lesh shoh, as cha vow eh arragh dy lhiasaghey.

¹² As my vees eh caillit [trooid lhag-chiarail,] shegin da eisht lhiasaghey y yannoo dasyn my-liesh eh.

¹³ My vees eh raipit dy peeshyn; eisht lhig da cowrey jeh y yeeaghyn: as cha bee lhiasaghey er ny yannoo son shen ny va raipit.

¹⁴ As my nee dooinney cooid erbee y eeasaght veih e naboo, as my hig assee er, ny my yiow eh baase, gyn y dooinney my-liesh eh ve kionfenish; nee eh, son shickyrys, jannoo mie eh.

¹⁵ Agh my vees yn oaner kionfenish, cha jean eh mie eh: my she failt ve, haink eh son e aill.

¹⁶ As my nee dooinney miolaghey moidyn nagh vel nasht, as my lhie-ys eh mâree; ver eh, son shickyrys, toghyr jee dy ve e ven hene.

¹⁷ My ta’n ayr eck coyrt slane obbal da, eeckee eh argid, cordail rish toghyr moidynyn.

¹⁸ Cha n’uillee oo buitch dy ve bio.

¹⁹ Quoi-erbee lhie-ys marish baagh, bee eh, son shickyrys, er ny choyrt gy-baase.

²⁰ Quoi-erbee hebbys oural da jee erbee, agh da’n Chiarn ny-lomarcan, bee eh stroit gyn vyghin.

²¹ Cha jean oo seaghney joarree, chamoo nee oo tranlaase er: son va shiu hene nyn yoarreeyn ayns cheer Egypt.

²² Cha jean oo tranlaase er y ven-treoghe, ny er y lhiannoo gyn ayr.

²³ My nee oo er aght erbee tranlaase orroo, as ad dy ghaccan hym’s; ver-yms, son shickyrys, clashtyn da nyn eam;

²⁴ As ver-ym raad da my yymmoose, as stroie-ym shiu lesh y chliwe; as bee ny mraane eu treoghe, as nyn gloan gyn ayr.

²⁵ My ver oo argid er eeasaght da veg jeh my phobble, ta fo boghtynid mayrt, cha jig oo ro hionn er, chamoo hroggys oo thack jeh.

²⁶ My ghoys oo edyr coamrey dty naboo ayns gioal, ver oo da eh reesht roish lhie ny greiney.

²⁷ Son shen e ynrycan coodagh, coamrey e chorp eh: cre ayn chadlys eh? as hig eh gy-kione, tra nee eh plaiynt hym, dy der-yms clashtyn; son ta mee graysoil.

²⁸ Cha jean oo goltooaney ny briwnyn, ny guee mollaght da reiltagh dty phobble.

²⁹ Cha lhig oo shaghey dy hebbal yn chied-vess jeh dty arroo creen, as y chied-lhiggey jeh dty ghoagh-feeyney: yn er shinney jeh dty vec ver oo dooys.

³⁰ Nee oo er yn aght cheddin rish dty ghew, as rish dty chirree; rish shiaght laa bee eh er e voir, er yn hoghtoo laa ver oo dooys eh.

³¹ As bee shiuish pobble casherick dooys: chamoo ee-ys shiu feill erbee ta raipit ec beishtyn ’sy vagher: ver shiu da ny moddee eh.