Exodus 21 - Yn Vible Casherick 1775 1819

CAB. XXI

¹ Nish ad shoh ny leighyn nee oo soiaghey roue.

² My chionnys oo sharvaant Hebrewnagh, shey bleeaney nee eh shirveish; as ayns y chiaghtoo bee e reamys echey nastee.

³ My haink eh stiagh er hene [gyn ben as cloan,] hed eh magh er hene: my v’eh poost, eisht hed e ven mârish.

⁴ My she e vainshtyr hug ben da, as ee er ruggey mec ny inneenyn da; bee’n ven as e cloan lesh e mainshtyr, as hed eh roish er hene.

⁵ As my jir y charvaant dy foshlit, Shynney lhiam my vainshtyr, my ven, as my chloan; cha jem magh [my-lomarcan] lesh my heyrsnys.

⁶ Eisht ver e vainshtyr lesh eh fenish ny briwnyn; as ver eh lesh eh myrgeddin gys y dorrys, ny gys essyn y dorrys: as ver e vainshtyr mennee trooid e chleaysh; as nee eh shirveish eh choud as s’bio eh.

⁷ As my chreckys dooinney e inneen, dy ve ny sharvaant, cha jed ee magh myr ny fir-vooinjerey.

⁸ As mannagh daittin lesh e mainshtyr ee, ta er n’yannoo ee e cho-lhiabbagh, eisht lhig j’ee ve feayshlit: cha bee eh lowal da dy chreck ee rish ashoon joarree, son dy ghell eh dy molteyragh r’ee.

⁹ As my t’eh er nastey ee rish e vac, ver eh cairys inneen jee.

¹⁰ My ghoys eh ben elley; beaghey, coamrey, as currym poosee yn chied ven cha lhig eh sheese.

¹¹ As mannagh jean eh ad shoh nyn dree y chooilleeney r’ee, hed ee magh seyr, as nastee.

¹² Eshyn ta cur builley baaish da dooinney, bee eh dy shickyr er ny choyrt gy-baase.

¹³ As mannagh vel dooinney lhie farkiagh cooyl-chlea dy varroo fer elley, agh dy nee Jee t’er leeideil eh ny raad; neem’s eisht boayl y phointeil dhyt dasyn dy roie er-chea huggey.

¹⁴ Agh my hig dooinney jeh e yoïn er e naboo, er-chee dy varroo eh gyn-yss: nee oo goaill eh voish m’altar, as ver oo gy-baase eh.

¹⁵ Bee eshyn woaillys e ayr, ny e voir, son shickyrys er ny choyrt gy-baase.

¹⁶ As eshyn gheiddys dooinney, as chreckys eh, ny my t’eh er ny gheddyn ’sy chummal echey; bee eh, son shickyrys, er ny choyrt gy-baase.

¹⁷ As eshyn ta guee mollaght da e ayr, ny e voir, bee eh, son shickyrys, er ny choyrt gy-baase.

¹⁸ As my nee deiney tuittym magh, as my woaillys y derrey yeh yn jeh elley lesh clagh, ny lesh e ghoayrn, as gyn eh dy gheddyn baase, agh cummal e lhiabbee:

¹⁹ My nee eh girree, as shooyl magh er e lorg, cha bee cooilleeney er ny ghoaill er (myr dunver:) agh shegin da geeck son coayl e hraa, as son slane cost e lheihys.

²⁰ As my nee dooinney bwoalley e harvaant, ny e inney-veyl lesh lorg, as eh dy gheddyn baase fo e laue, bee eh son shickyrys er ny stroie.

²¹ Ny-yeih my chummys eh bio son laa ny jees, cha jean eh surranse, son dy nee’n chooid echey eh.

²² My nee deiney streeu, as gortaghey ben torragh, myr shen dy jig ee roish e traa, as dyn assee sodjey; bee eh dy shickyr er ny cherraghey, rere myr ver dooinney’n ven er, as bee eh oolit lurg oardagh ny briwnyn.

²³ As my hig assee erbee jeh, eisht ver oo bioys son bioys.

²⁴ Sooill son sooill, feeackle son feeackle, laue son laue, kass son kass.

²⁵ Lostey son lostey, lhott son lhott, builley son builley.

²⁶ As my woaillys dooinney sooill e er-mooinjerey, ny sooill e harvaant, dy gaill eh ee, ver eh e reamys da son coayl e hooill.

²⁷ As my ver eh coayl feeackle er e er-mooinjerey, ny e inney-veyl, ver eh e reamys da, son e eeackle.

²⁸ As my nee dow puttey dooinney ny ben, as eh oyr baaish daue, bee’n dow son shickyrys er ny chlaghey, as cha bee’n eill echey eeit; agh bee’n er s’liesh y dow er ny heyrey.

²⁹ Agh my va’n dow puttagh roïe, as fys ec yn oaner er, as nagh dreill eh sthie eh, agh dy vel eh er varroo dooinney ny ben, bee’n dow er ny chlaghey, as yn er s’liesh eh myrgeddin er ny choyrt gy-baase.

³⁰ My vees eh oolit ayns sym argid, eisht nee eh geeck son feaysley e vioys, cre-erbee vees er ny choyrt er.

³¹ My she mac ny inneen t’eh er phuttey, cordail rish y briwnys shoh vees jeant rishyn.

³² My phuttys y dow fer-mooinjerey, ny inney-veyl; ver eh da nyn mainshtyr jeih shekelyn as feed dy argid, as bee’n dow er ny chlaghey.

³³ As my nee dooinney fosley ooig, ny my chleiys dooinney ooig, as gyn coodagh ’chur er, as my huittys dow ny assyl ayn;

³⁴ Nee’n dooinney s’liesh yn ooig lhiasaghey er y hon, as ver eh argid dasyn by-liesh ad, as bee’n baagh marroo echey hene.

³⁵ As my varrys dow ghooinney erbee baagh e naboo, nee ad eisht yn dow bio y chreck, as yn argid y rheynn; as rheynnee ad myrgeddin yn dow marroo.

³⁶ Ny my ve er-fys da’n er by-liesh y dow, dy row eh cliaghtey puttey, as nagh vel eh er ghoaill kiarail jeh, nee eh son shickyrys geeck dow son dow, as bee’n marroo lesh hene.