Exodus 20 - Yn Vible Casherick 1775 1819

CAB. XX

¹ As loayr Jee ooilley ny goan shoh, gra,

² Mish y Chiarn dty Yee, hug lhiam uss magh ass thalloo Egypt, ass thie ny bondiaght.

³ Cha bee Jee erbee elley ayd’s, agh mish.

⁴ Cha jean oo dhyt hene jalloo granit erbee, ny co-chaslys jeh nhee erbee dy vel ayns niau heose, ny er y thalloo wass, ny t’ayns yn ushtey fo’n thalloo.

⁵ Cha jean oo croymmey oo hene sheese huc, ny ooashley ’chur daue: son ta mish y Chiarn dty Yee my Yee eadolagh, kerraghey peccaghyn ny ayraghyn er y chloan gys y trass as y chiarroo heeloghe jeusyn ta dwoaie oc orrym;

⁶ As soilshaghey myghin er thousaneyn jeusyn ta graihagh orrym, as freaylley m’annaghyn.

⁷ Cha gow ennym y Chiarn dty Yee ayns fardail; son cha gum y Chiarn eshyn gyn loght ta goaill e ennym ayns fardail.

⁸ Cooinee er y doonaght, dy reayll eh dy casherick.

⁹ Shey laa nee oo laboragh, as jannoo ooilley dty obbyr:

¹⁰ Agh y chiaghtoo laa doonaght y Chiarn dty Yee: Er cha jean oo obbyr erbee, uss, ny dty vac, ny dty inneen, dt’er-mooinjerey, ny dt’inney-veyl, ny dt’ollagh, ny dty yoarree t’er cheu-sthie jeh dty yiattyn:

¹¹ Son ayns shey laa chroo yn Chiarn niau as thalloo, yn faarkey, as ooilley ny t’ayndoo, as scuirr eh er y chiaghtoo laa: shen-y-fa vannee yn Chiarn y chiaghtoo laa, as ren eh eh y chasherickey.

¹² Cur arrym da dt’ayr as da dty voir: dy vod dty laghyn ve beayn er y thalloo, ta’n Chiarn dty Yee dy chur dhyt.

¹³ Cha jean oo dunverys.

¹⁴ Cha brish oo poosey.

¹⁵ Cha jean oo geid.

¹⁶ Cha n’ymmyrk oo feanish foalsey noi dty naboo.

¹⁷ Cha der oo saynt da thie dty naboo, cha der oo saynt da ben dty naboo, ny da e harvaant, ny da e inney-veyl, ny da e ghow, ny da e assyl, ny da nhee erbee ta lesh dty naboo.

¹⁸ As honnick ooilley’n pobble ny taarneeyn, as ny tendreilyn, as sheean y trumpet, as y slieau fo yaagh; as tra honnick y pobble shoh, scugh ad, as hass ad ny sodjey jeh.

¹⁹ As dooyrt ad rish Moses, Loayr uss rooinyn, as ver mayd clashtyn: agh ny lhig da Jee loayrt rooin, nagh vow mayd baase.

²⁰ As dooyrt Moses rish y pobble, Ny bee aggle erriu: son ta Jee er heet dy phrowal shiu, as dy vod yn aggle echey ve roish nyn sooillyn, nagh jean shiu peccah.

²¹ As hass y pobble foddey jeh, as hayrn Moses er-gerrey da’n dorraghys choo, raad va Jee.

²² As dooyrt y Chiarn rish Moses, Myr shoh jir oo rish cloan Israel; ta shiu er vakin dy loayr mee riu veih niau.

²³ Cha jean shiu diu hene mârym’s jeeghyn argid, chamoo nee shiu diu hene jeeghyn airhey.

²⁴ Altar coirrey nee oo dooys, as er nee oo chebbal dty ourallyn-losht, as dty ourallyn-shee, dty chirree, as dty ghew; ayns dy chooilley ynnyd raad ta m’ennym er ny ooashlaghey, bee’m mayrt, as nee’m dty vannaghey.

²⁵ As my nee oo altar chloaie dooys, cha jean oo eh lesh claghyn cummit; son my hroggys oo greïe erbee er, t’ou er n’yannoo eh an-chasherick.

²⁶ Chamoo hed oo seose gys m’altar’s er greeishyn, nagh bee dty nearey er ny akin er.