Exodus 19 - Yn Vible Casherick 1775 1819

CAB. XIX

¹ Ayns y trass vee, lurg da cloan Israel v’er n’gholl magh veih cheer Egypt, er y chied laa jeh’n vee, haink ad gys faasagh Sinai.

² Son v’ad er hroggal veih Rephidim, as er jeet gys faasagh Sinai, as er hoiaghey nyn gabbaneyn ’syn aasagh: as shen y raad ren Israel campal roish y clieau.

³ As hie Moses seose gys Jee, son va’n Chiarn er n’eamagh huggey veih’n clieau, gra, Shoh myr nee oo loayrt rish thie Yacob, as ginsh da cloan Israel;

⁴ Ta shiu er vakin ny ren mee rish ny Egyptianee, as kys dymmyrk mee shiu myr er skianyn urley, as hug mee lhiam shiu er-gerrey dou hene.

⁵ Shen-y-fa nish, my ver shiu dy jarroo biallys da my choraa, as freayll my chonaant, bee shiu eisht pobble my chree hene, erskyn dy chooilley phobble; son lhiam’s ooilley’n seihll.

⁶ As bee shiu dooys myr reeriaght dy haggyrtyn, as ny ashoon casherick. Shoh ny goan nee oo loayrt rish cloan Israel.

⁷ As haink Moses, as ren eh sumney shanstyr y phobble, as hoilshee eh daue ooilley ny goan shoh, va’n Chiarn er harey da.

⁸ As dreggyr y pobble ooilley lesh un choraa, as dooyrt ad, Ooilley ny ta’n Chiarn er harey nee mayd. As hug Moses stiagh ansoor y pobble gys y Chiarn.

⁹ As dooyrt y Chiarn rish Moses, Cur-my-ner, ta mee cheet hood’s ayns bodjal dorraghey, dy vod y pobble clashtyn, tra ta mee loayrt rhyt, as credjal oo dy kinjagh; As livrey Moses goan y pobble da’n Chiarn.

¹⁰ As dooyrt y Chiarn rish Moses, Immee gys y pobble, as jean ad y chasherickey jiu as mairagh, as lhig daue niee nyn eaddagh:

¹¹ As ve aarloo son y trass laa: son er y trass laa, hig y Chiarn neose ayns shilley ooilley’n pobble er slieau Sinai.

¹² As nee oo soiaghey cagliagh roish y pobble ooilley mygeayrt, gra, Jeeagh-jee diu hene nagh jed shiu seose er y clieau, ny cheet faare yn oirr echey: quoi-erbee vennys rish y clieau bee eh son shickyrys er ny choyrt gy-baase.

¹³ Cha benn laue rish nagh bee eh dy jarroo er ny chlaghey, ny er ny varroo lesh side: lhig da ve baagh ny peccagh cha jig e vioys lesh. Tra vees y trumpet er ny heidey son tammylt mie, hig ad gys y clieau.

¹⁴ As hie Moses sheese jeh’n chronk gys y pobble, as ren eh casherickey’n pobble, as niee ad nyn eaddagh.

¹⁵ As dooyrt eh rish y pobble, bee-jee aarloo ry-hoi yn trass laa: ny tar-jee coair nyn mraane.

¹⁶ As haink eh gy-kione, er moghrey yn trass laa, dy row taarneeyn as tendreilyn, as bodjal dorraghey er y chronk, as feiyr y trumpet yindyssagh ard, myr shen dy row ooilley’n pobble v’ayns y champ er-creau.

¹⁷ As hug Moses lesh y pobble ass y champ dy gholl quail Jee, as hass ad er cheu-heese jeh’n clieau.

¹⁸ As va cronk Sinai ooilley fo yaagh, son dy daink y Chiarn neose er ayns aile: as hie yn jaagh echey seose, myr jaagh coirrey, as va craa-hallooin mooar ayns ooilley’n clieau.

¹⁹ As tra va sheean y trumpet foddey feiyral, as tra daase eh ny syrjey as ny syrjey, loayr Moses, as dreggyr Jee eh ayns coraa.

²⁰ As haink y Chiarn neose er slieau Sinai, er mullagh y clieau; as deïe’n Chiarn er Moses seose gys mullagh y chronk, as hie Moses seose.

²¹ As dooyrt y Chiarn rish Moses, Immee sheese, cur currym er y pobble, nagh brish ad stiagh er y Chiarn dy ghoaill yindys, as dy jean mooarane jeu cherraghtyn.

²² As lhig da ny saggyrtyn myrgeddin, ta tayrn er-gerrey da’n Chiarn, ad hene y chasherickey, er-aggle dy jean y Chiarn brishey magh orroo.

²³ As dooyrt Moses rish y Chiarn, Cha vod y pobble cheet seose er slieau Sinai: son hug oo currym orrin, gra, Tayrn cagliagh mysh y chronk, as jean eh y chasherickey.

²⁴ As dooyrt y Chiarn rish, Immee royd, gow sheese, as hig oo hene, as Aaron seose mayrt: agh ny lhig da ny saggyrtyn as y pobble brishey trooid, dy heet seose gys y Chiarn, er-aggle dy brish eshyn magh orroosyn.

²⁵ Myr shen hie Moses sheese gys y pobble, as loayr eh roo.