Exodus 18 - Yn Vible Casherick 1775 1819

CAB. XVIII

¹ As tra cheayll Jethro saggyrt Vidian, ayr-’sy-leigh Voses, jeh ooilley ny ren Jee son Moses, as son Israel e phobble, as dy row’n Chiarn er chur lesh Israel magh ass Egypt:

² Dy ghow Jethro, ayr-’sy-leigh Voses, Zipporah ben Voses, erreish da v’er choyrt ee thie,

³ As e daa vac; va ennym y derrey yeh Gershom [son dooyrt eh, Ta mee er ve my yoarree ayns cheer joarree:]

⁴ As va ennym y jeh elley Eliezer (son va Jee m’ayrey, dooyrt eh, my endeilagh, as livrey eh mee veih cliwe Pharaoh,)

⁵ As haink Jethro ayr ’sy leigh Voses, lesh e vec as e ven gys Moses, ayns yn aasagh, raad v’eh campal, liorish cronk Yee.

⁶ As hug eh fys gys Moses, Ta mish Jethro dty ayr-’sy-leigh er jeet hood’s, lesh dty ven, as e daa vac mâree.

⁷ As hie Moses magh quail e ayr-’sy-leigh, as ren eh biallys da, as phaag eh eh: as vrie ad mychione slaynt y cheilley: as hie ad stiagh ’sy chabbane.

⁸ As dinsh Moses da e ayr-’sy-leigh ooilley ny ren y Chiarn rish Pharaoh, as rish ny Egyptianee, er graih Israel, as ooilley’n tooilleil haink orroo er y raad, as kys va’n Chiarn er livrey ad.

⁹ As va boggey er Jethro, son ooilley’n chenjallys va’n Chiarn er hoilshaghey da Israel: v’eh er hauail veih laue ny Egyptianee.

¹⁰ As dooyrt Jethro, Bannit dy row’n Chiarn, ta er livrey shiu ass laue ny Egyptianee, as veih laue Pharaoh: t’er hauail y pobble veih laue ny Egyptianee.

¹¹ Nish, ta fys aym, dy vel y Chiarn foddey erskyn dy chooilley Yee: son lesh ooilley nyn mooaralys v’eshyn er-nyn-skyn.

¹² As ghow Jethro, ayr-’sy-leigh Voses, oural-losht as chebballyn da Jee: as haink Aaron, as ooilley shanstyr Israel, dy ghoaill ayrn ’syn oural, marish ayr-’sy-leigh Voses, fenish Yee.

¹³ As haink eh gy-kione er laa-ny-vairagh, dy hoie Moses dy choyrt briwnys da’n pobble: as hass y pobble fenish Voses veih moghrey gy fastyr.

¹⁴ As tra honnick ayr-’sy-leigh Voses ooilley ny ren eh rish y pobble, dy dooyrt eh, Cre shoh t’ou dy yannoo rish y pobble? cre’n-fa dy vel oo soie dty-lomarcan, as y pobble ooilley nyn shassoo liort, veih’n voghrey gys yn astyr?

¹⁵ As dooyrt Moses rish e ayr-’sy-leigh, Son dy vel y pobble cheet hym’s, dy vriaght veih Jee.

¹⁶ Tra ta cooish oc, t’ad cheet hym’s; as ta mee briwnys eddyr ad; as ta mee soilshaghey daue slattyssyn as leighyn Yee.

¹⁷ As dooyrt ayr-’sy-leigh Voses rish; Cha vel yn aght shoh t’ou dy ghoaill mie er dty hon.

¹⁸ Nee oo son shickyrys, goll naardey chammah oo hene as y pobble ta mayrt: son ta’n errey shoh ro hrome er dty hon; te rouyr dhyt’s dty-lomarcan dy ymmyrkey.

¹⁹ Eaisht nish rish my choraa, ver-yms coyrle dhyt; as bee Jee mayrt: bee uss eddyr Jee as y pobble, dy choyrt lhiat ny cooishyn oc gys Jee.

²⁰ As inshee oo daue oardaghyn as leighyn, as nee oo jeeaghyn daue yn raad lhisagh ad y ghoaill, as yn obbyr t’orroo dy yannoo.

²¹ Myrgeddin jeeagh magh mastey ooilley’n pobble son deiney fondagh, ta goaill aggle roish Jee, deiney ynrick, dwoaiagh er saynt; nyn lheid oc shoh nee oo soiaghey harrystoo, dy ve son fir-reill er thousaneyn, as fir-reill er keeadyn, fir-reill er lieh-cheeadyn, as fir-reill er jeihghyn.

²² As lhig dauesyn briwnys y pobble ec dy chooilley hraa; as shoh myr vees eh, dy chooilley chooish doillee ver ad lhieu hood’s, as ny cooishyn sloo nee ad hene y vriwnys: myr shoh bee eh ny sassey dhyt hene, as nee adsyn yn errey y ymmyrkey mayrt.

²³ My nee oo myr shoh, as Jee dy dty harey myr shen, eisht bee oo abyl dy chummal rish, as hed ooilley’n pobble shoh gys nyn ynnyd hene ayns shee.

²⁴ Myr shen ghow Moses coyrle e ayr-’sy-leigh, as ren eh er e raa.

²⁵ As ren Moses deiney fondagh y reih trooid ooilley Israel, as ren eh ad king harrish y pobble, fir-reill er thousaneyn, fir-reill er keeadyn, fir-reill er lieh-cheeadyn, as fir-reill er jeihghyn.

²⁶ As ren ad y pobble y vriwnys ec dy chooilley earish; ny cooishyn creoi hug ad fenish Voses, agh dy chooilley chooish sloo ren ad hene y reaghey.

²⁷ As hie ayr-’sy-leigh Voses roish, as jimmee eh gys e heer hene.