Exodus 17 - Yn Vible Casherick 1775 1819

CAB. XVII

¹ As ren ooilley co-chruinnaght chloan Israel goaill nyn yurnah, veih faasagh Sin, lurg ny jurnaaghyn oc, cordail rish oardagh yn Chiarn, as hoie ad nyn gabbaneyn ayns Rephidim: as cha row ushtey ec y pobble dy iu.

² As ren y pobble troiddey rish Moses, as dooyrt ad, Cur dooin ushtey dy iu. As dooyrt Moses roo, Cre’n-fa ta shiu troiddey rhym’s? cre’n-fa ta shiu brasnaghey’n Chiarn.

³ As va’n pobble miandagh son ushtey ayns shen; as loayr y pobble dy gyere noi Moses, as dooyrt ad, Cre’n-fa t’ou er choyrt lhiat shin ass Egypt; dy varroo shin hene as nyn gloan, as nyn maase lesh paays?

⁴ As deïe Moses gys y Chiarn, gra, Cre nee’m rish y pobble shoh? t’ad faggys aarloo dy m’y chlaghey.

⁵ As dooyrt y Chiarn rish Moses, Immee er dty hoshiaght roish y pobble, as gow mayrt shanstyr Israel: as gow ayns dty laue yn lorg, lesh woaill oo yn awin, as immee.

⁶ Cur-my-ner, shass-yms kiongoyrt rhyt ayns shen, er y chreg ayns Horeb: as nee uss bwoalley’n chreg, as hig ushtey magh ass, dy vod y pobble giu. As ren Moses shen ayns shilley shanstyr Israel.

⁷ As denmys eh yn ynnyd, Massah as Meribah, er coontey anvea chloan Israel, as son dy ren ad brasnaghey’n Chiarn, gra, Vel y Chiarn ny mast’ ain, mannagh vel?

⁸ Eisht haink Amalek, as ren ad caggey noi Israel ayns Rephidim.

⁹ As dooyrt Moses rish Joshua, Reih dooin magh deiney, as immee magh, dy chaggey rish Amalek: mairagh, shass-ym er mullagh y chronk lesh lorg Yee my laue.

¹⁰ Myr shen ren Joshua, myr dooyrt Moses rish, as ren eh caggey rish Amalek: as hie Moses, Aaron, as Hur, seose er mullagh y chronk.

¹¹ As haink eh gy-kione, choud as chum Moses seose e laue (ayns padjer) dy ren Israel cosney: as tra lhig eh sheese e laue, dy ren Amalek cosney.

¹² Agh va laueyn Voses trome; as ghow ad clagh, as hug ad fo eh; as hoie eh er: as chum Aaron as Hur ny laueyn echey seose, fer er dagh cheu: as va e laueyn cummit seose dy shickyr, derrey lhie ny greiney.

¹³ As hooar Joshua yn varriaght er Amalek, as er e gheiney, lesh foyr yn chliwe.

¹⁴ As dooyrt y Chiarn rish Moses, Scrieu shoh son imraa ayns lioar, as lhig da ve er ny lhaih ayns clashtyn Yoshua; son neem’s dy bollagh stroie ashoon Amalek fo niau.

¹⁵ As hrog Moses altar, as denmys eh eh Jehovah-nissi.

¹⁶ Son dooyrt eh, Er-yn-oyr dy vel y Chiarn er vreearrey; dy bee caggey ec y Chiarn rish Amalek veih sheeloghe gys sheeloghe.