Exodus 15 - Yn Vible Casherick 1775 1819

CAB. XV

¹ Eisht hrog Moses as cloan Israel yn arrane-moyllee shoh gys y Chiarn, gra, Neem’s kiaulleeaght gys y Chiarn: son t’eh dy gloyroil er gheddyn barriaght; yn cabbyl as e varkiagh t’eh er cheau ’syn aarkey.

² Ta’n Chiarn my niart as my arrane, hug eh dou livrey-ys: eshyn my Yee, as trog-yms cummal casherick da; Jee my ayraghyn, as ver-ym ooashley da.

³ Ta’n Chiarn yn ard er-caggee; Jehovah yn ennym echey.

⁴ Fainee Pharaoh as e heshaght-chaggee t’eh er cheau ’syn aarkey: e reih captanyn t’eh er vaih ’syn Aarkey Jiarg.

⁵ Ren ny diunidyn ad y choodaghey: sheese hie ad gys y ghrunt myr clagh.

⁶ Ta dty laue yesh, O Hiarn, er ve gloyroil ayns pooar: ta dty laue yesh, O Hiarn, er vroo yn noid dy myn.

⁷ As ayns mooad’s dty ghloyr t’ou er choyrt fo-chosh adsyn dirree seose dt’oï: hug oo magh dty yymmoose, hug mow ad myr stubble.

⁸ As ec sheidey dty yymmoose va ny ushtaghyn er nyn jaglym dy cheilley, hass ny ushtaghyn myr voalley, as va ny diunidyn riojit ayns cree yn aarkey.

⁹ Dooyrt y noid, Hem er nyn eiyrt’s, berr-ym orroo, rheynn-ym y spooilley: bee cooilleeney m’aigney aym orroo; my chliwe nee’m y hayrn, nee my laue ad y stroie.

¹⁰ Lesh dty gheay ren oo sheidey; ren y faarkey nyn goodaghey: ren ad sinkeil myr leoaie ayns ny ushtaghyn stermagh.

¹¹ Quoi ta casley rhyt’s, O Hiarn, mastey ny jeeghyn! quoi ta casley rhyt, gloyroil ayns casherickys, ta moylley cair dhyt lesh arrym, uss ta gobbraghey mirrilyn?

¹² Heeyn oo magh dty laue yesh: ren y thalloo ad y lhuggey.

¹³ Ayns dty vyghin, t’ou er leeideil magh dty phobble, daue t’ou er choyrt livrey-ys: t’ou er leeideil ad ayns dty niart gys dty chummal casherick.

¹⁴ Clynnee yn pobble, as bee aggle orroo; nee seaghyn greimmey cummaltee Phalestina.

¹⁵ Shen y traa vees atchim er dukeyn Edom; er deiney niartal Voab gowee creau atchimagh greme; hed nyn dappey veih ooilley cummaltee Chanaan.

¹⁶ Nee aggle as atchim tuittym orroo, liorish niart dty roih cha gleashee ad ny smoo na clagh, derrey hed dty phobble trooid [nyn droailt] O Hiarn, derrey hed y pobble ny hrooid, yn pobble t’ou er chosney [veih Egypt.]

¹⁷ Ver oo lhiat stiagh ad, as nee oo ad y hoiaghey er slieau dty eiraght, ’syn ynnyd, O Hiarn, t’ou er chiarail son dty chummal hene; ’syn ynnyd casherick, O Hiarn, ta dty laueyn er hickyraghey.

¹⁸ Nee’n Chiarn reill son dy bragh as dy bragh.

¹⁹ Son hie cabbil Pharaoh stiagh ’syn aarkey, lesh e ainee, as e varkee, as hug y Chiarn lesh reesht ushtaghyn yn aarkey orroo: agh ren cloan Israel troailt er thalloo chirrym ayns mean yn aarkey.

²⁰ As ren y phadeyr Miriam, shuyr Aaron, greïe-chiaull y ghoaill ’sy laue eck; as deiyr ooilley ny mraane urree lesh greinyn-kiaullee, as lesh daunsin.

²¹ As hie Miriam lhieu, Jean-jee kiaulleeaght gys y Chiarn; son t’eh dy gloyroil er gheddyn barriaght; yn cabbyl as e varkiagh t’eh er vaih ’syn aarkey.

²² Myr shoh hug Moses lesh Israel veih’n Aarkey Jiarg, as ad y leeideil stiagh gys faasagh Shur, as ren ad troailt three laa ’syn aasagh, as cha dooar ad ushtey.

²³ As tra haink ad gys Marah, cha voddagh ad giu jeh ushtaghyn Marah, son v’ad sharroo: shen-y-fa ve enmyssit Marah.

²⁴ As ren y pobble plaiynt noi Moses, gra, Cre nee mayd son ushtey?

²⁵ As deïe eh er y Chiarn, as ren y Chiarn billey y yeeaghyn da, yn billey cheddin tra v’eh er cheau ’syn ushtey, haink yn ushtey dy ve millish: shen y raad ren eh daue slattys as oardagh, as ayns shen phrow eh ad.

²⁶ As dooyrt eh, My nee oo geaishtagh dy tastagh rish coraa yn Chiarn dty Yee, as jannoo shen ny ta kiart ayns e hilley, as my ver oo geill da ny saraghyn echey, dy reaylley ooilley e lattyssyn; cha der-ym veg jeh ny doghanyn shen ort’s hug mee er ny Egyptianee: son mish y Chiarn ta cur dhyt dty lhaynt.

²⁷ As haink ad gys Elim, raad va daa chibbyr yeig ushtey, as three-feed as jeih dy viljyn-palm: as ren ad campal ayns shen liorish ny ushtaghyn.